Ohubala 28 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ebiyaanwa byatekehwa mu biha byabyo

¹ Omwaami yalagira Musa

² ohweekesa Abaisiraeli ohuyiraanga eyiri Nasaae, mu biha byadoolwa ebiyaanwa by'ebyohulya ebimusangaasa.

³ Mani bino nibyo ebiyaanwa by'ebyohulya ebihoyeere ohuyirwaanga eyiri Omwaami: hulw'esiyaanwa sisaambe sya buli ludaalo ni, amakoondi kabiri amayere amasaacha k'omwaaka mulala okw'obuhuluundu, akabulaho obufwoolwa bwoosi.

⁴ Yaanayo ekoondi litaangira echuli, nae elya habiri engoloobe,

⁵ buli litula alala neende esiyaanwa sy'emere esy'ekiloguraamu ndala ey'obusye, osasaanie neende elita ndala y'amafuta k'enaasi kahiramo obulai.

⁶ Sino nisyo esiyaanwa sya buli buhya esisaambwa syaakwa ekohe, esyataangira ohuyaanwa hu Lugulu Sinai koti esiyaanwa sy'ebyohulya, esaami yisangaasa eyiri Omwaami.

⁷ Nae koti esiyaanwa sy'efiini, alala neende ekoondi yere elitaangira, chuhaanga hu alutaari elita ndala efiini.

⁸ Engoloobe, yanaanga ekoondi doto elya habiri, mu ngira nasilala neende esiyaanwa sy'echuli, alala neende esiyaanwa sy'efiini syasyo. Esyeene sino syosi ni esiyaanwa sy'ebyohulya, esaami yisangaasa Omwaami.

Esiyaanwa sya Sabbaato

⁹ Hu ludaalo lwa Sabbaato, yaanaanga amakoondi kabiri amayere masaacha ak'omwaaka mulala akataaliho obufwoolwa bwoosi, ekiloguraamu chibiri ech'obusye echi sasaaniiswe neende amafuta k'enaasi koti esiyaanwa sy'emere, haandi neende esiyaanwa sy'efiini.

¹⁰ Esiyaanwa sisaambe sino sihoyeere ohuyaanwaangwa buli ludaalo lwa Sabbaato ohumeeda hu siyaanwa sya buli buhya neende siyaanwa sy'efiini syahwo.

Esiyaanwa sy'oludaalo lutaangira mu mwoosi

¹¹ Yiraanga esiyaanwa sisaambe eyiri Omwaami muhuchaaka hwa buli mwoosi: eng'oombe surusi njere chibiri, ekoondi emiiku lala, amakoondi mayere masaacha kataanu-na-kabiri ak'omwaaka mulala okw'obuhuluundu, byoosi ebibulaho obufwoolwa bwoosi.

¹² Nae koti esiyaanwa sy'emere, yaanaanga obusye busasaaniiswe neende amafuta k'enaasi: alala neende buli ng'oombe surusi ndala, ekiloguraamu chidatu ech'obusye; nae alala neende ekoondi emiiku, ekiloguraamu chibiri;

¹³ nae alala neende buli ekoondi yere, ekiloguraamu ndala. Ebiyaanwa bisaambe bino ni, ebiyaanwa by'ebyohulya nibyo, esaami yisangaasa Omwaami.

¹⁴ Esiyaanwa sihoyera esy'efiini nisyo elita chibiri ech'efiini neende buli ng'oombe surusi, elita ndala neende esituundu, neende buli koondi emiiku, nae elita ndala neende buli koondi doto. Sino nisyo esilagiro sy'esiyaanwa sisaambe, esy'oludaalo lutaangira olwa buli mwoosi, ohumalaho omwaaka kwoosi.

¹⁵ Nae haandi ohumeeda hu siyaanwa sisaambe sya buli ludaalo alala neende esiyaanwa sy'efiini syasyo, yanaanga embusi ehole ndala koti esiyaanwa sy'esyonoono.

Ebiyaanwa biba hu Sidyaalo sy'emigaati ky'obusye butaabbaahirwe

¹⁶ Esidyaalo sya Paasaka ohwiisa oluyaali mu Omwaami kuhoyere ohuholwaanga hu ludaalo lw'ehumi-na-hane lw'omwoosi kutaangira.

¹⁷ Hu ludaalo lw'ehumi-na-hataanu, omuholo kw'ediini nilwo lu kuchaakiraho okuba kuchia ohumala endaalo chitaanu-na-chibiri.

¹⁸ Hu ludaalo lutaangira lw'esidyaalo, nilwo lu muhoyere ohwebuusiraho alala ohusaba Nasaae, mani aba abulao omulimo kwoosi okuholwa.

¹⁹ Yaanayo esiyaanwa sisaambe koti esiyaanwa sy'ebyohulya eyiri Omwaami: eng'oombe esurusi chibiri enjere, ekoondi emiiku lala, neende amakoondi mayere masaacha kataanu-na-kabiri, ak'omwaaka mulala obuhuluundu, byoosi nga haba sibiriho obufwoolwa bwoosi.

²⁰ Yanaanga busiyaanwa sy'emere sihoyera, esy'obusye sasaaniiswe neende amafuta k'enaasi: ekiloguraamu chidatu hu buli surusi, ekiloguraamu chibiri neende ekoondi miiku lala,

²¹ neende ekiloguraamu ndala neende buli koondi yere.

²² Haandi, yaanaanga embusi hole ndala koti esiyaanwa sy'esyonoono, mani mu ngira yino, oholeenge omuduunga kw'ohulabisibwa hulw'abaandu boosi.

²³ Yanaanga bino byoosi ohumeeda hu biyaanwa bisaambe bya buli chuli ebyateebwao.

²⁴ Mani mu ngira nasilala yino, ohumala endaalo chitaanu-na-chibiri, yaneenge eyiri Omwaami, esiyaanwa sy'ebyohulya, esaami yimusangaasa. Yanaanga sino ohumeeda hu biyaanwa bisaambe bya buli ludaalo haandi neende esiyaanwa sy'efiini.

²⁵ Nimumala mutyo, bulaanu bukaananeenge alala hu ludaalo lwa hataanu-na-habiri, muhayeenge ohuholaho omulimo kwoosi daawe.

Ebiyaanwa bibaao hu sidyaalo sy'Ekesa

²⁶ Hu ludaalo lutaangira olw'Esidyaalo sy'Ekesa, nimuyira esiyaanwa sy'emere njaaha eyiri Omwaami, muhoyere ohwebusaanga alala ohwekongooya Omwaami, mani abulao omulimo kwoosi okuholwa.

²⁷ Yaneenge siyaanwa sisaambe koti esaami yisangaasa Omwaami: eng'oombe surusi chibiri enjere, ekoondi emiiku lala, haandi neende amakoondi mayere masaacha kataanu-na-kabiri ak'omwaaka mulala okw'obuhuluundu, byoosi ebibulaho obufwoolwa.

²⁸ Yanaanga esiyaanwa sy'emere sihoyera esy'obusye busasaaniiswe neende amafuta k'enaasi: ekiloguraamu chidatu hu buli surusi, ekiloguraamu chibiri neende ekoondi miiku lala,

²⁹ neende ekiloguraamu ndala neende buli koondi yere.

³⁰ Haandi yanaanga embusi hole ndala koti esiyaanwa sy'esyonoono, mani mu ngira yino, oba ochia ohuba nooholere omuduunga kw'ohulabisibwa hulw'abaandu.

³¹ Yanaanga bino byoosi, alala neende esiyaanwa sy'efiini, ohumeeda hu siyaanwa sisaambe esya buli ludaalo, neende esiyaanwa sy'emere.