Mika 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esyahakwe hu abo abafwiinyirira abamanani

¹ Chibaakaanire abo abalambaala hu bitaanda byaabwe abo abahyeesa obwiire nibatekeha ohwonoona! Nae obwiire nibuhya, nibabihola, olwohuba bali neende obunyala bwohubihola.

² Nibekoomba endalo, nibachinyaka; kata chibe enyuumba, chosi bachiyira. Haba sibatya omuundu oba enyuumba yae, bafwiinyirira omuundu alala neende ebiindu byae.

³ Mani sakira Omwaami aboola ati: “Bone, ndekeha ohubaholaho esibi, mani haba simuchia ohunyala ohweewonia daawe. Mwahabe nimutanyala ohukeenda nimwesuunga, olwohuba ebiha ebyo byahabe ebidinyu.

⁴ Ebiha ebyo nibyahoole, mwaheehole olukaado lw'abo abakwiiswaho amasira. Haandi bahabeembeho olweembo nibabalekeeresa, mani baboole bati, ‘Husihiriire elalira; Omwaami akaluhaanie omukabo kw'abaandu baange; atunyuulire esyaalo syeefwe, mani yaasikaba abasuku beefwe.’ ”

⁵ Mani sakira ebiha nibyahoole esyaalo sikoboserwe abaandu b'Omwaami, abulao owahabe neende omukabo kwoosi daawe.

⁶ Baluwo abayaala nibaboola bati, “Otatuyaala” “Omuundu haba s'ahoyere ohuyaala ebiindu koti ebyo; haba sihucha ohudiirwa esoni daawe.”

⁷ Mubaasa muti Abaisiraeli banyala ohubwaaba batyo? Mubaasa muti Omwaami haba saanyala ohwesimiirisa daawe? Mubaasa muti Omwaami anyala ohuhola ebiindu biri bityo? Emboosi chae haba sichisangaasa abo abahola ebiluungifu daawe?

⁸ Nae Omwaami n'akobolamo ati, “Nae abaandu baange mubekaluuhanisiire, mwabahola abasuku. Munyaka engubo hu baandu bali mu muleembe, abo ababitao neende obweesikwa, nibataaliho neende esiindu sibeyeendeherera syoosi.

⁹ Mwiirusa abahasi b'abaandu baange mu madaala kaabwe kabasangaasa. Abaana baabwe bayere, mubatusaho oluyaali lu ndababeresa olw'endaalo choosi.

¹⁰ Siingire mani muweeo, olwohuba ano abulao abuundu wohuwuuluhiramo. Olwohuba ebyonoono bisihirire bisihirisiire elalira abuundu ano.”

¹¹ Abaandu bano badaha omunabbi obabacha, okeenda n'aboola ati: “Naanga endi mwahanyoole amalwa neende ebimeesa by'amaani.” Omunabbi oyaala atyo niye omulai eyiri abaandu bano.

¹² Nae mubwadyeeri bweene, njia ohubabuusa alala, eng'we mweesi Abaisiraeli, njia ohubuusa alala Abaisiraeli badoong'ao. Njia ohubaleeta alala koti amakoondi kakoboole mu sidwooli. Esyaalo syeeng'we syaheechulemo abaandu mani boobba esiyoka, koti olwaayiro lwiichulamo amakoondi.

¹³ Nasaae achia ohubeekulira engira mani abeemiriremo. Bahafunake esiruwa sy'esiko mani babitiremo nibawaao. Omutuki waabwe, Omwaami mweene, niye owahabeemiriremo.