Nehemia 6 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohuhoba Nehemia

¹ Sanibbalati, Tobbia, Gesemu, alala neende abasuku beefwe badoong'ereo boosi bawulira bati efwe hwali nihumalire ohwoombaha buyaaha esida esyo, haandi bati siyaliyo abuundu woosi mu sida omwo alang'aalang'a, kata neende nihwali nihusisiiri ohuyabira ebiruwa mu milyaango.

² Mani Sanibbalati neende Gesemu baatumira emboosi, ni chisaba mbwe ese nyale ohubukaananaho nabo mu lukoongo lulala mu Sipaapi sya Ono. Luno hane lwali sa oluhobo lwaabwe lw'ohuteemaho ohuunjita.

³ Ese naange syesi ndabatumira bawamwaanda ohuchia ohubaboolera bati, “Ese ndali ni ndi ohuhola omulimo muhunuufu muno mani haba sindali ninyala ohwiihirira ndaachia ebweene eyo daawe. Haandi mbwe ese haba siinjia huleha omulimo okwo kweeme sa hulw'ese ohuchia ohubabona.”

⁴ Bosi haandi beecha baandumira emboosi cheene echio amahabi kane, haandi syeesi buli siha nga mbakobolamo nasilala endyo.

⁵ Bulaanu Sanibbalati yatumiraho neende mulala hu bahalaabani bae neende emboosi ya hataanu, yino nayo niyiri mu ngeri yiindi ey'ebbarwa yitekaalweo daawe.

⁶ Yali yisoma yiti: “Gesemu nguno ali ohumbooleraanga ati obubacha buli ohusaalanaanga mu baandu basibiraane naang'we, ba eng'we alala neende Abayudaaya muli ohuheengao ohubeehalakaho haandi mbwe sino nisyo esikera eng'we nimuli ohwoombahaanga buyaaha esida esyo. Haandi aboola ati ewe oli ohweetekeha ohweyihasa ohuba omutuki

⁷ haandi mbwe ewe omalire ohutekehera abanabbi baandi ohuchaaka ohulaangiraanga mu Yerusalemu mbwe ewe niiwe oli omutuki wa Yuda. Ow'Oluyaali ali omwomiifu uhuwulira sino, mani ese ndi ohubaasa mbwe ewe neende ese hubukaanane hulomalome hu bulamu buno elalira.”

⁸ Ese syeesi ndamutumira ekaluso endi: “Sibulao kata silala hu biindu ebyo byoosi by'oboola esiri esyadyeeri. Ewe mweene niiwe obiteereo sa.”

⁹ Bali nibateemaho ohututiisatiisa mbwe hu hunyale ohuleha omulimo okwo. Ese naange ndekongooya endi, “Nae bulaanu, ewe Nasaae waange, nyomiise!”

¹⁰ Aambi esiha syeene sino, ese ndachia ndaakeniya Semaya, omwaana wa Delaya neende omwiichuhulu wa Mehetabbeli, otanyalaanga ohutula mu nyuumba yae. Yamboolera ati, “Ewe neende ese huhoyere ohuchia mani hweekise fweesi Abuundu Woolerefu esy'Enyuumba ya Nasaae mani hwiikaleo enjiki, olwohuba abaandu baneecha ohuhwiita. Esiro syoosi bulaanu baneecha ohuhwiita.”

¹¹ Ese naange ndakobolamo endi, “Ese haba siniise omuundu wiiruha sa haandi nindeekisakisa daawe. Ewe obaasa oti ese nyala ohuteemaho ohweoniaanga sa obulamu bwaange nindeekisa mu Nyuumba ya Nasaae, kose? Ese haba siinjia ohuhola esyo daawe.”

¹² Nae ese omweene ndebaasamo haandi, ndamanya mbwe Nasaae haba siyali naali niye owalomalomera Semaya daawe, nae mbwe Tobbia neende Sanibbalati nibo abali nibamukuliriire yaanjekeseho ohulabula huno.

¹³ Bamukula mbwe yeeche yatiisetiise nyingire mu syonoono, hu banyale ohunyaasira oluyaali lwaange mani baswaase.

¹⁴ Ese ndekongooya endi, “Ewe Nasaae waange, yichulisaho bi Tobbia neende Sanibbalati bahola mani obabonerese. Yichulisa omuhasi wula Noadia neende abanabbi baandi bala abateemaho ohutiisa-tiisa.”

Emaliirisa y'omulimo okwo

¹⁵ Luunyuma lw'endaalo amahumi kataanu neende chibiri ech'emirimo, esida syoosi syali nisiweere hu ludaalo lw'amahumi kabiri neende chitaanu ech'omwoosi kwa Eluli.

¹⁶ Mani abasuku beefwe abali mu byaalo bitwebodoohaanie nibawulira bati, bamanya sa bati bali nibamalire ohufwa ohuwa, koti buli muundu bulaanu yali n'amanyire ati omulimo okwo kwali nikuholeebwe ohweema hu buhoonyi bwa Nasaae.

¹⁷ Ohumala esiha sino syoosi, abeemirisi Bayudaaya babechaanga nibalomalomaanga neende Tobbia sa.

¹⁸ Abaandu baandi abali mu Yuda balichiingi hu lubeka lwae hulwa muhweeng'ene wae Omuyudaaya, Sekania omwiichuhulu wa Ara. Ohumeeda ohwo, Yehohanani omwaana wae, yali niyadeehya omuhaana wa Mesulamu omwaana wa Bberekia.

¹⁹ Abaandu balomalomeraanga sa mu moni waange hu biindu bilai byoosi bi Tobbia yali niyahola, haandi bamubooleraanga buli siindu sindalichiingi ni nomanoomeho. Mani yeedinya sa ohundumiraanga amabbarwa ohuteemaho ohutiisa-tiisa.