Obbadia 1 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Buno nibwo obunabbi bu Obbadia yanyoola ohutula eyiri Omwaami Nasaae obudiira hu Edomu. Omwaami atumire wamwaanda wae eyiri ebyaalo, mani huwuliire emboosi yae yiboola yiti: “Eng'we mweetekehe! Lehe huchie huseete Edomu husilwaanie ebiita!”

Omwaami achia ohusaandya Edomu

² Omwaami aboolera Edomu ati: “Ese njia ohuhukatayasa; mani olekeereswe muno neende ebyaalo biindi.”

³ Ohwehuduumbasa hwao huhubachiriise. Wombaha esiko syao hu lwaanda lwoomu; edaala lyao liri aakulu mu ngulu, mani weteeba omweene oti: Wiina mweene owahanyale ohuunyanula ohutula eyo?

⁴ Kata owaheeyaniha aakulu koti eeswi, mani esiyu syao syaaba koti esiri mu ng'ining'ini, nae njia ohuhwaanulayo wiihe aasi.

⁵ Abeebi beecha esiro, bayiraanga ebiindu bi badaha byoong'ene. Abaandu nibanoka emisabbiibbu, baleheraangaho abamanani ekiindi. Nae ewe abasuku bao bahahusihirisire elalira.

⁶ Obuyiinda bw'abeechuhulu b'Esau buyaayirwe bwoosi.

⁷ Abo boosi bamwaholeraanga alala nabo bababachirisa sa, mani nibabeerusa ohutula mu syaalo syeeng'we. Abaandu bamwauliirisanianga nabo bulaanu babayingiire; Abeecha beeng'we bamwesikaanga nibo ababatekere omuteego. Babalomalomaho bati: “Eng'we mubulamo amakesi.”

⁸ Omwaami aboola ati: “Hu ludaalo olwo, ndahasihirise abaandu bakesi bomu Edomu, haandi abamanyihana bahawe hu lugulu lwa Esau.”

⁹ Mani abaandu balwaani b'amaani bomu Temani bahakweemo oluteengo, mani buli munamaye omulwaani yaheetwe.

Esifune sy'ohusaandya Edomu

¹⁰ Koti lu mwayaaya haandi mwetaanga abeeho beeng'we beene abo, ab'olwiibulo lwa Yakobbo, mwahasihiriswe sa, mani esoni chaabadiira endaalo choosi pe.

¹¹ Hu ludaalo lu basuku bafunakiraho enjiki chaabwe, eng'we mweema sa hu ndulo mwaawuleera. Mwesi mwali ababi koti bawalukeendwa abo, abanyaka ebiindu mu Yerusalemu mani nibabikabanamo.

¹² Nae eng'we haba simwahahoyere ohusangaalira oludaalo lu beeho beeng'we banyooleraho amasira. Haba simwahasangaalire olwohuba Abayudaaya banyoola ebidinyu hu ludaalo olwo. Simwahahoyeere ohubacheha nibali mu bidinyu daawe.

¹³ Mwali nimutahoyera ohwiingira mu siko sy'abaandu baange hu ludaalo lw'amasira kaabwe. Simwahahoyeere ohuyaaya ebiindu byaabwe hu ludaalo lw'amasira kaabwe olwo.

¹⁴ Mwali simuhoyeere ohweema sa hu masang'aangira nimudiira abo abali nibeeyonia. Eng'we haba simwali nimuhoyeere ohubakedaanga nimubokobosa eyiri abasuku baabwe hu ludaalo lwaabwe lw'amasira daawe.

Nasaae achia ohuheengera ebyaalo omusaango

¹⁵ “Oludaalo luli aambi ohwoola, lu Ese Omwaami njia ohuheengera ebyaalo byoosi omusaango. Ewe Edomu, esiindu si wahola, wesi sichia ohuhweeholaho. Ebiindu bi wahola byahahweeholeheho ewe omweene.

¹⁶ Olwohuba abaandu baange bamala ohung'weera hu lugulu lwaange lwoolerefu esikoombe silulu syohusaanda. Nae ebyaalo byoosi ebyebodoohaanie, bichia ohung'wechaanga esikoombe sihiramo obululu esy'ohusaanda; Byahasiinywe neende emisi mani byaasihirisirwa elalira.

Ohuyiingira hw'Abaisiraeli

¹⁷ Nae abaandu baandi bachia ohuwonera hu Lugulu lwa Siyooni, haandi bahabe aboolerefu. Mani ab'olwiibulo lwa Yakobbo baheekalusire esyaalo syaabwe syeene.

¹⁸ Ab'olwiibulo lwa Yakobbo neende ab'olwiibulo lwa Yosefu bahabe koti omuliro; mani bahasaambe ab'olwiibulo lwa Esau koti lu muliro kwahasaamba amasaanja. Bahabasaambe mani baabasihirisa, mani yibuleo ow'olwiibulo lwa Esau owahadoong'e naali omulamu.” Olwohuba Ese Omwaami Niise oboolere.

¹⁹ Abomu Negebbu, bahayire Olugulu lwa Esau, haandi abomu Sefela, bahayire esyaalo sy'Abafilisiti. Abaisiraeli bahayire esyaalo sy'Efuraimu neende Samaria. Abomu Bbenjamini, bahayire esyaalo sya Gileadi.

²⁰ Mani ab'Amaye ba Yisiraeli abayiingirirwa mu Haala bahakobole mani bawaambe Foenisia ohwoolera elalira Sarefaati. Haandi eye ly'abo abatula mu Yerusalemu, abayiingirirwa mu Saridiisi bahawaambe ebiko bya Negebbu.

²¹ Abahayiingire bahaniine hu Olugulu lwa Siyooni mani batuke Olugulu lwa Esau; mani obutuki buchia ohuba obw'Omwaami mweene.