Ohubala 6 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Amalako k'abaandu beeholeramo Abanasareeti

¹ Omwaami yalagira Musa

² ohuberesa abaandu ba Yisiraeli ebilagiro bino. Abasaacha boosi oba abahasi boosi abahola esichubo sikabuhaaneho ohweehola abanasareeti mani beyaanayo abeene eyiri Omwaami

³ baba bahoyere ohusira efiini neende amalwa. Haba sibahoyeere ohung'wa esyohung'wa syoosi esyaholwa mu misabbiibbu oba ohulya emisabbiibbu kyoosi, emibisi oba emyoomu.

⁴ Nibasisiiri hu sichubo syaabwe koti abanasareeti, sibahoyeere ohulyaaho esiindu syoosi esitula mu misabbiibbu, kata sa emwo oba amoola k'emisabbiibbu.

⁵ Nibasisiiri hu sichubo syaabwe koti abanasareeti, sibahoyeere ohubekaangaho efwiiri oba ohuhehetaangaho. Baba nibaboywa neende esichubo sy'endaalo choosi bati beyaanayo eyiri Omwaami, mani bachia ohuleha efwiiri lyaabwe lihula.

⁶ Endaalo choosi chaaba niyeetusa yeyira eyiri Omwaami haba saaba n'ahoyere ohuchichaanga eyiri omulaambo kwoosi daawe.

⁷ Kata kwahaba okwa laatang'ene, oba okwa ng'ina, oba okwa mwaanang'ina, oba okwa mboochoong'ene, kata nibafwa, haba saachia ohwebaha omukwoobo; olwohuba ohweyaanayo hwae eyiri Nasaae biri hu mutwe kwae omweene.

⁸ Nibaba nibali abanasareeti, baba beyaanayo eyiri Omwaami.

⁹ Nae efwiiri ly'omunasareeti nilibahwa omukwoobo, olwohuba omusaacha oyo oba omuhasi oyo ali aambi muno neende omuundu ofwiire esibwaatuhira, baba bahoyere ohuliindaanga endaalo chitaanu-na-chibiri hu beebekaho efwiiri lyaabwe; hu banyale ohweehola abataaliho omukwoobo ohweema hu muduunga koti lu kudaha.

¹⁰ Hu ludaalo lwa hataanu-na-hadatu baleete amabburuuku kabiri oba amaguugu kabiri eyiri omulaamisi ena mulyaango kw'Eyeema ly'Ohubaao hw'Omwaami.

¹¹ Omulaamisii aba achia ohuyaanayo lala koti esiyaanwa sy'esyonoono nae eliindi koti esiyaanwa sisaambwa syaakwa ekohe, ohubaholera omuduunga kw'ohulabiswa, hulw'ohwegeeng'a hwaabwe hu mulaambo. Hu ludaalo lweene olwo, nilwo lu baba nibachia ohulabisiryaho efwiiri lyaabwe

¹² neende ohuyaanayo ebiha byaabwe eyiri Omwaami koti abanasareeti. Ebiha biba nibyamala ohubitao haba sibiba nibisiibalibwa daawe, olwohuba efwiiri lyaabwe liba nilyali nilyalabiswa, liba nilyamala ohubahwaho omukwoobo. Nae koti esiyaanwa sy'ohutuunga ekobi, bahoyere ohuleeta ekoondi yere ely'omwaaka mulala kwoong'ene.

¹³ Mani abanasareeti nibamala ohwooseresa ebichubo byaabwe, baba bachia ohuhola omuduunga kuno. Baba banachia ena mulyaango kw'Eyeema

¹⁴ bayaane eyiri Omwaami, ebyaayo bidatu ebibulaho obufwoolwa bwoosi daawe: ekoondi yere lala ehole ely'omwaaka mulala hulw'esiyaanwa sy'ohusaambwa sikwe ekohe, ekoondi yere lala ehasi ely'omwaaka mulala hulw'esiyaanwa sy'esyonoono, haandi neende ekoondi emiiku lala hulw'esiyaanwa sy'ohukobola alala.

¹⁵ Haandi baba bachia ohuyaanayo esimweero esilaamba esy'emigaati kideeherwe nikitaalimo emera: emigaati mihomefu ekideeherwe mu busye bukaandiirwe alala neende amafuta k'enaasi neende ebibbisikuuti ebibahirweengeho amafuta k'enaasi, haandi ohumeedaho neende ebiyaanwa bidahibwa eby'emere neende efiini.

¹⁶ Omulaamisi aba achia ohuyaana bino byoosi eyiri Omwaami, mani amala ayaane esiyaanwa sy'esyonoono, haandi neende esiyaanwa sy'ohusaambwa sikwe ekohe.

¹⁷ Ahoyere ohuyaana ekoondi emiiku eyiri Omwaami, koti esiyaanwa sy'ohukobola alala, haandi asiyaanire alala neende esimweero sy'emigaati; haandi hu yeemeo ayaaneyo ebiyaanwa by'emere neende efiini.

¹⁸ Nae hu mulyaangiro kweene okw'Eyeema, ao niwo yi munasareeti aba achia ohubekeraho efwiiri lyae lyoosi, mani amale alite hu muliro ohuli ohusaambirwa esiyaanwa sy'ohukobola alala.

¹⁹ Bulaanu, oluliho lw'ekoondi miiku niluba nilumalire ohudeehwa, omulaamisi aba achia ohulubukula alute, niluliho omugaati mulala kutabbaahirwe, neende bbisikuuti silala ohutula mu simweero, mu mahono k'omunasareeti.

²⁰ Ohuloondyaho, omulaamisi oyo haandi aba achia ohubiyaanayo byoosi eyiri Omwaami koti esiyaanwa sy'enjaulo; bino biba biri esiyaanwa silafu esy'omulaamisi, ohumeeda hu sigwoogwo neende esinama sy'ekoondi miiku elyo, ohweema hu malako ebiba nibiri eby'omulaamisi oyo. Ebyo nibiba nibiweere, omunasareeti oyo aba bulaanu anyala ohung'waaho hu fiini.

²¹ Bino nibyo ebilagiro bidiira hu banasareeti; nae nikali mbwe omunasareeti mweene yeeyamire ohuyaana ebihiraho bi sichubo syae siboola siti ahoyere ohuyaana, aba ahoyere ohwooseresa esisuubise syaaba naaholere.

Ehabi y'obulaamisi

²² Omwaami yalagira Musa

²³ ohuboolera Arooni neende abaana bae ohwehoonyeraanga emboosi mu huberesaanga ehabi abaandu ba Yisiraeli:

²⁴ Omwaami ahoya yaababeresa ehabi, haandi neende ohubaliinda;

²⁵ Omwaami ahoya yaabakwiira esisa haandi yaabaholera eby'esiroonyo;

²⁶ Omwaami ahoya yaabakwiira esisa haandi yaababeresa omuleembe.

²⁷ Mani Omwaami yeecha n'aboola ati, “Nibachia ohutuumbulaanga eliita lyaange ohuba ehabi eyiri abaandu ba Yisiraeli, mba njia ohubaberesaanga ehabi.”