Nehemia 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Nehemia achia mu Yerusalemu

¹ Ludaalo luundi, emyoosi kine nikibitireo, Omwaami Aritakerikeesi yali naali ohulya, ese ndamuyirira efiini abuundu yi yali. Yali n'atambonaangaho ninyoleere,

² mani yateeba ati, “Siina syeene esikera n'onyoolera otyo?” Ewe haba sooli omulwaae daawe, mani esyo syeekesa mbwe ewe haba sooli omunyoolefu sa. Ese ndawuunga

³ mani ndaakobolamo endi, “ow'Oluyaali yiindira! Ese ndahahaya endye ohunyoolera esiko si bakuuka yaange basiihwamo nisiri amagiingiri mahaya, haandi ebiruwa byasyo ni byasaambwa neende omuliro nibyakwa engohe?”

⁴ Omwaami oyo haandi yateeba ati, “Siina syeene syoodaha?” Ese ndekongooyere Nasaae wo Muukulu,

⁵ mani nda boolera omwaami oyo endi, “Nikali mbwe Ewe ow'Oluyaali wusangaalira, mani waaba n'otekeha ohuumberesa bi mba nisabire, leha ese ngobole mu syaalo sya Yuda, esiko si bakuuka yaange basiihwamo, hu nyale ohusyoombaha buyaaha.”

⁶ Omwaami oyo, omuhaae wae namwihaale mu lubafu, yomiisa esiindu si ndamusaba. Yandeeba esiha si njia ohumala nimbweereo, haandi liina lu mba niinjia ohunyala ohukobolera, mani syeesi ndamala ndaamuboolera.

⁷ Bulaanu ese ndamusaba endi yaamberese ehabi y'oundiisa ebbarwa chiinjirira bagafana b'esituundu sy'Emuumbo wa Ewufuraate, nichibakeraka bakanye ohufukiirira njie mu Yuda.

⁸ Haandi ndasaba ebbarwa yiindi njirire Asafu, omuliindi w'esichaha sy'obwaami, haandi niyimukerakira ohuumberesa embaao ch'ebiruwa by'edaala liliinda Enyuumba ya Nasaae, haandi neende hulw'ebida, haandi neende hulw'enyuumba yi ndali niinjia ohumenyamo ese omweene. Omwaami oyo yamberesa ebyo byoosi bi ndamusaba, olwohuba Nasaae yali naange.

⁹ Omwaami oyo yatuma ab'amaye bahoongo baandi alala neende eye ly'abalwaanira hu faraasi ohuchia naange, mani ndoola Emuumbo wa Ewufuraate. Ni ndoola ebweene eyo, ndanyala ohuberesa bagafana ebbarwa y'omwaami.

¹⁰ Nae Sanibbalati, ohutula mu siko sya Bbeeti Horooni, haandi neende Tobbia, omuhoongo wuundi womu syaalo sya Abaamooni, bawulira bati aliwo omuundu wuundi owiichire ohuholera obulai bw'abaandu ba Yisiraeli, mani baasinyiha muno.

¹¹ Ese ndachia sa mu Yerusalemu, mani ohumala embaka y'endaalo chidatu

¹² sindabooleraho omuundu yeesi bi Nasaae yali ni yaandumire ohuholera Yerusalemu. Mani akatikaati w'esiro, ndasiingira mani ndaatula erwaanyi, niinjiaho neende abasyaange badiidi. Esisolo si hwanyala ohuchia nasyo yali esuhiri yi mweene ndakeenderaangao.

¹³ Syali nisisisiiri esiro esiha si ndatuliramo mu siko omwo nihalakania Ehooho ly'Esiruwa eliri emuumbo ndaachia emwaalo ohubita mu Sulo ya Duragoni, ohwoolera elalira hu Siruwa sy'Ebikoha. Koti lu ndali nimbwaao, ndeehaliirisaanga ebida byali nibyalikulwa eby'esiko esyo, neende ebiruwa byali nibyasihiriswa neende omuliro.

¹⁴ Mani hu lubeka lw'ebukwe lw'esiko esyo, ndakabuha ndachiira emukulu ohwoolera elalira hu Siruwa sy'Esulo, haandi neende hu Sidiba sy'Omutuki. Esuhiri yali ni yingiingire haba siyanyala ohunyoolaho ahakira haduumakisa mu magiingiri ako,

¹⁵ mani ndaamala ndeehirira ndaachia ndeengira mu Hooho lya Kidironi, ndaanyala ohwemeeda ohukeendera ohwo nimbwaao, ni ndingaalire sa esida esyo. Mani ndeemao ndaanyala ohukobola hu ngira yi ndali niinjichiireho, ndaanyala ohukobola engo ndeengirira mu siko esyo ohubitira mu Siruwa sy'Ehooho.

¹⁶ Abulao kata mulala hu bahoongo bomu syaalo omwo owanyala ohumanyaho abuundu yi ndali ninjiire, kata sa esiindu si ndali ni holereenge. Ohwoola ao, ese ndali ni mboleereho Omuyudaaya yeesi, abalaamisi, abeemirisi, abahoongo, kata sa omuundu yeesi esiindu syoosi owahanyalire ohuba mbwe yesi yahoonyeraho omulimo kuno daawe.

¹⁷ Nae bulaanu ese ndanyala ohubaboolera endi, “Eng'we boneho sa ebidinyu bino bi hulimo olwohuba mbwe Yerusalemu siri sa amagiingiri, haandi ebiruwa byasyo byasihiriswa! Lehe hwoombahe buyaaha ebida by'esiko sino, mani humale hunyale ohwaakamia esoni cheefwe chino.”

¹⁸ Haandi ese ndababoolera koti lu Nasaae yali naali naange, mani yahoonya, haandi koti lu mwaami wuno yali niyamboleere. Bakobolamo bati, “Eng'we lehe hutulaniremo ohwoombaha buyaaha!” Mani beetekehera ohuchaaka omulimo okwo.

¹⁹ Sanibbalati, Tobbia, neende Omuaraabbu wuundi olaangwa mbwe Gesemu nibawulira bi hwali nihuli ohutekeha ohuhola, batucheheereraho mani baboola bati, “Eng'we siina syeene si muli ohubaasa muti muli ohuhola? Muchia ohuhayuha hu mwaami wuno, kose?”

²⁰ Ese naange ndakobolamo sa endi “Nasaae wo Muukulu niye ochia ohutunyalira ohuhola. Efwe huli sa abahalaabani bae, mani huchia ohuchaaka ohwoombaha sa. Nae eng'we mubulaho obunyala bwoosi hu buyiinda bwoosi obuli mu Yerusalemu daawe, haandi eng'we haba simuliho neende omukabo kwoosi mu miduunga kwasyo.”