Mika 5 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Abaandu bomu Yerusalemu, muhung'aanie eye lyeeng'we. Batwebodoohaanie! Baseetere omutuki wa Yisiraeli.

Nasaae asuubisa Omutuki ohutula Bbetilehemu

² Omwaami aboola ati: Nae ewe, Bbetilehemu Efuraati, niiwe ohiramo obudiidi mu nono chia Yuda. Nae omutuki wa Yisiraeli achia ohutula mu ewe, oyo yi huchaaka hwae hwaliwo ohutula hale, ohutula mu ndaalo cha hale muno.

³ Mani sakira Omwaami yahabalehe ohwoola lu oyo olumwa ohwiibula yaheebule. Ao niwo yi baandu bomu syaalo syae bahabe nibadoong'ereo bahakobolere eyiri Abaisiraeli basyaabwe.

⁴ Oyo niyaheeche, yahatuke abaandu bae mu bunyala bw'Omwaami, neende obuhunuufu bw'eliita ly'Omwaami Nasaae wae. Mani abaandu bae bahabe mu muleembe, olwohuba bulaanu yahabe omuhunuufu ohwoola hu njakamo y'esyaalo.

⁵ Mani yahaleete omuleembe. Abasiria nibahaseete esyaalo syeefwe, mani baaseena hu loba lyeefwe, hwahatume abeemirisi beefwe bataanu-na-babiri abahiramo amaani neende abatuki beefwe bataanu-na-badatu.

Ohuwonia neende ohusaandya

⁶ Bahalwaane ebiita mani baayiingira Asiria, esyaalo sya Nimuroodi. Mani bahatuwonie Abasiria abahabe nibaduumire olwaho nibali mu loba lyeefwe.

⁷ Mani Abaisiraeli abahabe nibadoong'ereo bahabe akatikaati w'ebyaalo biingi koti olume lutula eyiri Omwaami, haandi koti efula yikwa hu bunyaasi. Baheesike Omwaami ataali abaandu, Omwaami niye owahabaliinde, ataali abaandu.

⁸ Mani Abaisiraeli bahaluwonemo bahabe akatikaati w'ebyaalo biingi koti edalang'i akatikaati w'esolo chomu siino, koti edalang'i ndoto akatikaati w'eyiicho ly'amakoondi; edalang'i yikakwaaho, yakabosyoola-bosyoola mani abuleo omuundu onyala ohukawaabina daawe.

⁹ Mwahayiingire abasuku beeng'we, mani mubasihirise boosi.

¹⁰ Omwaami aboola ati: Mu biha ebyo, njia ohubatusaho efaraasi cheeng'we, haandi njia ohusihirisa ebigaari byeeng'we.

¹¹ Njia ohusihirisa ebiko biri mu syaalo syeeng'we haandi njia ohufunaka-funaka ebiko byeeng'we bi mweesika byoosi.

¹² Njia ohusihirisa eby'obulakusi byeeng'we, haandi haba simwahabe neende abalakusi daawe.

¹³ Ndahamaleo ebifwaanani byeeng'we, neende esiiro cheeng'we, mani haandi haba simwaheenamire ebiindu bi mwaloonga neende amahono keeng'we daawe.

¹⁴ Haandi njia ohusiihula male mu syaalo syeeng'we ebifwaanani bya Aseriimu haandi sihirise ebiko byeeng'we.

¹⁵ Mu tima lyaange neende mu bwaalaba bwaange, njia ohwetuunga hu byaalo bitaambulira byoosi.