Nehemia 5 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohufwiinyirira abamanani

¹ Luunyuma hooho, abaandu baangi, abasaacha neende abahasi sidubaanie, bachaaka ohwekanyiirisa Abayudaaya baandi.

² Abaandi babolaanga bati, “Efwe huli neende amadaala mabaambali, mani hweenya emere yinyala ohutuliinda hwabaao abalamu.”

³ Abaandi nabo baboolaanga bati, “Efwe byatuyika ohusiingamo amaloba keefwe neende emikuunda kyeefwe ky' efiini kata neende amayuumba mbwe hu hunyale ohunyoola emere yatukaira ohufwa enjala.”

⁴ Haandi abaandi nabo babolaanga bati, “Efwe naafwe byatuyika hweeyolaanga eseende hu baandu baandi, hu hunyale ohutoyaanga emisolo ky'obwaami eky'amaloba keefwe alala neende emikuunda kyeefwe.

⁵ Efwe huli abaandu b'amabaanga malala neende Abayudaaya baandi. Mani abaana beefwe haba si balai sa koti abaabwe? Nae efwe haandi bituyiika nihuhola abaana beefwe beene abawaambe. Abahaana beefwe beene abaandi bamala ohukuswa koti abawaambe. Hubula obuchiiro olwohuba amaloba keefwe alala neende emikuunda kyeefwe ky' efiini byoosi byamala ohutunyulwaho hale.”

⁶ Mani ese nindawuliraho hu hweekanyiirisa hwaabwe ohwo, etima lyandiira

⁷ mani ndaheengao ohubaaho neende esiindu si mba hole. Ndachaaka neende ohumala obweesikwa mu beemirisi alala neende abahoongo b'abaandu boosi mani ndaamala ndaababoolera endi, “Eng'we mbao muli sa ohwiihalaanga hu beeho beeng'we beene ngandi!” Ndeemao ndalaaliha abaandu boosi bebuuse alala hu nyale ohuholaho hu sidinyu sino

⁸ mani ndaboola endi, “Koti lu hubereenge nihweenyala, hwali ni hununulaanga nihukobosa Abayudaaya beeho beefwe abali niboolaanga ohwekusaanga yi muli, eng'we abaandu baasyaabwe beene hane!” Abeemirisi bano nabo balichiingi sa ni bauleera, haandi nibabula esiindu syoosi si banyala baalomalomaho daawe.

⁹ Mani ndeemao haandi ndaboola endi, “Esiindu sino si muli ohuholaanga syonoono nisyo! Eng'we muhoyere ohutichaanga Nasaae neende ohuholaanga ebiindu bihoyera byoong'ene. Ao simuba nimuchia ohukanya ohuberesa abasuku beefwe abo, Abateende, esifune syosi esy'ohutuchalaasa daawe.

¹⁰ Ese ndakanyaanga abaandu ni bandeeyolaho eseende alala neende emere ohuundusaho, ndaanyala ohunyoola abasyaange beene haandi abo abanyala ohuholeraanga emirimo kyaange. Bulaanu eng'we mulehe hutulane neende ohubaanjana hweefwe hwoosi mbwe hutuungane daawe.

¹¹ Heengemo amakobi koosi ka baba nibababaanja aka eseende, kata sa emere, kata neende efiini, kata neende kabe amafuta k'emiseituuni. Haandi munyale ohukoboseraanga amabuka kaabwe, emikuunda kyaabwe, enduli maangala, haandi neende amayuumba kaabwe bulaanu buti!”.

¹² Abeemirisi abo nabo bakobolamo bati, “Efwe huchia ohuhola sa koti lu oboolere otyo. Efwe huchia ohukobosayo omwaandu okwo kwoosi, huhae ohuteemaho ohwemeeda ohusolosaanga amakobi daawe.” Ndalaangirira abalaamisi boosi beeche mboole abeemirisi boosi beeyame mu moni waabwe ohwooseresaanga esisuubise si baba nibaholere.

¹³ Ndefwaalula omusiipi ku ndali nindeboyere mu sibuno waange mani ndaakusiimula. “Yino niyo engeri yi Nasaae achia ohuhuuhumula oyo yeesi otachia ohwooseresaanga esisuubise syae. Haandi ndemeeda ohuboola endi, Haandi Nasaae achia ohubamalaho enyuumba cheeng'we choosi alala neende ebiindu byeeng'we byoosi bi muli nabyo, n'amala abaleha nimuli buhaya bweene.” Mani buli muundu yeesi owali naali ao yapaaka Omwaami n'aboola ati, “Amiina!” Mani abeemirisi baanyala ohwooseresaanga ebisuubise byaabwe.

Obuwaani bwa Nehemia

¹⁴ Ohumala emyaaka ehumi neende kibiri kyoosi, ki ndali ni ndi gafana w'esyaalo sya Yuda, ohutulira elalira hu mwaaka kw'amahumi kabiri Aritakerikeesi naali omutuki ohwoolera elalira hu mwaaka kw'amahumi kadatu neende kibiri, ese ohwoolera elalira hu beeho baange boosi, abulao oyo yeesi owalyaaho ebyohulya bi ese koti gafana yali n'ahoyera ohulya.

¹⁵ Buli gafana owabechaanga naali mu bunyala ese niteecha, yalichiingi neende ebidinyu eyiri abaandu haandi yali naabahadire bamubecheenge ebituundu by'efeesa amahumi kane buli ludaalo, haandi neende ebyohulya neende efiini. Kata abahalaabani baabwe bali nibeehala hu baandu. Nae ese ndaheengao ohuhola buundi, olwohuba ese ndali ni ndeesa oluyaali mu Nasaae.

¹⁶ Ese ndali ni ndamalira amaani kaange koosi mu ohwoombaha buyaaha esida esyo, mani sidebbiibira omwaandu kwoosi daawe. Buli muundu owaholeraanga emirimo yalichiingi niyeengira mu mulimo kw'ohwoombaha sa.

¹⁷ Ndali nindalumirira ohuliisiraanga hu meesa yaange yeene abaandu Bayudaaya emia ndala neende amahumi kataanu abeemirisi baabwe, n'otateereho neende abaandu baandi boosi abechaanga yi ndi abeene ohutulaanga mu byaalo bitusibiraane.

¹⁸ Buli ludaalo, ndetaanga endaawu ndala, amakoondi kasaasaba akahiramo obulai, alala neende engoho obuduhunyi, haandi buli luunyuma lw'endaalo ehumi ohuwa, ndakabulaanga efiini njaaha yoong'ene. Nae kata katyo ese ndali nindamanya ebidinyu bi baandu bali nibakingaanga, mani sakira ndali nindahaya ohusabaanga obuhuuhumuha bu gafana yali n'ahoyere ohunyolaanga.

¹⁹ Mani ese husaba ewe Nasaae waange, endi ohoya wechulisaanga ohusiimiraanga hu buli siindu siindi siimba ni ndanyala ohuholera abaandu bano.