Ohubala 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Endekeha y'enono mu kaambi

¹ Omwaami yaberesa Musa neende Arooni, ebilagiro bino biti.

² Abaisiraeli niboombaha ekaambi, buli musaacha achia ohubechaanga aasi w'eliita ly'omukaanda kwae, haandi neende aasi w'ebbeendera y'enyuumba yae yeene. Ekaambi yino yihoyeere ohwoombahwa niyibodoohana Eyeema.

³ Mani abo abahoyeere ohwoombahira ebukwe eyitingaalire ebukwe, bahoyeere ohuba nibali hu sikero sy'ekaambi ya Yuda, mu mikaanda kyaabwe, omwiimirisi w'abaandu ba Yuda naali Nahasoni omwaana w'Aminadaabbu,

⁴ amaye kae nga kabalirwe ohwoola elifu amahumi kataanu-na-kabiri neende emia chisaasaba (70,600).

⁵ Abo abahoyere ohwoombaha nibamuloondaho bahoyere ohuba ab'enyuumba ya Yisakari, omwiimirisi w'abaandu ba Yisakari naali Netaneeli omwaana wa Suari,

⁶ amaye kae nga kabalibwa ohwoola elifu amahumi kataanu neende chine neende emia chine (54,400).

⁷ Mani ohuloondyaho enyuumba ya Sebbulooni, omwiimirisi w'abaandu ba Sabbulooni naali Eliabbu omwaana wa Heloni,

⁸ amaye kae nga kabalibwa ohwoola elifu amahumi kataanu neende chitaanu-na-chibiri neende emia chine (57,400).

⁹ Mani obuungi bwoosi alala obw'abaandu bali mu kaambi ya Yuda, ohweema hu mikaanda kyao, buhoyere ohuba elifu emia ndala neende amahumi kataanu-na-kadatu neende chisaasaba, neende emia chine (186,400). Bano nibo abahoyere ohutaangiramo nibakeenda nibahuumba.

¹⁰ “Nae ohutulira emwaalo, yihoyeere ohubaayo esikero sy'ekaambi ya Rubbeeni mu mikaanda kyayo, omwiimirisi w'abaandu ba Rubbeeni naali Elisuuri omwaana wa Sedewuri,

¹¹ amaye kae nikabalibwa ohwoola elifu amahumi kane neende chisaasaba neende emia chitaanu (46,500).

¹² Nae abo abahoyere ohwoombaha nibamuloondyaho bahoyere ohuba ab'enyuumba ya Simeoni, omwiimirisi w'abaandu ba Simeoni naali, Selumieli omwaana wa Surisadai,

¹³ amaye kae nga kabalibwa ohwoola, elifu amahumi kataanu, chitaanu-na-chine neende emia chidatu (59,300).

¹⁴ Mani ohuloondyaho enyuumba ya Gaadi, omwiimirisi w'abaandu ba Gaadi naali Eliasafu omwaana wa Reweli,

¹⁵ amaye kae nga kabalwa ohwoola elifu amahumi kane neende chitaanu, emia chisaasaba, neende amahumi kataanu (45,650).

¹⁶ Obuungi bwoosi obw'ekaambi ya Rubbeeni, mu mikaanda kyaabwe, yihoyeere ohuba elifu emia ndala neende amahumi kataanu neende ndala, emia chine neende amahumi kataanu (151,450). Bano bahoyere ohuba aboohubiri ohutula.

¹⁷ “Mani bulaanu, akatikaati w'emikaanda kibiri kitaangira kino, neende kibiri kiheneerehayo, niwo yi Baleefi bachia ohuhuumbiraanga nibakiingire Eyeema lino. Buli mukaanda kuchia ohuhumbaanga mu tekeha yikwombahiramo ekaambi yakwo, buli kutula nikuli aasi w'ebbeendera yakwo.

¹⁸ “Ohutulira emuumbo, yihoyeere ohubaayo esikero sy'ekaambi ya Efuraimu mu mikaanda kyaabwe, omwiimirisi w'abaandu ba Efuraimu naali Elisaama omwaana w'Amihudi,

¹⁹ amaye kae nga kabalwa ohwoola elifu amahumi kane neende emia chitaanu (40,500).

²⁰ Mani abamuloondaho bachia ohuba enyuumba ya Manaase, omwiimirisi w'abaandu ba Manaase naali Gamalieli omwaana wa Pedahisuri,

²¹ amaye kae nikabalwa ohwoola elifu amahumi kadatu-na-chibiri neende emia chibiri (32,200).

²² Mani ohuloondyaho enyuumba ya Bbenjamini, omwiimirisi w'abaandu ba Bbenjamini naali Abbidaani omwaana wa Gideoni,

²³ amaye kae nga kabalwa ohwoola elifu amahumi kadatu neende chitaanu neende emia chine (35,400).

²⁴ Obuungi bwoosi obw'ekaambi ya Efuraimu, mu mikaanda kyaabwe, bwali elifu emia ndala neende chitaanu-na-chidatu, neende emia ndala (108,100). Bano bachia ohuba aboohudatu ohuchia ohuhuumba.

²⁵ “Ohutulira emukulu, yihoyeere ohubaayo esikero sy'ekaambi ya Daani, mu mikaanda kyayo, omwiimirisi w'abaandu ba Daani naali Ahieseeri, omwaana wa Amisadaayi,

²⁶ amaye kae nikabalwa ohwoola elifu amahumi kasaasaba neende chibiri, neende emia chitaanu-na-chibiri (62,700).

²⁷ Nae abo abahoyere ohwoombaha nibamuloondaho nibo enyuumba y'Aseri, omwiimirisi w'abaandu ba Aseri naali Pagieli omwaana w'Okirani,

²⁸ amaye kae nikabalwa ohwoola elifu amahumi kane neende ndala, neende emia chitaanu (41,500).

²⁹ Mani ohuloondaho ni enyuumba ya Nafutaali, omwiimirisi w'abaandu ba Nafutaali naali Ahira omwaana wa Enani,

³⁰ amaye kae nikabalwa ohwoola elifu amahumi kataanu neende chidatu neende emia chine (53,400).

³¹ Obuhoongo bwoosi obw'ekaambi ya Daani bwali elifu emia ndala neende amahumi kataanu neende chitaanu-na-chibiri, neende emia chisaasaba (157,600). Bano nibo abahoyere ohumaliiriha ohutula ohuchia ohuhuumba, koti lu buli sikero siri.”

³² Mani obuungi bwoosi alala obw'abaandu ba Yisiraeli abeyandiikisiraanga mu mikaanda, buli mukaanda kwoong'ene, bwali obwoola elifu emia chisaasaba neende chidatu, neende emia chitaanu neende amahumi kataanu (603,550).

³³ Mani koti sa lu Omwaami yali n'alagiire Musa, Abaleefi haba sibabalirwa alala neende abaandu ba Yisiraeli baandi.

³⁴ Mani abaandu ba Yisiraeli bahola buli siindu si Omwaami yali n'alagiire Musa. Beecha boombaha ekaambi, buli muundu naali aasi w'ebbeendera yae, mani nibeecha nibahuumba, buli otula naali mu luyia lwae lweene.