Mika 1 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Mu ndaalo cha Yotamu, Ahasi, neende Hesekia, abatuki bomu Buyudaaya, Omwaami yaberesa Miika owomu siko sya Moreseti emboosi chino echidiira hu Samaria neende Yerusalemu.

Ohulira Samaria neende Yerusalemu

² Wulire sino, eng'we abaandu, eng'we mweesi-mweesi; Ewe esyaalo, neende buli siindu esihulimo, tekeerese. Mani leha Omwaami Nasaae abe omuloli ohuyiingania, Tekeerese, Omwaami alomaloma naali mu Nyuumba yae njolerefu.

³ Olwohuba bone, Omwaami ali ohwiicha naatula mu bwiihalo bwae bwoolerefu, achia ohwiiha aasi mani akeendere aakulu w'engulu.

⁴ Engulu chichia ohusaanguluhira aasi wae, haandi amahooho kahasaanguluhe, koti ewula yisaanguluhira mu muliro. Chahahulukusire mu mahooho, koti amaachi kahulukusa ohutula hu sigulu.

⁵ Bino byoosi byahabeeo olwohuba Abaisiraeli baholere ebyonoono haandi bajeemere Nasaae. Wiina mweene oli neende omusaango hulw'ebyonoono bya Yisiraeli? Nisyo Samaria esiko syasyo sihuluundu syeene. Haandi wiina oli neende omusaango hulw'esibi sya Buyudaaya? Nisyo Yerusalemu syeene.

⁶ Mani sakira Omwaami aboola ati: “Njia ohuhola Samaria sibe esituuli sy'ebiindu binyasiihe mu syaalo alafu, abuundu wohutaakamo emisabbiibbu. Njia ohusukuna amakina kasyo mu hooho, haandi ndahayabe emisiingi kyasyo.

⁷ Ebiloongaloongwe bilai byasyo byoosi byahanyoonyobolwe mani byaasihiriswa; haandi ebiindu byasyo bisyanyoola byahasaambwe neende omuliro, mani ebiloongaloongwe byasyo byoosi bisihiriswe. Olwohuba byabinyoola ohuba mu mukabo kubereswa abahasi bacheke basyo. Mani byahabuuswe biyirwe abuundu waandi bibe koti omukabo kubaberesa abahasi bacheke.”

⁸ Ao mani Miika n'aboola ati: “Hulwasino, njia ohuhubba wuui haandi njereenjese; njia ohwefwaalulamo engubo neende ebiraato mani ngeende syeekenye; Njia ohusama koti amabbwe, haandi ndire koti ewudo.

⁹ Olwohuba ebikoonjo bya Samaria haba sibinyala ohuwona daawe. Mani Buyudaaya syosi siri aambi ohusaanda mu ngeri nasilala yityo. Ohusaanda hwoolere hu siruwa sy'abaandu baange, hu siruwa sya Yerusalemu omuli abaandu baange.”

Omusuku ali aambi ohwoola Yerusalemu

¹⁰ Mutabooleraho abasuku beefwe abali mu Gaati, ebidiira hu huyiingirwa hweefwe, mutaliraho amasika kata nabudiidi. Eng'we aba Bbetileafura, mweefuufule mu kohe.

¹¹ Eng'we aba Safiri, mudiire engira muchie mu buwaambe nimuli esyeekenye haandi esoni nichibadiirire. Eng'we abomu Saanani, mutatula mu siko syeeng'we. Nimuwulira wuui mu Bbeteseeli, mumanye muti, eyo abulao obwiiruhiro.

¹² Olwohuba abaandu ba Maroti beyeendeherefu muno, baliindire obuhoonyi, olwohuba Omwaami aleetere amasira, kali hu siruwa sya Yerusalemu.

¹³ Eng'we abaandu ba Lakisi, muboye efaraasi hu bigaari. Mwabonera ebyonoono hu Yisiraeli mani nimuleetera Yerusalemu ohwonoona.

¹⁴ Mani sakira museebule esiko sya Moreseti Gaati. Abatuki ba Yisiraeli haba sibahanyoole obuhoonyi mu siko sya Akisibbu.

¹⁵ Eng'we abaandu ba Maresa, Omwaami achia ohubadiisa mu bunyala bw'omusuku weeng'we, abahawaambe esiko syeeng'we. Abaandu b'oluyaali bomu Yisiraeli, bahachie mani beekise mu ng'uungu ya Adulaami.

¹⁶ Mweebekeho efwiiri, mani mulire abaana beeng'we bamwaheera muno. Abeene mweehole abaandu b'ebyoole koti eeswi, olwohuba bachia ohubatusaho abaana beeng'we babayire mu buwaambe.