Ohubala 23 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Bbalamu yaboolera Bbalaki ati, “Nyombahire ano alutaari chitaanu-na-chibiri mani wundeetere eng'oombe surusi chosi chitaanu-na-chibiri haandi neende amakoondi mamiiku kataanu-na-kabiri.”

² Bbalaki yahola koti lu yali naboleerwe, mani omweene oyo alala neende Bbalamu boombi bayaanira hu buli alutaari eng'oombe surusi ndala, haandi neende ekoondi miiku lala.

³ Bulaanu Bbalamu yaboolera Bbalaki ati, “Yema ano aambi neende esiyaanwa syao sisaambirwe syaakwa ekohe, naange niinjia ohubona oba Omwaami achia ohumbukaana, oba haba. Njia ohuhuboolera buli siindu syaacha ohumbwiihulira.” Mani yeeng'ene yaniina yaachia aakulu w'esigulu,

⁴ mani Nasaae yabukaanana nae. Bbalamu yaboolera Omwaami ati, “Malire ohwoombaha alutaari chitaanu-na-chibiri, haandi neende ohuyaana hu buli alutaari, eng'oombe surusi ndala neende ekoondi miiku lala.”

⁵ Omwaami yaboolera Bbalamu sy'ahoyere ohuchia ohuboola, mani n'amulehuula akoboleyo eyiri Bbalaki ohumuberesa ehuwa lyae.

⁶ Kata katyo, Bbalamu yakobolayo yanyoola sa Bbalaki n'asyeemere aambi neende esiyaanwa syae sisaambe, alala neende abeemirisi ba Moabbu boosi.

⁷ Bbalamu bulaanu yachaaka ohutuumbula obunabbi bwae ati: “Bbalaki omutuki wa Moabbu yandeetere Ohutula Siria, ohutula muungulu ch'ebukwe Aboolere ati, ‘Yiicha wuunomanomereho.’ ‘Bwaaba abaandu ba Yisiraeli’

⁸ Nyala endye ohubwaaba abaandu ba Nasaae atabwaabire, ohulomaloma hu mudibo Omwaami n'atakulomaloomeho?

⁹ Ohutula hu nyanda ndeeyi, nyala ndaababona sa; Nyala ohubabaliira ohutulira mu bigulu. Syaalo syamenya syoong'ene nisyo; Abeene bamanyire bati bali neende ehabi ohuhiraho ebyaalo biindi.

¹⁰ Abeechuhulu ba Yisiraeli bali koti olufu Babitiirifu nibo, haba sibabaliha daawe. Leha ese maliirise endaalo chaange koti mulala hu baandu ba Nasaae; Leha ese fwiire mu muleembe koti omuluungifu.”

¹¹ Ao bulaanu Bbalaki yaboolera Bbalamu ati, “Siina syeene sino si wuholeere? Ese huleetere ano ohubwaaba abasuku baange, nae syooli ohuholaanga syoong'ene siri mbwe ohuberesaanga ehabi.”

¹² Nae yakobolamo ati, “Ese mboola ebyo byoong'ene bi Omwaami aba niyamboleere ohuboola.”

Obunabbi bwa Bbalamu bwoohubiri

¹³ Bbalaki yaboolera Bbalamu ati, “Ewe yicha ochie naange abuundu waandi, yoonyala ohuboneraho Abaisiraeli badiidi boong'ene. Ao niwo abuundu yooba noochia ohubabwaabirawo.”

¹⁴ Yamuyira mu sipaapi sya Sofimu aakulu w'Oluguru Pisiga. Eyo yosi yoombahayo alutaari chitaanu-na-chibiri haandi n'ayaanira hu buli alutaari, eng'oombe esurusi, neende ekoondi emiiku.

¹⁵ Bulaanu Bbalamu yaboolera Bbalaki ati, “Ewe yiicha weeme ano, aambi neende esiyaanwa syao sisaambwa syaakwa ekohe, naange njie mbukaananire neende Nasaae era.”

¹⁶ Omwaami yabukaanana neende Bbalamu, mani yaamuboolera byaahoyere ohuchia ohuboola, yaamala yaamukobosa enyuma eyiri Bbalaki ohumudiisa emboosi chae.

¹⁷ Kata katyo, yakobolayo, yakaana Bbalaki n'asyeemere aambi neende esiyaanwa syae sisaambwa syaakwa ekohe, alala neende abeemirisi ba Moabbu. Bbalaki yateeba esiindu si Omwaami yali n'aboolere,

¹⁸ mani Bbalamu yeecha yachaaka ohutuumbula obunabbi buno ati: “Ewe yicha, Bbalaki omwaana wa Sipori, Mani omale otekeerese bi njia ohuboola.

¹⁹ Nasaae haba saali koti abaandu babacha; Haba saali omuundu okaluuhanianga ebibaaso byae. Buli siasuubisa, asiholaanga; Alomalomaanga, mani siholehana.

²⁰ Mbeere ndagiriirwe ohuberesa ehabi, Nasaae haandi yamberesa ehabi, ese haba siinyala ohukweekobosera.

²¹ Ese ndi ohubona mu moni endi, obulamu bwa Yisiraeli bwiicha mu moni haba sibuchia ohuyireetera ehabi oba ebidinyu. Omwaami Nasaae waabwe ali nabo; Balaangiriraanga bati mbwe niye omutuki waabwe.

²² Nasaae yabatusa mu Misiri; mani yabalwaaniliraanga koti eng'oombe ndaawu endalu.

²³ Yibulao amalesi k'amayia, kata sa amalesi kaloka, akanyala ohwehoonyerwa ohulwaania esyaalo sya Yisiraeli. Bulaanu abaandu ohuchaaka ohulomalomaanga hu Yisiraeli bati, ‘Bonaho ebiindu bi Nasaae aholere!’

²⁴ Esyaalo sya Yisiraeli siri koti edalang'i hoongo muno: Haba siyiwuluuha niyitaataandula haandi yefwoonyera, Ohwoola lu yimala ohung'wa amabaanga k'ebyo bi yiba niyiitire.”

²⁵ Bulaanu Bbalaki yaboolera Bbalamu ati, “Ewe otabwaaba abaandu ba Yisiraeli, nae mani otababeresa ehabi!”

²⁶ Nae Bbalamu yamukobolamo ati, “Ese haba sihuboleere endi, ese hoyeere ohuhola buli siindu si Omwaami yamboleere?”

Obunabbi bwa Bbalamu bwoohudatu

²⁷ Bbalaki haandi yaboola ati ewe yicha huchie, mani huyire abuundu waandi. Awuundi Nasaae ananyala ohuba n'adaha ohuhufukiirira ohubabwaaba hulwaange nimuli eyo.

²⁸ Mani atyo, yabukula Bbalamu yamuyira aakulu woolugulu Peyori olusibiraane neende esiparara esyo.

²⁹ Bbalamu nae yaamuboolera ati, “Chia wunyoombahire ano alutaari chitaanu-na-chibiri mani wundeetere eng'oombe esurusi chitaanu-na-chibiri, haandi neende amakoondi mamiiku kataanu-na-kabiri.”

³⁰ Bbalaki haandi yahola koti lu yali n'aboleerwe, haandi n'ayaanira hu buli alutaari, eng'oombe surusi ndala, neende ekoondi emiiku lala.