Ohubala 9 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Paasaka yohubiri

¹ Omwaami yaboolera Musa naali mu siparara sya Sinai mu mwoosi kutaangira kw'omwaaka kw'ohubiri luunyuma lw'abaandu ba Yisiraeli nibamalire ohutula Misiri. Yaboola ati,

² “Leha abaandu ba Yisiraeli bahuseenge Paasaka esiha syasyo sihoyera.

³ Mani hu ludaalo lw'ehumi-na-hane lw'omwoosi kuno, engoloobe, muhoyere ohuluhusaanga mu siha syayo syeene syateebwao; ohweema hu malako kayo koosi, neende ebilagiro byayo byoosi nilwo lu muhoyere ohuhusaanga.”

⁴ Mani Musa yaboobera abaandu ohuhusaanga Paasaka eyo,

⁵ mani engoloobe y'oludaalo lw'ehumi-na-hane lw'omwoosi kutaangira baholera batyo mu siparara sya Sinai. Abaandu bahola buli siindu koti lu Omwaami yali n'alagiire Musa.

⁶ Nae baliwo abaandu baandi abali nibali neende omukwoobo kw'emiduunga olwohuba bali nibadiirireho hu mulaambo, mani sibali nibanyala ohuhusa Paasaka hu ludaalo lweene olwo. Bachia eyiri Musa neende Arooni

⁷ mani baboola bati, “Efwe huliho omukwoobo olwohuba hudiirire hu mulaambo, nae lwasiina hwiicha hwaakayirwa ohuyaanira alala neende Abaisiraeli baandi esiyaanwa sy'Omwaami?”

⁸ Musa yabakobolamo ati, “Muliinde ohwoola lu njia ohunyoolera ebilagiro ohutula eyiri Omwaami.”

⁹ Mani Omwaami yaboolera Musa

¹⁰ ohuboolera abaandu ba Yisiraeli ati, “Omuundu mulala hweeng'we, oba abaana beeng'we baba nibeebahire omukwoobo, ohutulana huhudiira omulaambo kwoosi, oba baba nibali eyale mu lukeendo, nae baba nibasiidaha ohuhusa Paasaka,

¹¹ oba ofukiirirwa ohuyihusa omwoosi omulaamba nikuba nikusidoong'ereyo Paasaka yeene yoole, engoloobe y'oludaalo lw'ehumi-na-hane olw'omwoosi kwa habiri. Muyilicheenge neende emigaati kitaalimo emera neende elyaani lulu.

¹² Mutalehaangaho ebyohulya ebyo bidoong'aangaho ohwoola echuli y'oludaalo luloondaho daawe, haandi mutafunakaangaho ekuumba lyoosi ely'esyaayo si muba nimulya. Huseenge Paasaka nimweemere hu bilagiro byoosi koti lu biri.

¹³ Nae oyo yeesi oba naaliho omukwoobo kw'omuduunga kwoosi, nae haba saali sa eyale mu lukeendo, mani naahaya sa ohuhusa Paasaka, aba saasiyirwa koti mulala hu baandu baange, olwohuba saaba n'aleetere esiyaanwa yiindi esiha sisihoyeremo. Mani ahoyere omweene ohusaandisibwa koti esyonoono syae esyo sihoyera.

¹⁴ “Nae abaandu bateende ababamenyamo nibaba bosi nibadaha ohuhusa Paasaka, baba bahoyere ohuyihusa ohuloondakana neende amalako neende ebilagiro byoosi biyituka. Elako nasilala lino lidiira hu buli muundu yeesi, oba omwiibulanwa oba omuteende.”

Esireesi sitaali esyadyeeri

¹⁵ Hu ludaalo lu sanduuku ly'emigaati ky'Omwaami lyoombahirwaho, esireesi syeecha syaalifuuniha lyoosi, Eyeema ly'Ohubaao hw'Omwaami; nae engoloobe niyoola lyadoong'a sa hu sanduuku ohwo nilifwaana koti omuliro kwaaduha ohwoola lu bwiire bwahya.

¹⁶ Mani byeehola eby'olubeerera; esireesi syalibwihaangaho esideete, nae ohubonehana hw'omuliro hwalibwihaangaho esiro.

¹⁷ Nae buli lu sireesi syatulaangayo, Abaisiraeli basakuulaanga ekaambi eyo, mani boombaha ekaambi abuundu yi siba nisiihire.

¹⁸ Abaandu basakuulaanga ekaambi, Omwaami naaba naabalagiire, nihaandi koti lu yabechaanga naabalagiire, nilwo lu boombahaanga ekaambi yiindi. Esireesi nisyabechaanga nisisiisiiri aakulu w'Eyeema, badoong'aanga sa nibamenyere mu kaambi yeene eyo.

¹⁹ Esireesi esyo nisyadoong'aanga nisiri aakulu w'Eyeema elyo esiha sileeyi muno, bafunihiraanga sa Omwaami mani bahayaanga ohuwuuyaho.

²⁰ Esiha siindi esireesi esyo syadoong'aanga aakulu w'Eyeema elyo hulw'endaalo endiidi muno; nae koti sa lu syalichiingi, bahiindaanga nisihiindire, haandi baanguyaanga nisyaanguuye, ohweema koti Omwaami aba n'alagiire.

²¹ Esiha siindi esireesi esyo syadoong'aangaho ohutula engoloobe ohwoola echuli, nibamala basiingira baawaao nisyasiimbuhaanga sa siti.

²² Oba nisyamalaanga endaalo chibiri sa, oba omwoosi, oba omwaaka, kata neende ohuhirao, olwohuba esireesi syabechaanga nisisiisiiri aakulu w'Eyeema, haba sibawechaangao daawe; nae nisyasiingiraanga sa siti, ni bosi batulaniramo ohuwuuya.

²³ Boombahaanga ekaambi, haandi bakaangululaanga ekaambi nibeema hu hufunihira ebilagiro bi Omwaami yalichiingi naatusire ohubitira mu Musa.