Ohubala 15 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Amalako kadiira hu huyaana

¹ Omwaami yaberesa Musa

² ebilagiro biloondaho bino hulw'abaandu ba Yisiraeli ohuloondaanga nibali mu syaalo si yali n'achia ohubaberesa.

³ Eng'oombe surusi, ekoondi miiku, ekoondi dwaasi, oba embusi, binyala ohuyirwa eyiri Omwaami koti esiyaanwa sisaambwa syaakwa ekohe, oba koti esiyaanwa ohwooseresa esichubo syoosi, oba koti esiyaanwa sy'ohweyaanayo sa omweene, oba koti esiyaanwa hu muholo kw'esidyaalo kwa buli buhya; esaami y'ebiyaanwa y'ebyohulya bino yisangaasa Omwaami.

⁴ Mani oyo yeesi oleeta esiyaanwa syae aba ahoyere haandi neende ohuyaanira Omwaami silala sy'ehumi sy'ekiloguraamu y'obusye bubunyuhe, obusasaanire neende elita ndala y'amafuta k'enaasi koti esiyaanwa sy'emere;

⁵ haandi neende elita ndala y'efiini koti esiyaanwa sy'esyohung'wa byaaba achia ohutekehera alala neende esiyaanwa sy'ohusaamba sikwe ekohe esyo, oba hulwabuli siyaanwa, buli ekoondi yere.

⁶ Ekoondi miiku niliri nilyo eliri ohuyaanwa, ekiloguraamu chibiri ech'obusye sasaaniiswe neende elita ndala neende esituundu esy'amafuta k'enaasi biba bihoyere byosi ohuyirwa koti esiyaanwa sy'emere,

⁷ alala neende elita ndala neende esituundu esy'efiini. Esaami y'ebiyaanwa bino yisangaasa Omwaami.

⁸ Nae eng'oombe surusi niyo eyiyaanwa eyiri Omwaami koti esiyaanwa sisaambwa syaakwa ekohe, oba koti esiyaanwa ohwooseresa esichubo, oba koti esiyaanwa sy'ohukobola alala,

⁹ esiyaanwa sy'emere esy'ekiloguraamu chidatu ech'obusye echisasaaniiswe neende elita chibiri ech'amafuta k'enaasi, biba byosi bihoyere ohuleetwa,

¹⁰ alala neende elita chibiri ech'efiini. Esaami y'esiyaanwa sino yisangaasa Omwaami.

¹¹ Esyo nisyo esichia ohuyaanirwaanga hu buli eng'oombe surusi, ekoondi emiiku, ekoondi edwaasi, oba embusi.

¹² Nikali mbwe ebyaayo bihira silala nibyo ebichia ohuyaanwa, esiyaanwa sichiiraho syoosi siba sihoyeerwe ohumeedwaho koti lu biba nibichiana.

¹³ Abaisiraeli beebulwa boosi, bahoyere ohuholaanga batyo nibaba nibayira esiyaanwa sy'ebyohulya, esaami yisangaasa Omwaami.

¹⁴ Nae nikali mbwe esiha siindi syoosi, sibao abateende baba nibabamenyamo, oba hulw'esiha sidiidi oba nibamenyera elalira mweeng'we, bosi baheengao ohuyaana esiyaanwa sy'esyohulya, esaami yisangaasa Omwaami, bosi bahoyere ohuloondakana neende ebilagiro byeene bino.

¹⁵ Hulw'endaalo choosi echiicha, amalako keene kano kachia ohuba niko akahola hweeng'we neende hu bateende baba nibabamenyamo. Eng'we neende abeene abo, mweesi mwaakanirira mu moni w'Omwaami;

¹⁶ amalako keene ako, neende ebilagiro byeene ebyo, byoosi bidiira sa hweeng'we haandi hu beene abo.

¹⁷ Omwaami yaberesa Musa

¹⁸ ebilagiro biloondaho bino, hulw'abaandu ba Yisiraeli ohuloondaanga nibali mu syaalo si yalola naachia ohubaberesa.

¹⁹ Esy'ohulya syoosi esirimirwe ebweene eyo sichia ohuba nisiriibwa, eyiindi hu yeene eyo yihoyeere ohukabulwaanga endulo, koti obuhoonyi bw'enjaulo eyiri Omwaami.

²⁰ Nimuba nimuhubba emigaati, omugaati kutaangira hu migaati kyaamberi, ekitula mu mere njaaha, kuhoyere ohuyirwayo koti obuhoonyi bw'enjaulo eyiri Omwaami. Kuno kwosi kuhoyere ohuyirwayo mu ngeri nasilala neende obuhoonyi bw'enjaulo bwoyiraanga ohutula hu ngaano njaaha noohubbaka.

²¹ Hulw'endaalo choosi echiicha mu moni, esiyaanwa sy'enjaulo sino sihoyeere ohubeereswaanga Omwaami ohutula hu migaati kyooba n'ohubbaanga.

²² Nae baasaho omuundu wuundi nae n'atachiiririre naahaywa ohwooseresa hu malako kaandi hu kano, k'Omwaami yaberesa Musa.

²³ Haandi baasaho oti mu ndaalo chiicha mu moni eyo, Abaisiraeli boosi boola ohuhaywa ohuholaanga buli siindu si Omwaami yalagira ohubitira mu Musa.

²⁴ Ohudoondobana huno nikali mbwe huleetwa neende obutamanya bw'abaandu bano boosi, baba bachia ohuyanaanga eng'oombe surusi koti esiyaanwa sisaambwa syaakwa ekohe, esaami yisangaasa Omwaami, alala neende esiyaanwa sy'emere sihoyera syeene, haandi neende esiyaanwa sy'efiini. Haandi mu humeeda ohwo, baba bahoyere ohuyaana embusi ehole koti esiyaanwa sy'esyonoono.

²⁵ Omulaamisi aba ahoyere ohuholera abaandu abo boosi omuduunga kw'ohulabya, mani hu banyale ohuleherwamo, olwohuba esisobyo esyo siba nisyali esitachiiririirwe daawe, haandi baba bamalire ohuleeta esiyaanwa syaabwe sy'esyonoono, koti esiyaanwa sy'ohulabisibwa eyiri Omwaami.

²⁶ Abaandu boosi aba Yisiraeli, neende abateende beene ababa nibabamenyamo, boosi baba bachia ohuba nibaleheerwemo, olwohuba buli muundu aba niyeyingisa mu sisobyo esyo.

²⁷ Nikali mbwe omuundu yeeng'ene yonoona n'atachiiririre, aba ahoyere ohuyaana embusi enjere ey'omwaaka mulala obuhuluundu, ehasi, ohuba koti esiyaanwa sy'esyonoono.

²⁸ Naali hu alutaari bweene, omulaamisi aba achia ohuholerayo omuduunga kw'ohulabiswa ohwoosa omuundu oyo ohutula hu syonoono syae, mani amale aleherwemo.

²⁹ Esilagiro nasilala syeene esyo, sidiira hu abo boosi abatachiirira ohwonoona, kata neende nibaba nibali abeebulanwa, oba abateende bamenyera elalira.

³⁰ Nae omuundu yeesi, ohola esyonoono n'achiiririira, kata neende n'aba ali omwiibulanwa, oba omuteende, aba aniere omusaango kw'ohuyira Omwaami neende esijaaro, mani aba ahoyere ohwiitwa sa,

³¹ olwohuba aba ahayire ebiindu bi Omwaami aba n'aboola, nihaandi aba amyeenere mani yaahalaka lala hu malako kae. Omweene aba yeleteere ohufwa hwae.

Omusaacha wahaya ohuhusa Sabbaato

³² Oludaalo luundi, Abaisiraeli nibali nibasisiiri mu sichiimi, omusaacha wuundi yanyoolwa naali ohuteenya eehwi hu ludaalo lwa Sabbaato.

³³ Yayirwa eyiri Musa, Arooni, alala neende abaandu boosi,

³⁴ mani yaaliindwa bulai muno, olwohuba syali nisitamanyihana esy'ohumuhola.

³⁵ Mani Omwaami yaboolera Musa ati, “Omusaacha oyo ahoyere ohuwiitwa sa; haandi abaandu boosi bahoyere ohumuhubbaho amakina afwe nibamutusire erwaanyi w'ekaambi.”

³⁶ Abaandu boosi baamubukula mani nibamutusa erwaanyi w'ekaambi, mani nibamala nibamuhubba amakina naafwa, koti lu Omwaami yali n'alagiire.

Amalako kadiira hu bifuundiho

³⁷ Omwaami yaalagira Musa

³⁸ ohuboolera abaandu ba Yisiraeli ati: “Hole ebifuundiho hu soonda ch'engubo cheeng'we, mani mutecheenge olusya lwa bbulu hu buli sifuundiho. Muchia ohuholaanga mutyo endaalo choosi echiicha.

³⁹ Ebifuundiho bino bichia ohuhola koti ebiichuliso, mani buli siha simuchia ohubibonaanga muchia ohwiichulisaanga amalako kaange koosi, mani mukosereseenge; haba simuchia ohunyala ohukaluuhanaanga nimuundulaho, nimuchia nimuloonda sa ebiindu bi mudaha haandi neende bi mwekoombaanga.

⁴⁰ Ebifuundiho bino bichia ohunyala ohubeechulisaanga ohwooseresaanga amalako kaange, mani hu munyale ohudoong'anga nimuli abaange syeeng'ene.

⁴¹ Ese niise Omwaami, Nasaae weeng'we; ndabatusa mu Misiri hu mbe Nasaae weeng'we. Ese niise Omwaami.”