Ohubala 17 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Endabuhi y'Arooni

¹ Omwaami haandi yaboolera Musa ati,

² “Boolera abaandu ba Yisiraeli bahuberese esaala ehumi neende chibiri, lulala ohutulaanga hu buli mwiimirisi wa buli nono. Yandiika eliita lya buli musaacha hu lusaala lwae

³ mani haandi wandiike eliita ly'Arooni hu lusaala luhiihirira Leefi. Yiba yichia ohubaao buli lusaala lulala hulwabuli mwiimirisi w'enono mulala.

⁴ Bulaanu chia ochibukule ochiyire ochiingise mu Yeema ly'Ohubaao hwaange, mani ochite mu moni w'Esanduuku ly'Endagaano, yi mbukaananiraanga naawe.

⁵ Mani olusaala lw'omusaacha oyo yi mba nindoolere nilwo oluchia ohusebuha. Mani mu ngira yino nimwo yi njia ohwaakamisira ohuhwekanyiirisa huhayiireo huno ohw'Abaisiraeli bano.”

⁶ Musa yaboolera Abaisiraeli, buli mulala hu beemirisi baabwe yeechaanga naamuberesa olusaala lulala, hulwabuli enono, choosi choola ehumi neende chibiri alala, mani olusaala lw'Arooni lwosi lwateebwa alala nachio.

⁷ Musa bulaanu yata esaala echio choosi mu Yeema, mu moni w'Esanduuku ly'Endagaano.

⁸ Hu ludaalo lwaloondaho, Musa niyeengira mu Yeema, yabona ati, olusaala lw'Arooni, olwali niluhiihirira enono ya Leefi, nilwo olwali nilusebuuhe. Lwali nilumalire ohwaama ebimuli, ebimuli nibimalire ohumuliha, haandi nilumalire ohweengya ebyaamo by'alumoondi!

⁹ Bulaanu Musa yabukula esaala echio choosi, mani nachiekesa Abaisiraeli boosi. Boosi mani baabona esyo esyali nisiholehaane, mani buli mwiimirisi yaabukulaanga olusaala lwae naalwekobosera.

¹⁰ Omwaami bulaanu yaboolera Musa ati, “Bukula olusaala lw'Arooni olwo, olukoboseyo olute mu moni w'Esanduuku ly'Endagaano. Luhoyeere ohuliindwa lubeeo ohulabulaanga Abaisiraeli bahayuha mbwe bachia ohufwa sa ohwekanyiirisa hwaabwe nihutaakama.”

¹¹ Musa yahola sa koti lu Omwaami yalagira.

¹² Abaandu ba Yisiraeli baboolera Musa bati, “Ngandi mani eyo niyo enjakamo yeefwe!

¹³ Nikali mbwe oyo yeesi osudaho aambi neende Eyeema aba achia ohufwa sa, mani efwe fweesi huli sa koti abamala ohufwa hale!”