Nehemia 12 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Olunyiriri lw'abalaamisi neende abaleefi

¹ Mani bano nibo abalaamisi alala neende Abaleefi abeechera alala neende Serubbabbeli omwaana wa Seyalitieli, neende Yosua ohutula mu bwiiruhiro: Seraya, Yeremia, Esira,

Abalaamisi

² Amaria, Maluku, Hatuusi,

³ Sekania, Rehumu, Meremooti,

⁴ Idoo, Ginetoi, Abbija,

⁵ Mijamini, Maadia, Bbiliga,

⁶ Semaya, Yoaribbu, Yedaya,

⁷ Salu, Amoko, Hilikia, Yedaya. Bano nibo abalichiingi abahunuufu b'Abalaamisi alala neende abaana baabwe mu ndaalo cha Yeswa.

Abaleefi:

⁸ Abaloondaho bano nibo abali nibafunaanibwa hu hwembaanga enyembo cha Nasaae ech'ohweebasa: Yeswa, Bbinui, Kadimieli, Serebbia, Yuda, neende Matania.

⁹ Abaloondaho bano nibo abahola omukaanda kw'abeembi beembaanga nibayaasa: Bbakibbukia, Uno, neende Abaleefi baasyaabwe.

Abeechuhulu ba Yosua omulaamisi muhuluundu

¹⁰ Yosua yali laatang'ene Yoyakimu; Yoyakimu yali laatang'ene Eliasibbu; Eliasibbu yali laatang'ene Yoyada;

¹¹ Yoyada yali laatang'ene Yonatani; nae Yonatani yali laatang'ene Yadua.

Abeemeresi b'enono ch'abalaamisi

¹² Yoyakimu niyali Omulaamisi Muhuluundu, bano nibo abalichiingi abeemeresi b'enono ch'abalaamisi: Aba Seraya, Meraya; aba Yeremia, Hanania;

¹³ aba Esira, Mesulamu; aba Amaria, Yehohanani;

¹⁴ aba Maluki, Yonatani; aba Sebbania, Yosefu;

¹⁵ aba Harimu, Adina; aba Merayooti, Helikai;

¹⁶ aba Ido, Sekaria; aba Ginetooni, Mesulamu;

¹⁷ aba Abbija, Sikiri; aba Miniamini, aba Moadia, Pilitai;

¹⁸ aba Bbiliga, Samua; aba Semaya, Yehonataani;

¹⁹ aba Yoyaribbu, Matenai; aba Yedaya, Wusi;

²⁰ aba Salai, Kalai; aba Amooki, Ebberi;

²¹ aba Hilikia, Hasabbia; aba Yedaya, Netaneeli.

²² Ebyandiiko byali ni byateebwao ebidiira hu beemeresi b'amadaala k'Abaleefi haandi neende ak'amadaala k'esilaamisi mu ndaalo ch'Abalaamisi Bahuluundu bano bati: Eliasibbu, Yoyada, Yonatani, neende Yadua. Ebyandiiko bino byali byalehwa esiha si Dario yali naali omuhoongo wa Perisia.

²³ Abeemeresi b'amadaala k'Abaleefi, kata katyo, bali baandiikwa mu byandiiko bihuluundu ohwoolera elalira mu biha bya Yonatani, omwiichuhulu wa Eliasibbu.

Ohukabwa hw'emirimo mu nyuumba ya Nasaae

²⁴ Nae ohweema hu munwa kwa Hasabbia, Serebbia, Yesua, Bbinui neende Kadimieli, Abaleefi batekehwa mu mikaanda kikabuhaane. Emikaanda kibiri mu buli siha bali nibali ab'ohufumianga Nasaae, neende ohumweebasaanga, ohuchianakana neende omunwa kwalichiingi nikutulire eyiri Omutuki Daudi, omuundu wa Nasaae.

²⁵ Abaliindi bomu Nyuumba ya Nasaae bano bati nibo abalichiingi nibafunaanibwa neende ohulindaanga ebiseenge byaaki ebyalichiingi aambi neende ebiruwa by'Enyuumba ya Nasaae: Matania, Bbakibbukia, Obbadia, Mesulamu, Talimooni, neende Akubbu.

²⁶ Abaandu bano balichiingiwo mu ndaalo chali echia Yoyakimu, owali omwaana wa Yosua haandi owali omwiichuhulu wa Yehosadaki, haandi neende mu biha byali ebya Nehemia owali gafana, haandi mu biha byali ebya Esira, omulaamisi wali omweeki w'Amalako.

Nehemia ayaana esida sy'esiko esyo eyiri Nasaae

²⁷ Mani esida sy'esiko sya Yerusalemu ni syali nisiyaanwayo eyiri Nasaae, Abaleefi baleetwa ohutula buli abuundu yi babechaanga nibamenya, hu banyale ohuba mu mwehoyo kw'ohuyaanayo okwo nibeemba enyembo ch'ohweebasa alala neende enyembo cha nyaangili neende amaduungu.

²⁸ Amadaala k'Abaleefi k'abeembi kebuusa alala ohutula buli abuundu yoosi yi kali nikamenyaanga aambi neende Yerusalemu haandi neende ohutula mu biko bidiidi biindi ebyalichiingi ni byebodoohania Netoofa,

²⁹ haandi neende ohutula mu Bbetigiligaali, Gebba, neende Asimafeesi.

³⁰ Abalaamisi alala neende Abaleefi baholera alala omuduunga kw'ohulabisibwa abeene, haandi neende abaandu baandi, neende ebiruwa, alala neende esida sy'esiko sihunuufu esyo.

³¹ Ese ndabuusa alala abeemeresi boosi aba Yuda aakulu w'esida esyo mani nimbaberesa obunyala hu mikaanda kibiri ekyo emihoongo muno ohuhumbaanga nibebodoohania esiko esyo nibeebasa Nasaae.

³² Hosya nae yahuumbiraanga sa emukoongo w'abeembi, nae aambi esituundu sy'abeemeresi boosi aba Yuda nibaloondaho,

³³ haandi nae Asaria, Esira, Mesulamu,

³⁴ Yuda, Bbenjamini, Semaya, neende Yeremia mweene,

³⁵ haadi neende abasyaani b'Abalaamisi baandi bano neende eturumbete nibeemao nibakoniaho: Sakaria omwaana wa Yonatani, omwaana wa Semaya, omwaana wa Matania, omwaana wa Mikaaya, omwaana wa Sakuuri, omwaana wa Asafu;

³⁶ haandi neende abeebulanwa bae boosi, Semaya, Asareeli, Milalai, Gilalai, Maai, Netaneeli, Yuda, neende Hanani, nibali ebihubba bya Daudi omuundu wa Nasaae; haandi neende Esira omweeki nibeemiiremo.

³⁷ Hu Siruwa sy'Esulo bachaakira ao ohuniina engaasi yali niyichoomere hu Siko sya Daudi, ohubita hu dooho lya Daudi, haandi ohukobolera hu sida siri hu Siruwa sy'Amaachi, ebukwe w'esiko esyo.

³⁸ Nae omukaanda kw'abaandu bali ab'ohweebasa Nasaae abaandi bachiira hu mukaada aakulu w'esida, mani naange ni noondaho neende esituundu sy'abaandu baandi. Hwahuumba nihubita hu Munaara okwa Ofeni ohwoolera elalira hu Sida Sitabaafu,

³⁹ mani ohutulira abweene ao, hweemao hwaachia hwaabita Esiruwa sy'Efuraimu, neende Esiruwa sya Yesaana, neende Esiruwa sy'Eng'eeni, neende Omunara kwa Hananeeli, neende Omunara kwa kw'Emia, ohwoolera elalira hu Siruwa sy'Amakoondi. Hwanyala ohwaakamya ohuhuumba hweefwe nihuli aambi neende esiruwa siingisa mu Nyuumba ya Nasaae.

⁴⁰ Emikaanda kibiri kino ekyali eky'ohweebasaanga Nasaae kyanyoola abuundu ali Enyuumba ya Nasaae. Ohumeeda hu beemeresi abalichiingi nae alala,

⁴¹ omukaanda kwaange kwalimo abalaamisi bano, niboobba eturumbete: Eliakimu, Maseya, Miniamini, Mikaaya, Elionai, Sakaria, neende Hanania;

⁴² nae bano boosi bali nibaloondwaho neende Maseya, Semaya, Eleasa, Wusi, Yehohanani, Milikiya, Elamu, neende Eseri. Abeembi bali nibeemirirwamo neende Yesirahia, beembera aakulu w'amakono kaabwe.

⁴³ Hu ludaalo lweene olwo, ebiyaanwa biindi ebiingi muno byayaanwayo, mani abaandu beechula esangaalo olwohuba Nasaae yali niye obasaangaasire muno. Abahasi neende abaana bosi beengira mu mwehoyo, mani esiyoka si boobba boosi alala syaanyala ohuwuliirihanira eyale bweene.

Ohutaao ehola y'ohwiinamiraanga Nasaae mu nyuumba yae

⁴⁴ Esiha syeene esyo, abasaacha babereswa obunyala byaaki yi biindu byasoloswa hulw'enyuumba ya Nasaae byabiihwaangamo, n'oteereho neende kata silala sy'ehumi, neende emere yikulao buli kesa, kata neende ebyaamo byosi ebyachakaanga ohweenga mu buli mwaaka. Abasaacha bano bati nibo abalichiingi neende obunyala hu bw'ohusolosaanga ebirime bino ohutula mu mikuunda kyalichiingi aambi neende ebiko bikabuhaane ni bayiriraanga abalaamisi neende Abaleefi koti lu Malako kadahaanga. Abaandu boosi ba Yuda boosi bali nibasangaalira abalaamisi neende Abaleefi,

⁴⁵ olwohuba baholaanga emiduunga ky'ohulabiswa alala neende eky'ebiindu biindi bi Nasaae yali niyalagira. Abeembi bomu Nyuumba ya Nasaae, alala neende abaliindi b'Enyuumba ya Nasaae bosi baholaanga emirimo kyaabwe ohuloondakana neende endekeha yi Mutuki Daudi neende Solomooni omwaana wae bataao.

⁴⁶ Ohutulira elalira hu ndaalo ch'Omutuki Daudi alala neende omweembi Asafu hale neende ahaandi, abeembi nibo abeemiriraanga enyembo chifumia neende ech'ebasa Nasaae.

⁴⁷ Mu ndaalo cha Serubbabbeli haandi neende mu ndaalo cha Nehemia, abaandu boosi aba Yisiraeli bayanaanga ebiyaanwa bya buli nyaanga ohuhonyaanga abeembi bomu Nyuumba ya Nasaae alala neende abaliindi bomu Nyuumba ya Nasaae. Abaandu bayanaangayo ebiyaanwa bilafu eyiri Abaleefi, nae Abaleefi bamala bosi bayaanira ebituundu biyera abalaamisi.