Ohubala 25 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abaandu ba Yisiraeli nibali Peyori

¹ Abaisiraeli nibali nibateere ekaambi yaabwe mu hoondo y'Akasia, abasaacha bachaaka ohuyirana neende abahasi ba Moabbu abali ebweene eyo.

² Abahasi bano babalangaanga hu bidyaalo by'ebiyaanwa, yi nasaae w'Abamoabbu yenamirwaanga. Abaisiraeli balichaanga ebyohulya haandi beenamira neende nasaae mweene oyo

³ Bbaali wa Peyori. Omwaami yabanyoolerera

⁴ yaboolera Musa ati, “Bukula abeemirisi boosi aba Yisiraeli mani, nimuunjisiremo oluyaali, mubeete esideete ng'alang'ala, mani ao bulaanu ese haba siimba niinjia ohwemeeda ninyoolereere abaandu bano.”

⁵ Musa yaboolera abahoongo abo ati, “Buli otula hweeng'we achia ohwitaanga buli musaacha oli mu nono yae oweehola omwiinamiri wa Bbaali wa Peyori.”

⁶ Mulala hu Baisiraeli yabukula omuhasi Omumidia yamwiingisa mu yeema lyae mu moni wa Musa neende abaandu boosi, nibali ohuliriraanga aambi neende omulyaango kw'Eyeema ly'Ohubaao hw'Omwaami.

⁷ Finehaasi, omwaana wa Eliasaari haandi omwiichuhulu wa Arooni omulaamisi, yabona sino, yasiingira mani yaatula mu muhung'aano. Yabukula efumo,

⁸ mani yaloonda hu musaacha oyo, neende omuhasi oyo, mu yeema mani naabisa efumo elyo mu baandu abo boombi. Mu ngira yino yiti, oluumbe lwali niluli ohusihirisa Yisiraeli lwaakama,

⁹ nae lwali nilumalire ohwiita abaandu elifu amahumi kabiri neende chine, (24,000).

¹⁰ Omwaami yeecha yaboolera Musa ati,

¹¹ Hulw'esiholwa si Finehaasi aholere, sisisiiri omunyoolefu neende abaandu ba Yisiraeli. Ahayiire elalira ohwesimiirisira ohwiinamira nasaae wuundi ohutusaho ese, mani sakira haba simbasihiriise neende etima lyaange.

¹² Sakira omuboolere oti, ndi ohuhola nae endagaano eyichia ohubaao endaalo choosi echiicha.

¹³ Omweene oyo neende abeechuhulu bae bamalire ohwiihaswa koti abalaamisi b'olubeerera, olwohuba haba siyesimirisiire owundekeraaniaho, yaleetao obuleheri hulw'esyonoono sy'abaandu.

¹⁴ Eliita ly'Omuisiraeli weetwa neende omuhasi Mumidia lyali “Simuri” omwaana wa Salu, omwiimirisi w'edaala liindi mu nono ya Simeoni.

¹⁵ Eliita ly'omuhasi lyali “Kosibbi.” Suuri, laatang'ene, yali omwaami w'omukaanda kuundi okw'enono kw'Abamidia.

¹⁶ Omwaami yaalagira Musa ati,

¹⁷ Seeta Abamidia mani obasihirise,

¹⁸ hulw'esyonoono si bahuholera nibahubachirisa nimuli Peyori, neende olwa Kosibbi, oweeterwa mu siha sy'oluumbe lwali Peyori.