Nahumu 1 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Yino mboosi yidiira hu Ninefe, olukano lw'ohubwiihulirwa hwabonwa neende Nahumu, owali naatula mu Elikoosi.

Etima ly'Omwaami eyiri Ninefe

² Omwaami Nasaae haba siyesimiirisiraanga abamweekeraaniaho daawe; asaandyaanga abo abamuyiingania. Abatungaanga neende etima lyae.

³ Omwaami haba siyanguyaanga ohunyoolera daawe, kata katyo yeechula obunyala mani s'alehaanga oliho omusaango ohuwaao naatamusaandiisye. Abuundu yi Omwaami abitira, ebiifuusye bisiingira sa; amaleesi kano niko olufu lu makulu kae kadumusaanga!

⁴ Ayiikaanga enyaanja, mani yoomerera! Akeraanga emyaalo nikyoomerera. Emikuunda kya Bbasani kyaalala, Olugulu lwa Karimeeli lufwaana nasiloobaloba, mani ebimuli bya Lebbanooni bibbuuruuha.

⁵ Engulu chiteengerehera mu moni w'Omwaami; ebigulu bisaanguluhira mu moni wae. Eloba lyoosi liteengereha Omwaami n'abonehana; esyaalo syoosi alala neende abaandu basyo boosi bahinaakirira sa.

⁶ N'anyoolera, naanu mweene onyala ohwebalula? Naanu mweene onyala ohwebalula etima lyae lulu? N'abbwomoola etima lyae lyaaduha omuliro; enyaanda chisaasakuha cheehola olufu mu moni wae.

⁷ Omwaami mulai niye; alwaanira abaandu bae mu biha by'ebidinyu; aliinda abo abakaluuhana baamukobolaho.

⁸ Koti amaachi maangi kahulukusa asihirisira elalira abasuku bae; agooba abo abamuyiingania mu hufwa hwaabwe.

⁹ Siina syeene sy'ewe oli ohuhoba Omwaami? Achia ohuhusihirisa ewe. Abulao oyo onyala ohumuyiingania amahabi kabita lala liti.

¹⁰ Koti sa amawa keeboyokania, haandi koti ehaanja eng'we abameesi muchia ohumamulwa muwe!

¹¹ Ohutula mweewe, Ninefe, nimwo omwatulira omuundu weechula endekeha mbi, owahoba Omwaami.

¹² Sino nisyo esiindu si Omwaami aboolera abaandu bae Yisiraeli ati: “Kata neende Abasiria nibali ab'amaani, haandi obuduhunyi, bachia ohusihiriswa sa mani bahameo. Eng'we abaandu baange, ese mweene niise owabasaandyaanga, nae bulaanu ese haba siinja husihola haandi.

¹³ Ese bulaanu njia ohubamaliraho elalira amaani k'Asiiria bulaanu buti, haandi njia ohubatusaho eminyororo kyababoyokania.”

¹⁴ Sino nisyo si Omwaami amalire ohulabula hu Abasiria ati, “Abo bachia ohuhaywaho kata omwiichuhulu mulala owahanyalire ohuyira mu moni eliita lyaabwe. Ese njia ohusihirisa ebiloongaloongwe byoosi ebiri mu nyuumba chia banasaae baabwe. Ese ndi ohutekehera Abasiria eng'ani ngaandi bamalire ohusihirisirwa elalira!”

¹⁵ Bone, wamwaanda ali ohwaakuhira hu ngulu naaleeta amakeni malai! Ali hu ngira yae ohuchia ohulaangirira obuyiingiri! Eng'we abaandu ba Yuda, huse ebidyaalo byeeng'we mani muberese Nasaae esiindu esyo si mwamulaka haandi mwaamuchwiichwiisira. Ababi haba sibachia ohufumaalira esyaalo syeeng'we haandi daawe. Abo bamala ohusihirisirwa elalira!