Nehemia 13 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohwekabula ohutula hu baandu bateende

¹ Amalako ka Musa nikali nikasomwa lukali eyiri abaandu, boola hu bwandiike buboola buti abulao Omuamooni kata sa Omumoabbu yeesi owali n'afukiirirwa ohweyambaania neende abaandu ba Nasaae.

² Sino syeema hu baandu ba Abaamooni neende aba Moabbu koti lu bahaya ohuberesa ebyohulya neende amaachi Abaisiraeli nibali hu lukeendo lwaabwe ohutula mu Misiri nae Nasaae yakaluuhania esibwaabo syae esyo syeehola ehabi yi huli.

³ Abaandu ba Yisiraeli nibawulira elako lino niliri ohusomwa, basira abaandu bateende boosi babatulemo.

Engaluuhania ndai cha Nehemia

⁴ Omulaamisi Eliasibbu, owali n'ahulira ebyaaki byomu Nyuumba ya Nasaae, yali yahiinda muno nawuliirisanianga neende Tobbia.

⁵ Mani yafukiirira Tobbia ohwehoonyeraanga esiseenge sitabaafu muno esyali ni syaleherwa ohubihaangamo ebiyaanwa byoosi eby'emere neende obubbaani, ebiindu byehoonyerwaanga mu Nyuumba ya Nasaae, ebiyaanwa by'abalaamisi, alala neende eby'ehumi by'emere, eby'efini, haandi neende eby'amafuta k'enaasi, ebyabereswaanga Abaleefi, neende abeembi bomu Nyuumba ya Nasaae, haandi neende abaliindi b'Enyuumba ya Nasaae.

⁶ Mani bino nibyali nibichaanakana bityo, ese ndali nindamenya mu Yerusalemu, olwohuba mu mwaaka kw'amahumi kadatu neende kibiri ki Aritakerikeesi yali naali omutuki wa Bbabbilooni, ese ndali nindakobola engo ohumwoolaho. Esiha nisyabitao esidiidi, ese ndanyala ohubereswa obweyaango

⁷ mani ni ndakobolayo mu Yerusalemu. Ni ndoola ebweene eyo, ndesiinduha muno ohunyoola endi Eliasibbu yali niyamala ohukanya Tobbia ohwehoonyeraanga esiseenge syali mukati w'Enyuumba ya Nasaae.

⁸ Ndabiiruha muno neende etima mani ndaanyala ohusukuna erwaanyi ebiindu byali ebya Tobbia byoosi.

⁹ Haandi ndalagira endi ebiseenge ebyo byoosi bilabiswe mani ebiindu byehoonyerwaanga mu Nyuumba ya Nasaae, neende ebiyaanwa by'emere byoosi, alala neende obubbaani byoosi byakoboswamo.

¹⁰ Haandi ndeecha ndaamanya endi hane abeembi bomu Nyuumba ya Nasaae, neende Abaleefi baandi bali nibatula mu Yerusalemu nibamala ohukobolaanga mu mikuunda kyaabwe mihale, mbwe koti lu baandu bali ni batababechaanga ebiindu binyala ohuliinda obulamu bwaabwe bulai.

¹¹ Ndasoolania abeemeresi hulw'ohuleha enyuumba ya Nasaae ataali omudeebi. Mani ndabakalusa Abaleefi neende Abeembi mu nyuumba ya Nasaae haandi ni mbata hu mirimo.

¹² Bulaanu abaandu boosi aba Yisiraeli bachaaka ohuleeta buyaaha mubitoo byomu nyuumba ya Nasaae ndala ye ehumi ya ebiamo, efiini, neende amafuta k'omuseituuni.

¹³ Bano nibo abasaacha bandaberesa obunyala ohuliinda ebitoo; Seleemia, Omulaamisi, Sadoki, omweekesa w'amalako; neende Pedayia Omuleefi. Hanani omwaana wa Saakuri haandi omwichuhulu wa Matania yali nabaloondakiriraho. Ndali nga ndeesika abasaacha bano mu hukaba abaholi baasyaabwe emikabo.

¹⁴ Yichulisaho, Nasaae waange, ebiindu bino byosi bi ndahuholeere mu nyuumba yao neende mu hulaama.

¹⁵ Mu biha byeene ebyo, ndalola abaandu mu Buyudaaya nibadiinya emisabbiibbu kitulemo amaachi hu ludaalo lwa Sabbaato. Abaandu baandi nabo bali nibabuusa emere, efiini, emisabbiibbu, emituli, nebiindi bityo hu suhiri chaabwe ohuchia Yerusalemu; mani ndabakaania obutakusaho esiindu syosi hu ludaalo lwa Sabbaato.

¹⁶ Abaandu baandi ohutula mu siko sya Tiiro abali bamenya Yerusalemu, baleeta eng'eeni neende ebiindu biindi mu siko obikusamo hu nyaanga ya Sabbaato.

¹⁷ Ndasoolania abeemeresi ba Yuda haandi ndaababoolera endi, “mutingaale hu mabi ka muli ohuhola! Mwonoona oludaalo lwa Sabbaato nimulunyaasa.

¹⁸ Sino nisyo esyakera Nasaae yabasaandya, koti lu yaleetera esaando hu siko sino. Mani haandi musiilumiriraanga ohwiihya etima lya Nasaae hu Yisiraeli nimwonoona oludaalo lwa Sabbaato.”

¹⁹ Mani ndaalagira endi ebiruwa by'esiko biikalweo muhuchaaka hwa buli Sabbaato, lu bwiire buchaaka ohwiira, haandi obuteekulwao ohwoola lu Sabbaato yiba niyiweere. Ndeemesa balala hu basaacha bohu biruwa ohumanyirisira elalira bati sibulao esiindu syosi esileetwa syeengira mu siko hu ludaalo lwa Sabbaato.

²⁰ Lulala awuundi habiri abachurusi bakusaanga ebiindu bya buli ngeri beyalisaanga oludaalo lwohutaanu erwaanyi w'ebida by'esiko.

²¹ Ndabalabula nimbaboolera endi, “sibihoyera ohuba erwaanyi eyo ohuula echuli. Nimusiloondamo sino haandi ndabatuka sirifu.” Mani ohutula hu ludaalo olwo haba sibakobolaho hu Sabbaato haandi.

²² Ndalagira Abaleefi ohweelabya abeene neende ohuchia ohuliinda ebiruwa neende ohuliinda bulai Sabbaato. Njichuliise, ewe Nasaae, hulwa bino byosi, mani wuunjabine neende obuheeri bwao buungi obwo.

²³ Abweene ao ndeecha ndamanyiirisa endi abasaacha Yuda bali nibadehiisye abahasi ohutula Asidoodi, Abaamooni, neende Moabbu.

²⁴ Balala hu baana baabwe balomalomaanga olulimi lwa Asidoodi noomba enimi chiindi olwohuba sibamanya ohulomaloma olulimi lweefwe.

²⁵ Ndaalabira abasaacha abo, ndaabanyeka nimbachuba, ndaabahuya, mani ndabaachunulaho efwiiri. Ndakera beebwaaba mu liita lya Nasaae mbwe haba sibahadeehisanieho neende abateende.

²⁶ Nimboola endi, “Bali abahasi bateende abakera Omutuki Solomooni yakwa mubwonooni.

²⁷ Bulaanu huloonde hubimuhola huhaye ohumuwulira Nasaae weefwe hulw'ohudehia abahasi bateende?”

²⁸ Yehoyada yali omwaana wa Eliasibbu Omulaamisi Muhuluundu, ne kata katyo mulala hu basiani ba Yehoyada yadeehya omuhaana wa Sanibbalati, ohutula mu siko sya Bbeeti Horooni, sakira ndakera Yehoyada yaatula Yerusalemu.

²⁹ Yichulisaho, ewe Nasaae, koti abaandu abo koti baleeta omukwoobo mu bweyaango bw'omulaamisi neende mu ndagaano y'abalaamisi neende eya Abaleefi.

³⁰ Ndalabya abaandu ohutula hu biindu byosi ebiteende; Ndateresa ebilagiro hulw'Abalaamisi neende Abaleefi mbwe buli otula amanyirise omulimo kwae;

³¹ Ndatekeha eehwi ch'ohusaamba ebiyaanwa mu biha bihoyeere, neende abaandu bosi ohuleeta ebiyaanwa byaabwe byaamberi bya ekesa neende ebyaamo byaamberi byeengere. Yichulisaho bino byoosi, ewe Nasaae, mani wumbeeho omukabo kuunjera.