Matayo 27 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Bayira Yesu ewa Pilato

¹ Nibwahya mu maherebeende, Abalaamisi bahuluundu boosi, neende Abeemeresi b'abaandu beehala bawuliirisania engira y'ohwiita Yesu;

² mani baamuboya baachia baamudiisa Pilato owali Gafana esiha esyo.

Ohufwa hwa Yuda

³ Nae Yuda omuhobi, niyabona ati bamalire ohuheengera Yesu omusaango kw'ohufwa, yefunaka mani yaakobosera abahuluundu b'Abalaamisi neende Abeemirisi b'abaandu, eseende ch'efeesa, ebituundu amahumi kadatu, mani n'aboola ati,

⁴ “Holere esyonoono mu huhoba amabaanga kataaliho omusaango.” Nabo baboola bati, “Ebyo nibyo siina hweefwe? Ebyo byao omweene!”

⁵ Mani Yuda yaasukuna aasi ebituundu by'efeesa mu Nyuumba ya Nasaae, mani yawaawo yaachia yeemika.

⁶ Nae abahuluundu b'Abalaamisi, babukula ebituundu by'efeesa ebyo, mani baaboola bati, “Sisihoyerwa ohuta eseende chino mu sibiihiro syomu Nyuumba ya Nasaae, olwohuba seende ch'amabaanga nicho.”

⁷ Beecha bawuliirisania, mani baachikulamo eloba hu muloongi w'endamu, ely'ohusiihaangamo Abateende.

⁸ Sakira eloba elyo balilaanga eloba ly'amabaanga ohwoola enyaanga yino.

⁹ Mani, bi munabbi Yeremia yaboola byoolerera biti, “Mani babukula ebituundu by'efeesa amahumi kadatu, obukusi bu baana Baisiraeli baandi bamutaaho,

¹⁰ mani baacheehoonyera ohukula eloba ly'omuloongi w'endamu koti Omwaami luyaandagira.”

Pilato ateeba Yesu ebiteebo

¹¹ Abweene ao, Yesu yeema mu moni wa gafana; mani gafana yaamuteeba ati, “Niiwe omutuki w'Abayudaaya, kose?” Yesu yamukobolamo ati, “Omweene niiwe owahaboola otyo.”

¹² Nae Abalaamisi bahuluundu neende Abeemeresi b'abaandu nibali bamwaayirisa, siyabakobolamo esiindu syoosi.

¹³ Mani Pilato yamuboolera ati, “Ewe haba sowuliraho koti bahwayirisa mu biindu biingi bino biti?”

¹⁴ Nae Yesu siyakobolamo emboosi yoosi kata hu musaango mulala; sino syawukia gafana muno.

Yesu aheengerwa omusaango kw'ohufwa

¹⁵ Hu buli sidyaalo sya Paasaka, yalichiingiwo emiduunga kya gafana ohubalehuliraangaho omuboye mulala, yi baandu baba nibasabire.

¹⁶ Mani mu biha ebyo, bali noomuboye mubi muno olaangwa Bbarabba.

¹⁷ Mani nibaba nibebuusire, Pilato yabateeba ati, “Mudaha mbalehuulire wiina mweene? Bbarabba, Ebyandiiko bihuluundu bihale biindi bisoma biti, Yesu Bbarabba kose Yesu olaangwa Kristo?”

¹⁸ Olwohuba yali amanyire ati embaliha yaabwe niyo eyakera bamudiisa Yesu.

¹⁹ Haandi Pilato niyali yehaale hu sisaala sy'ohuheengeraho emisaango, omuhasi wae yeecha yaamutumira emboosi ati, “Otaholaho esiindu syoosi hu muundu otaliho obubi oyo, olwohuba mbeere neende obunyaahani buungi mu silooto musiro sy'olwaleero.”

²⁰ Nae Abalaamisi bahuluundu neende Abeemeresi b'abaandu bawooya esidiiyiha sy'abaandu basabe Pilato abalehuulire Bbarabba, nae Yesu anyaasibwe.

²¹ Pilato yababoolera ati, “Wiina mweene hu bano boombi yimudaha mbalehuulire?” Mani bakobolamo bati, “Bbarabba.”

²² Pilato yabateeba ati, “Nae Yesu olaangwa Kristo, muhole endye?” Boosi baboola bati, “Leha abaambwe.”

²³ Nae Pilato n'abateeba ati, “Aholere sibi siina?” Nae bemeeda ohuwaasira aakulu nibaboola bati, “Leha abaambwe.”

²⁴ Mani Pilato niyabona ati sibimuhoonya ohuchiiririra neende ebiteebo, olwohuba abaandu bali bemeeda sa ohusasakala, yabukula amaachi, yesaaba amahono, abaandu boosi nibabona n'aboola ati, “Mbulaho omusaango kwoosi hu hutula hw'omuundu wuno; Ebyandiiko bihuluundu biindi bisoma biti, amabaanga moolerefu oba amabaanga k'omuundu mwoolerefu wuno abeene mubone esy'ohuhola.”

²⁵ Nae abaandu boosi bakobolamo bati, “Leha amabaanga kae kabe hweefwe neende hu baana beefwe!”

²⁶ Mani Pilato yamala yaabalehulira Bbarabba. Nae nibamala ohunaala Yesu ehoba, yabadiisa Yesu bachie bamubaambe.

Abasikaari bahoomolera Yesu

²⁷ Mani Abasikaari ba gafana bayira Yesu mu dooho lya Pilato elilaangwa “Praetoriumu”, mani eye lyoosi lyeecha lyamwebodoohania.

²⁸ Mani baamufwaalula engubo chae, baamufwaasa ekaanju lyapapo.

²⁹ Mani nibasiinga engata y'amawa nibamufwaasa hu mutwe koti ekofia y'obutuki, mani nibamudiisa omukwaajo mu muhono kwae muluungi. Mani nibasigama mu moni wae, nibamumooholera nibaboola bati “Yiindira, ewe omutuki w'Abayudaaya!”

³⁰ Mani bamufuuchaho amate, haandi baabukula ekada bamuhuyira hu mutwe.

³¹ Nibamala ohumuhomoola batyo, baamufwaalulamo ekaanju, baamufwaasa engubo chae cheene, mani baamutusa erwaanyi ohumubaamba.

Yesu abaambwa hu musalabba

³² Nibali nibatula erwaanyi, babukaanana neende omusaacha otula Sireeni olaangwa Simooni. Mani baamuyiika ohwedwiiha omusalabba kwa Yesu.

³³ Nae niboola abuundu alaangwa ati, “Gologoota” (amahuluundu kasyo mbwe, abuundu w'ebyangaanga),

³⁴ baberesa Yesu efiini yi basaasiremo ekaha; nae ni yayihoombaho, yahaya ohuying'wa.

³⁵ Nae nibamala ohumubaamba, bakabana engubo chae nibachubbira eha;

³⁶ mani beehala ao ohumuliinda.

³⁷ Nae aakulu w'omutwe kwae nibataao omusaango kumufwaambya nikusoma kuti, “Wuno niye Yesu, Omutuki w'Abayudaaya.”

³⁸ Abweene ao baba babaambiireo abeebi baandi babiri alala neende Yesu, mulala hu muhono muluungi kwa Yesu nae owuundi hu muhono mukaada.

³⁹ Mani abaandu ni babitiraangao bayuuyaanga sa emitwe

⁴⁰ nibaboola bati, “Ewe owali onyala ohulikula enyuumba ya Nasaae haandi wayoombaha mu ndaalo chidatu, weewonieho omweene! Nooli Omwaana wa Nasaae, bulaanu yiha otuleho hu musalabba okwo hubone.”

⁴¹ Mu ngeri nasilala eyo niyo yi Balaamisi bahuluundu, neende Abeekesa b'Amalako alala neende Abeemirisi b'abaandu, bamuhomoolaanga, nibaboola bati,

⁴² “Oyo yawonia abaandi, nae omweene haba saanyala ohweewonia. Oyo niye Omutuki w'Abaisiraeli; leha yeeheho hu Musalabba mani humufukiiriremo.

⁴³ Yeesika mu Nasaae, leha bulaanu Nasaae amuwonie naaba naamudaha; olwohuba yaboola ati, ‘Niise Omwaana wa Nasaae.’ ”

⁴⁴ Haandi abeebi baba nibabaambirwe alala nae bosi bamuhomoolera mu ngeri nasilala eyo.

Ohufwa hwa Yesu

⁴⁵ Bulaanu ohutula esaa chisaasaba, esiirima syadiira esyaalo syoosi ohwoola esaa chitaanu-na-chine.

⁴⁶ Mani aambi w'esaa chitaanu-na-chine, Yesu yalira neende ekono ly'aakulu ati, “Eli, Eli, lema sabaki-tani?” Amahuluundu keene mbwe, “Nasaae waange, Nasaae waange, lwasiina wunjwaang'ire?”

⁴⁷ Nae abaandi hu baandu bali beemere ao nibawulira esyo, baboola bati, “Omuundu wuno nga mbao ali ohulaanga Elija.”

⁴⁸ Mulala hu baandu abo, yeeruha bwaangu yabukula esyaangu, yaasiiniha mu fiini yahaliha, yaasita hu kada, mani yaamuberesa ati ang'we.

⁴⁹ Nae abaandi baboola bati, “Muliinde huboneho Elija naneeche yaamuwonia.” Ebyandiiko bihuluundu bihale biindi biingisaangamo biti, Haandi omuundu wuundi yabukula efumo yaamufumita mu mbafu, mani amaachi alala neende amabaanga byeediha

⁵⁰ Nae Yesu yalirira mu kono ly'aakulu ehabi liindi, mani yaakwisa omwooyo.

⁵¹ Nae bone, epasya yomu Nyuumba ya Nasaae, yataanduhamo akati, ohutula aakulu ohwoolera elalira aasi; mani esyaalo syaateengereha, enyaanda chaadihana;

⁵² ebiriindwa byosi byeekuha, haandi emibiri ky'abaandu ba Nasaae baangi abali nibafwa baalamuha.

⁵³ Nae nibatula mu ng'ani Yesu naamalire ohusyuuha mu bafu, bachia mu siko syoolerefu, mani baabonehera abaandu baandi.

⁵⁴ Nae omusikaari muhunuufu alala neende abo ba yali nabo nibaliindire Yesu, nibabona ohuteengereha hw'esyaalo, neende ebyo byoosi ebyeeholeha, batya muno baaboola bati, “Mubwadyeeri bweene, wuno abeere Omwaana wa Nasaae!”

⁵⁵ Ao wosi waliwo abahasi baangi, nibeemere nibewuunjiraanga eyale. Bano nibo abali baloondere hu Yesu ohutula Galilaaya nibamuhalaabaniraanga;

⁵⁶ mwaabo mwalimo Maria Magidalena, neende Maria ng'ina Yakobbo neende Yosefu, neende ng'ina baana ba Sebbedaayo.

Ohusiihwa hwa Yesu

⁵⁷ Mani obwiire nibweera, omusaacha muyiinda otula Arimatea olaangwa Yosefu yoola; wuno yesi yali omweeki wa Yesu.

⁵⁸ Yosefu yachia eyiri Pilato yaamusaba omubiri kwa Yesu. Mani Pilato yaalagira ati, bamubeerese omubiri kwa Yesu.

⁵⁹ Yosefu yabukula omubiri okwo, yaakuboya mu suuka lafu,

⁶⁰ mani yaakuta mu ng'ani yae njaaha, yi bali babaachire mu lwaanda; mani yaasindikisa okukina kuhoongo yakwiikalira hu ng'ani, yaamala yaawaawo.

⁶¹ Maria Magidalena, neende Maria wuundi, bali baliwo nibehaale aasi nibewuunjire esiriindwa.

Ohuliinda esiriindwa

⁶² Nibwahya, oludaalo luloondaho hulw'ohwetekehera, Abalaamisi bahuluundu neende Abafarisaayo bebuusira eyiri Pilato,

⁶³ mani baaboola bati, Omwaami, efwe hwiichulisa koti omubacha oyo yaboola n'asisiiri omulamu ati, Oluunyuma lw'endaalo chidatu, njia ohusyuuha haandi.

⁶⁴ Sakira lagira baliinde esiriindwa bulai ohwoola hu ludaalo lwohudatu, ataali ao, abeeki bae banyala ohuchia bamwiibamo, mani biamala baboolera abaandu bati, “Asyuuhire mu bafu, mani obubacha bumaliirihayo buchia ohuba obubi muno ohuhiraho obwataangira.”

⁶⁵ Pilato yababoolera ati, “Eng'we muli neende Abasikaari muyire omusikaari mulala aliinde; muchie mubone muti esiriindwa basiliinda bulai muno koti lu munyala.”

⁶⁶ Mani bachia bawomera bulai ekina lyali hu siriindwa, bataao omusikaari, babona bati buli siindu siri bulai bweene.