Ohubala 8 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohuteengehaanga amataara

¹ Omwaami yaboolera Musa ati,

² “Boolera Arooni oti naaba nateengeha amataara kataanu-na-kabiri ako hu siteeni syako, ahoyere ohukatechaanga mu ngeri yikanya obulafu bwaanyala ohwaaduha nibutingaalire mu moni.”

³ Arooni yaawulira mani yaachia yaata amataara nikatingaalire mu moni w'esiteeni syako.

⁴ Ohutulira elalira aakulu bweene ohwoolera elalira aasi bweene, esiteeni sy'amataara esyo syali syaholwa mu saabbu enyuhuule, ohweema hu engeri yi Omwaami yali niyekeese Musa.

Ohulabiswa neende ohuyaanwayo hw'Abaleefi

⁵ Omwaami yaboolera Musa ati,

⁶ “Kabula Abaleefi obatuse mu baandu baandi badoong'ereo aba Yisiraeli obalabye

⁷ mu ngira yino eyiloondaho yiti: bayaanyeho amaachi k'ohulabisibwa mani omale obaboolere ohweebeka emibiri kyaabwe kyoosi, haandi neende ohwoosa engubo chaabwe choosi. Ao bulaanu baba bachia ohuba nibatusirweho omukwoobo.

⁸ Bulaanu baba bachia ohubukula eng'oombe surusi njere alala neende esiyaanwa sihoyera ohuba esy'emere, esy'obusye obasasaaniiswe neende amafuta k'enaasi; mani ewe niiwe oba n'ohoyeere ohubukuliraho esurusi yiindi ey'esiyaanwa sy'esyonoono.

⁹ Mani mala otyo mani olaalihe abaandu ba Yisiraeli boosi beeche beehale alala mani ohole Abaleefi beeme mu moni w'Eyeema ly'Ohubaao hwaange.

¹⁰ Mani abaandu boosi aba Yisiraeli baba bachia ohuta amahono kaabwe hu Baleefi bano,

¹¹ mani Arooni amale atyo mani ayaane Abaleefi bano yi ndi koti esiyaanwa sikabuhaaneho ohutula eyiri Abaisiraeli boosi, hu banyale ohuholaanga emirimo kyaange.

¹² Abaleefi bano bulaanu baba boosi bachia ohubukula amahono kaabwe mani bakate hu mitwe ky'esurusi chino chibiri; ndala yiba yihoyeere ohuyaanwa koti esiyaanwa sy'esyonoono, nae eyiindi koti esiyaanwa sisaambwa syaakwa ekohe, hu banyale ohumalira Abaleefi omuduunga kw'ohulabiswa.

¹³ “Yaanayo Abaleefi bano koti esiyaanwa sy'enjaulo eyiri ese, mani omale ote Arooni neende abaana bae mu bunyala bw'ohubaliinda.

¹⁴ Yawulaanga oti Abaleefi mu ngira yino yiti, ohutula hu Baisiraeli baandi badoong'ereyo, hu banyale ohuba abaange ese omweene.

¹⁵ Nooba noomalire ohulabya neende ohuyaana Abaleefi, bulaanu hu baba bachia ohuba abahoyera ohuhola emirimo mu Yeema.

¹⁶ Mbekoboseere mu bweyaango bw'abaana baamberi boosi ab'Abaisiraeli, mani baange ese syeeng'ene.

¹⁷ Nindeeta abaamberi boosi mu Misiri, ndali nimbalabya ohuba abaange, buli musyaani muhuluundu wa buli daala ly'Abaisiraeli, haandi neende buli syaamberi sya buli sisolo.

¹⁸ Nae bulaanu ndi ohuyira Abaleefi mu bweyaango bw'abaamberi b'Abaisiraeli,

¹⁹ mani haandi yeemerera Abaleefi bano eyiri Arooni neende abaana baabwe, koti esiyaanwa situla eyiri Abaisiraeli, ohuholaanga emirimo mu Yeema hulw'abaandu ba Yisiraeli haandi neende ohuhiingakiraanga Abaisiraeli ohutula hu masira kahanyalire ohubakwichaagaho, nibaba nibasudire muno aambi neende Abuundu Woolerefu ao.”

²⁰ Mani Musa, Arooni, neende abaandu boosi aba Yisiraeli bayaana Abaleefi, koti lu Omwaami yalagira Musa.

²¹ Abaleefi boosi beelabya abeene, boosa engubo chaabwe, mani Arooni yaabayaanayo koti esiyaanwa sy'enjaulo eyiri Omwaami. Haandi lwosi yeecha yabaholera omuduunga kw'ohulabiswa.

²² Abaandu baandi bosi bahola buli siindu si Omwaami yali n'alagiire Musa esidiira hu Baleefi. Abaleefi boola ohuhoyera ohuhola emirimo mu Yeema nibali aasi wa Arooni neende abaana bae.

²³ Omwaami haandi yaboolera Musa ati,

²⁴ “Ohutulira hu myaaka amahumi kabiri neende kitaanu buli Muleefi ahoyere ohuba naanyala ohwooseresaanga obufunaanibwa bwae mu Yeema ly'Ohubaao hwaange,

²⁵ nae hu myaaka ky'obuhuluundu amahumi kataanu ahoyera ohuwuluusibwaanga.

²⁶ Esyo nisiba nisiweere, aba anyala naadaha ohuchichaanga n'ahoonyaho sa Abaleefi baasye mu huhola emirimo kyaabwe mu Yeema, nae haba saaba nahoyeere ohuholaanga omulimo kwoosi n'akwemalira yeeng'ene daawe. Yino niyo engeri yohoyeremo ohukeraaniaanga emirimo ky'Abaleefi.”