Matayo 28 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohusyuuha hwa Yesu

¹ Bulaanu, oludaalo lwa Sabbaato niluweere, mu maherebeende kahyeesa oludaalo lutaangira mu juma, Maria Magidalena neende Maria wuundi, bachia ohubona esiriindwa.

² Abweene ao, esyaalo syateengereha muno, olwohuba malaika w'Omwaami yeha ohutula Muukulu, mani yeecha yaasindikisa ekina, yaalitusa hu mulyaango kw'esiriindwa yaliihalaho.

³ Efwaani yae yali koti olumesu, haandi engubo chae chali endafu koti amakina k'efula.

⁴ Abaliindi nibamubona, batya muno, bateengereha, mani baaba koti abafwiire.

⁵ Nae malaika yaboolera abahasi abo ati, “Mutatya daawe; olwohuba manyire endi muli ohukoonya Yesu yibabaamba.

⁶ Haba saali ano; amalire ohusyuuha koti lu yaboola. Mwiiche mubone. Ebyandiiko bihuluundu bihale biindi bisoma biti, Omwaami yali yeyaliise.

⁷ Mani muchie bwaangu muboolere abeeki bae muti, amalire ohusyuuha mu bafu, ngula abataangiriiremo ohuchia Galilaaya; eyo niyo yi muchia ohumubonera. Mbao malire ohubaboolera.”

⁸ Mani batula maangu muno hu siriindwa obuti nibubadiirire alala neende esangaalo, beeruha bachia baboolera abeeki bae.

⁹ Nae bone, Yesu yeecha yabukanana nabo mani yaboola ati, “Ehabi chibe naang'we!” Mani basuda yaali bamudiira hu makulu, baamala bamwiinamira.

¹⁰ Nae Yesu yababoolera ati, “Mutatya daawe; muchie muboolere abaloondi baange bachie Galilaaya, mani eyo niyo yibachia ohumbonera.”

Obuloli bwa baliindi b'esiriindwa

¹¹ Mani abahasi abo nibali basiichichaanga, bone, Abasikaari baandi hu bali baliindire esiriindwa, bachia mu siko, baboolera Abalaamisi bahuluundu buli siindu syoosi esyali syeholehe.

¹² Nae Abalaamisi bahuluundu abo nibamala ohwebuusa alala neende Abeemirisi b'abaandu, beecha bafukiirisania ohuberesa Abasikaari abo eseende nyiingi muno,

¹³ mani nibababoolera bati, “Muboolere abaandu muti, ‘Abeeki bae beechere esiro beeba omubiri kwae efwe nihukona.’

¹⁴ Nae gafana n'awulira bino, efwe huchia ohumwomiisa, mani hubone huti eng'we simukwa mu budinyu bwoosi.”

¹⁵ Abaliindi abo babukula eseende echo, baahola koti lu bababoola; mani ebyo nibyo bi Bayudaaya basiloonderera n'olwaleero.

Yesu abonehera abeeki bae

¹⁶ Abeeki ehumi-na-mulala bachia Galilaaya hu lugulu lu Yesu yali atekehe ohubukaananirayo nabo.

¹⁷ Mani nibamubona, bakwa aasi bamwiinamira; nae abaandi bali basisiiri neende ohukana-kana.

¹⁸ Nae Yesu yababoolera ati, “Bamalire ohuumberesa obunyala bwoosi Muukulu neende hu syaalo.

¹⁹ Sakira muchie muhole abaandu b'ebyaalo byoosi babe abeeki baange; mubabatiise mu liita lya Seefwe, neende elya Mwaana, neende elya Mwooyo Mwoolerefu.

²⁰ Mubeekese ohuloonda amalako koosi ka ndababeresa, haandi mumanye muti, ndi naang'we endaalo choosi ohwoola hu njakamo y'esyaalo.”