Mika 7 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ebiima by'Abaisiraeli binyaasiha

¹ Chiinjakaanire ese! Olwohuba ndeeholere koti ow'enjala otakaana esyaamo syoosi hu musaala, kata esyaaku sidoong'ere hu musabbiibbu, neende emituli chitaangira ohweenga chi mwooyo kwaange kwekoomba. Sibulaho esiindu syohulya.

² Abulao omuundu mweesikwa mu syaalo, haandi abulao omuundu muluungifu daawe. Buli muundu aliinda sa anyooleho ehabi yobwiti. Buli muundu ayiima owaasye neende omuteego.

³ Boosi bamanyihaane mu huhola ebyonoono, mani babihola bulai bweene. Abatuki neende abakayi b'emisaango badaha ohulya esy'ohukuliirirwa. Omuundu muhunuufu naababoolera esibi sy'adaha ohuhola; ni boosi bafukiirisania sa nae.

⁴ Kata abaandu bahiramo obulai, bali koti oluyoongo, haandi abo abahiramo obuluungifu, bali koti olukaka lw'amawa. Bulaanu ebiha by'ohubasaandya byoolere, koti lu banabbi baabwe babalabula; bulaanu ebiindu bibaheheere.

⁵ Haba muteesikaanga owaasyeeng'we daawe, mutesikaanga kata omwiicha weeng'we daawe. Mumanyiriseenge bi mulomaloma kata ayahaba nimulomaloma hu bahasi beeng'we.

⁶ Olwohuba omwaana musyaani alekeeresa laatang'ene, haandi muhoomwaana ayiingania masaalang'ene. Muhoomwaana asoolana neende masalaang'ene. Abasuku b'omuundu baba abomu nyuumba yae beene.

⁷ Nae ese njia ohutingaalaanga eyiri Omwaami, njia ohuliindaanga Nasaae omuwonia waange. Nasaae waange achia ohuumbulira.

Omwaami aleeta obuwonia

⁸ Ewe omusuku waange, otaandehoyeraho daawe; kata ndahakwa, njia ohusiingira. Kata ndahaba mu siirima, Omwaami achia ohuumberesa obulafu.

⁹ Njia ohwesimiirisa etima ly'Omwaami, olwohuba ndamuholera ebyonoono. Nae Munjakamo, achia ohunwaanira haandi yaheengere omusaango. Yahandeete mu bulafu; mani njia ohubona obuwonia bwae.

¹⁰ Ao mani omusuku waange owateebaanga ati: “Omwaami Nasaae wao ali yeena?” Yahabone esyo mani esoni chimudiire. Ndahasangaale nimbona n'asenakirwa aasi koti amadosi kohu ngira.

¹¹ Ewe Yerusalemu, ebiha by'ohwoombaha esida syao byoolere! Mu biha ebyo, enjaho chao chahatakalaswe.

¹² Abaandu bao bahakobole yooli, nibatula mu Asiria neende mu biko bya Misiri, ohutula Misiri ohwoola hu Mwaalo kwa Ewufuraate, ohutula hu nyaanja ohwoola hu nyaaja, haandi ohutula hu ngulu ohwoola hu ngulu.

¹³ Nae esyaalo syaheehole esiparara hulw'ebiholwa byaabwe bibi neende olw'abaandu bamenyamo.

Omwaami yahakwiire Yisiraeli esisa

¹⁴ Omwaami, abaandu bao bawedoolera, baliinde koti lu mwaayi aliinda ebyaayo byae. Kata ayahaba mbwe bamenya mu sichiimi boong'ene, eloba lai lyabeebodoohania. Leha baliireenge mu Bbasani neende Gileadi koti mu ndaalo cha hale.

¹⁵ Njia ohubeekesa eby'amayia koti lu ndahola nibatula mu syaalo sy'e Misiri.

¹⁶ Ebyaalo byahabone sino mani esoni chibadiire kata bahaba ab'amaani; bahediire hu minwa; haandi baheekale amatwi kaabwe.

¹⁷ Bahahoombe olufu koti enjuha, koti ebiindu byohu syaalo byambaaka. Bahatule yi beekisa nibateengereha, mwahakere baatya mani beecha eyiri Omwaami Nasaae weefwe.

¹⁸ Ewe Omwaami, abulao nasaae wuundi oli koti ewe, oleheramo abaandu bao abaluwonamo ebyonoono byaabwe. Haba sodoong'a n'onyoleere endaalo choosi daawe, nae osangaalira mu buheeri butaakama.

¹⁹ Omwaami haandi wahatukwiire esisa. Wahaseenakire ebyonoono byeefwe mani waabisukuna byoosi mu lusiba lw'enyaanja.

²⁰ Waheekese obweesikwa bwao neende obuheeri bwao butaakama eyiri abaandu bao, abeechuhulu ba Abburahamu neende Yakobbo, koti lu weechubira bakuuka yeefwe mu ndaalo cha hale.