Nehemia 1 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Bino nibyo ebyandiikwa bi Nehemia omwaana wa Hakalia yaholaho. Mu mwoosi kwa Kisilefu, mu mwaaka kw'amahumi kabiri ki Aritakerikeesi yali naatuka Perisia, Ese, Nehemia, ndali mu Susa, esiko sihunuufu.

Ohuchuunirwa hwa Nehemia hu Yerusalemu.

² Hanani, mulala hu bamwaanama, yoola naatula mu Yuda naali neende omukaanda kuundi, ndabateeba ebidiira hu Yerusalemu, haandi neende hu Bayudaaya baandi abali nibakoboole ohutula mu bwiiruhiro mu Bbabbilooni.

³ Baamboolera bati abo abawonao haandi baaba nibamala ohukobola mu syaalo sy'engo bali nibasaanda muno olwohuba abateende bali nibamenya aambi ao, bali nibabalekeeresa. Haandi baamboolera bati ebida bya Yerusalemu byali nibisiidoong'ere nibyakwa aasi, haandi bati ebiruwa byasyo byosi byali nibisisiiri ohusiingiswa haandi ohutula hu siha si byasaambirwaho.

⁴ Mani ese nindawulira bino byoosi, ndeehala aasi mani ndaalira amasika. Ohumala endaalo echiyera hooho, ese ndalira mani ndaasira ohulya ebyohulya. Ndasabaanga sa Nasaae endi,

⁵ “Ewe, Omwaami Nasaae wo Muukulu! Ewe oli omuhunuufu muno, efwe hweema nihuhutya. Ewe woseresaanga Endagaano yao neende abo abahuheera, haandi abahola ebyo by'olagira.

⁶ Ewe ndewuunje mani wuumbone ewe Omwaami waange owulire ohwekongooya hwaange, koti lu ndasabira esideete neende esiro abahalaabani bao, abaandu ba Yisiraeli. Ese ndeeyama endi efwe fweesi, abaandu ba Yisiraeli, hwonoona. Bakuuka yaange, neende ese mweene hwonoona.

⁷ Hwahuholera ebimayaanu, haandi hwahairwa elalira ohuhola by'olagira. Hwahaywa ohuloondakana neende amalako ka watuba ohubitira mu Musa, omuhalaabani wao.”

⁸ Bulaanu, ewe yichulisa ebyo byoosi bi waboolera Musa oti: “Nikali mbwe eng'we abaandu ba Yisiraeli muchia ohuba abataali abeesikwa yiindi, mba njia ohubasalaania mukotere mu byaalo biindi.

⁹ Nae kata katyo nimuchia ohunyala ohukobola mwiiche yiindi, munyale ohuholaanga ebyo byoosi bi mbalagira, mba njia ohubakobosa mu bweyaango bu ese mweene ndedoolera ohubechaanga yihoyere ohwiinamirwangamo, kata neende nimwahabe nimwasalaana nimwoola yi syaalo syaakama.”

¹⁰ “Ewe Omwaami, bano boosi bahalaabani bao, abao ewe omweene. Ewe niiwe owabanunula neende obunyala bwao bw'amaani neende amaani.

¹¹ Tekeeresa bulaanu mani owulire ohwekongooya hwaange, haandi amasaayo k'abahalaabani bao baandi bosi, abo abekoomba ohuhwisaangamo oluyaali. Mberese obuyiingiri nyaanga yino, ohole omuhoongo wuno yangwiire esisa.” Mu ndaalo echo, ese ndali ni ndi omuchuhi w'efiini y'omuhoongo oyo.