Nehemia 7 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Mani bulaanu esida syali nisimalire ohwoombahwa buyaaha, ebiruwa byali byoosi nibimalire ohuteebwa mu bweyaango, nae abaliindi bomu Nyuumba ya Nasaae, neende abalichiingi balala hu beembi balafu, alala neende Abaleefi baandi bali nibamalire ohudiiswaanga emirimo kyaabwe.

² Ese ndali nindata abasaacha babiri mu bunyala bw'ohuhulira esiko sya Yerusalemu: Mwaanaama Hanani neende Hanania bali abeesikwa haandi abatiiririrwa ba Nasaae b'otakeraaniaho omuundu wuundi yeesi.

³ Ese n'dababoolera obutalehaanga ebiruwa bya Yerusalemu bidoong'a nibyahaaha echuli ohwoolera elalira elyuuba nilimalire ohutula, haandi neende ohubiikalaangao haandi nibisiirirwe, abaliindi nibatoola ohwiinuha hu mirimo engoloobe. Haandi ndali ni ndababoolera ohudoolaanga abaliindi ohutulaanga mu baandu bali nibamenyaanga mu Yerusalemu bweene sa, haandi ohuberesaanga abaandi hu beene abo obweyaango buhahabafu, nae abaandi ohwawulaanga abuundu ao oosi asiri aambi neende amayuumba kaabwe.

Olunyiriri lw'abo abakobola ohutula mu buwaambe

⁴ Yerusalemu syali esiko esitabaafu, nae abaandu haba sibali abaangi abali nibasimenyamo, haandi haba si amayuumba amaangi akalichiingi nikoombahwamo daawe.

⁵ Nasaae yaambitiramo ohubuusa alala abaandu neende abeemirisi baabwe, haandi abahoongo baabwe neende ohumanyirisa ebyandiikwa bidiira hu madaala kaabwe. Ese ndanyala ohulondoola ebyandiiko by'abo abali nibataangira ohukobola ohutula mu buwaambe, mani bino nibyo ebyali ni bibadiiraho bi ndanyoola:

⁶ Abaangi hu beeruhi batula mu syaalo sya Bbabbilooni baakobola mu Yerusalemu neende mu Yuda, buli otula naachia mu siko sy'engo wae. Amadaala kaabwe kali nikamenyaanga mu bwiiruhiro mu Bbabbilooni ohutulira elalira hu Mutuki Nebukadineesa bali nibayirwa ebweene eyo koti ababoye sa.

⁷ Abeemirisi baabwe bali nibo: Serubbabbeli, Yosua, Nehemia, Asaria, Ramia, Nahamani, Modekai, Bbilisaani, Misipereeti, Bbigifai, Nehumu, neende Bbaana.

⁸ Luno nilwo olukalala lw'enono chia Yisiraeli, alala neende obuungi bw'abaandu ba buli nono abanyalaanga ohukobola ohutula mu bwiiruhiro: Abeechuhulu ba Parosi, bali elifu chibiri, emia ndala neende amahumi kataanu-na-kabiri neende babiri (2,172).

⁹ Aba Sefatia bali emia chidatu neende amahumi kataanu-na-kabiri neende babiri (372).

¹⁰ Aba Ara, bali emia chisaasaba neende amahumi kataanu-na-babiri (652).

¹¹ Aba Pahati-Moabbu, abalichiingi abeechuhulu ba Yesua neende Yoabbu, bali elifu chibiri neende emia chitaanu-na-chidatu neende ehumi-na-chitaanu neende badatu (2,818).

¹² Abaana b'Elamu, bali elifu ndala neende emia chibiri neende amahumi kataanu neende bane (1,254).

¹³ Aba Saatu, bali emia chitaanu-na-chidatu neende amahumi kane-na-bataanu (845).

¹⁴ Aba Sakai, bali emia chitaanu-na-chibiri neende amahumi kasaasaba (760).

¹⁵ Aba Bbinui, bali emia chisaasaba neende amahumi kane neende bataanu-na-badatu (648).

¹⁶ Aba Bbebbai, bali emia chisaasaba neende amahumi kabiri neende bataanu-na-badatu (628).

¹⁷ Aba Asigaadi, bali elifu chibiri neende emia chidatu neende amahumi kabiri neende babiri (2,322).

¹⁸ Aba Adonikaamu, bali emia chisaasaba neende amahumi kasaasaba neende bataanu-na-babiri (667).

¹⁹ Aba Bbigifai, bali elifu chibiri neende amahumi kasaasaba neende bataanu-na-babiri (2,067).

²⁰ Aba Adiini, bali emia chisaasaba neende amahumi kataanu neende bataanu (655).

²¹ Aba Ateeri, aba Hesekia, bali amahumi kataanu-na-kane neende bataanu-na-badatu (98).

²² Aba Hasumu, bali emia chidatu neende amahumi kabiri neende bataanu-na-badatu (328).

²³ Aba Bbesai, bali emia chidatu neende amahumi kabiri neende bane (324).

²⁴ Aba Harifu, bali emia ndala neende ehumi-na-babiri (112).

²⁵ Abaana ba Gibbeoni, bali amahumi kataanu-na-kane neende bataanu.

²⁶ Abaandu ba Bbetilehemu neende Netoofa, bali emia ndala neende amahumi kataanu-na-kadatu neende bataanu-na-badatu (188).

²⁷ Aba Anatooti, bali emia ndala neende amahumi kabiri neende bataanu-na-badatu (128).

²⁸ Aba Bbeetasimafeeti, bali amahumi kane neende babiri.

²⁹ Aba Kiriati Yearimu, Kefira, neende Bberooti, bali emia chitaanu-na-chibiri neende amahumi kane neende badatu (743).

³⁰ Aba Raama neende Gebba, bali emia chisaasaba neende amahumi kabiri neende mulala (621).

³¹ Aba Mikimasi, bali emia ndala neende amahumi kabiri na babiri (122).

³² Aba Bbeteli neende Ai, bali emia ndala neende amahumi kabiri-na-badatu (123).

³³ Aba Nebbo wuundi, bali amahumi kataanu neende babiri.

³⁴ Abeechuhulu b'Elamu wuundi, bali elifu ndala neende emia chibiri neende amahumi kataanu-na-bane (1,254).

³⁵ Aba Harimu, bali emia chidatu neende amahumi kabiri (320).

³⁶ Aba Yeriko, bali emia chidatu neende amahumi kane neende bataanu (345).

³⁷ Aba Loodi, Hadidi, neende Ono, bali emia chitaanu-na-chibiri neende amahumi kabiri neende mulala (721).

³⁸ Aba Seena, bali elifu chidatu neende emia chitaanu-na-chine neende amahumi kadatu (3,930).

³⁹ Abalaamisi bali bano: Abeechuhulu ba Yedaya, abalaangwa mbwe enyuumba ya Yesua, bali emia chitaanu-na-chine neende amahumi kataanu-na-kabiri neende badatu (973).

⁴⁰ Aba Yimeeri, bali elifu ndala neende amahumi kataanu neende babiri (1,052).

⁴¹ Aba Pasuuri, bali elifu ndala neende emia chibiri neende amahumi kane neende bataanu-na-babiri (1,247).

⁴² Aba Harimu, bali elifu ndala neende ehumi neende bataanu-na-babiri (1,017).

⁴³ Abaleefi bali: Abeechuhulu ba Yesua, abalaangwa mbwe Dadimieli ow'abeechuhulu ba Hodeefa, bali amahumi kataanu-na-kabiri neende bane.

⁴⁴ Abeembi bali: Abeechuhulu ba Asafu, bali emia ndala neende amahumi kane neende bataanu-na-badatu (148).

⁴⁵ Abaliindi b'emilyaango bali: Abeechuhulu ba Saluumu, aba Ateeri, aba Talimooni, aba Akubbu, aba Hatiita, aba Sobbai, bali emia ndala neende amahumi kadatu neende bataanu-na-badatu (138).

⁴⁶ Abahalaabani bomu Nyuumba ya Nasaae bali: Abeechuhulu ba Siiha, aba Hasufa, aba Tabbaoti,

⁴⁷ aba Kerosi, aba Sia, aba Padoni,

⁴⁸ aba Lebbana, aba Hagaba, aba Salimai,

⁴⁹ aba Hanani, aba Gideeli, aba Gahaari,

⁵⁰ aba Reyaaya, aba Resini, aba Nekoda,

⁵¹ aba Gasamu, aba Wusa, aba Paseya,

⁵² aba Bbesai, aba Mewuniimu aba Nefusesiimu,

⁵³ aba Bbakibbuuku, aba Hakufa, aba Harihuuri,

⁵⁴ aba Bbasiliiti, aba Mehida, aba Hariisa,

⁵⁵ aba Bbarikoosi, aba Siseera, aba Teema,

⁵⁶ aba Nesia, aba Hatifa.

⁵⁷ Abeechuhulu b'omuhalaabani wa Solomooni bali bano: Aba Sotai, aba Sofereeti, aba Perida,

⁵⁸ abaana ba Yaala, aba Darikooni, aba Gideeli,

⁵⁹ aba Sefatia, aba Hatiili, aba Pokereti Hasebbaimu, ab'Amooni.

⁶⁰ Abahalaabani bomu Nyuumba ya Nasaae boosi, alala neende abeechuhulu b'abahalaabani ba Solomooni, bali emia chidatu neende amahumi kataanu-na-kane neende babiri (392).

⁶¹ Abaloondaho bano balichiingi abo abeecha nibatula mu Telimeela, Telihariisa, Kerubbi, Adooni, neende Yimeeri, nae haba sibanyala ohwomiisa obwiibulanwa bwaabwe bwa bakuuka yaabwe, nikali mbwe banyala ohuba nibali hu aba Yisiraeli nibo bano:

⁶² Abeechuhulu ba Delaya, aba Tobbia, aba Nekoda, boosi bali emia chisaasaba neende amahumi kane neende babiri (642).

⁶³ Haandi, hu balaamisi bali bano: Abeechuhulu ba Hobbaya, aba Hakoosi, aba Bbarisilai (owali niyadeehya mulala hu bahaana ba Bbarisilai Omugileadi haandi bali nibalaangwa neende ameeta kaabwe keene).

⁶⁴ Bano abeene beekoonyeraanga ehabi y'ohwandiikirwa alala neende abo abali nibamala ohweyandiikisa ohuloondakana neende enjibulo chaabwe, nae haba sibakaanwamo daawe, mani bali nibatuswa mu mukaanda kw'obulaamisi koti abali nibataali aboolerefu;

⁶⁵ gafana yababoolera mbwe sibali nibahoyera ohulyaaho hu byohulya bihiramo obwoolerefu, ohwoola lu omulaamisi wuundi niyehoonyera Urimu neende Tumimu achia ohunyala ohwiicha ohubaao.

⁶⁶ Omuhung'aano kuno kwoosi alala kwali nikuli elifu amahumi kane, neende emia chidatu neende amahumi kasaasaba,

⁶⁷ nootusireho ab'obunyide baabwe, abasaacha neende abahasi, abali niboola elifu chitaanu-na-chibiri neende emia chidatu-na-mahumi kadatu neende bataanu-na-babiri (7,337); haandi bali neende abeembi emia chibiri neende amahumi kane neende bataanu, abasaacha neende abahasi.

⁶⁸ Haandi bali neende efaraasi emia chitaanu-na-chibiri (736) neende amahumi kadatu na basaasaba, esuhiri emia chibiri neende amahumi kane-na-chitaanu (245),

⁶⁹ engamia emia chine neende amahumi kadatu neende chitaanu, haane neende esuhiri ehuluundu elifu chisaasaba neende emia chitaanu-na-chibiri (435).

⁷⁰ Bulaanu abeemirisi baandi ab'amadaala mahale basiiraanga omulimo kuno. Gafana yata mu syaaki sy'obuyiinda ebituundu elifu ndala (1,000) eby'esaabbu, ebbeseeni amahumi kataanu, haandi neende amaganjuula k'abalaamisi emia chitaanu neende amahumi kadatu (530).

⁷¹ Nae abaandu hu beemirisi b'amayuumba mahale batechaanga mu seende ch'obwombahi ebituundu elifu amahumi kabiri (20,000) ak'esaabbu haandi neende elifu chibiri neende emia chibiri ebituundu by'efeesa (2,200).

⁷² Nae bi buli baandu badoong'ereo batusa byali elifu amahumi kabiri (20,000) eby'esaabbu, haandi neende ebituundu elifu chibiri (2,000), haandi neende amaganjuula k'abalaamisi amahumi kasaasaba neende kataanu-na-kabiri.

⁷³ Mani katyo, abalaamisi, Abaleefi, abaliindi b'ebiruwa, abeembi, abaandu baandi, abahalaabani b'Enyuumba ya Nasaae, alala neende Yisiraeli yoosi badoong'a nibehaale mu biko byaabwe. Omwoosi kwa hataanu-na-habiri nikwoola, abaandu ba Yisiraeli koti lu bali nibamalire ohwiihala mu biko byaabwe.