Matayo 26 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Olukwe lw'ohwiita Yesu

¹ Olwoola, Yesu niyamala ohulomaloma ebiindu bino byoosi, yabolera abeeki bae ati,

² “Mumanyire muti endaalo chibiri nichiwa sa chiti, Esidyaalo sya Paasaka sichia ohwoola, mani Omwaana w'Omuundu achia ohudiiswa mu mahono k'abaandu bachia ohumubaamba hu musalabba.”

³ Mani Abalaamisi bahuluundu neende abeemirisi b'abaandu beecha bahung'aanira mu lwaanyi lwa Omulaamisi muhuluundu olaangwa Kayaafa,

⁴ mani baahola olukwe lw'ohudiira Yesu bamwiite mu bweekisi.

⁵ Nae beecha baaboola bati, “Hutahola sino hu ludaalo luhuluundu, olwohuba abaandu banyala ohukwaamo esiisi.”

Yesu abahwa amafuta naali Bbetani

⁶ Yesu niyali Bbetani mu nyuumba ya Simooni, owali yalwaalaho obulwaae bw'ebigeenge,

⁷ omuhasi wuundi yeecha eyiri Yesu n'ali neende echupa y'amafuta k'esing'aari haandi ak'obukusi bw'aakulu, mani yaakamuchuha hu mutwe. Yesu yali niyehaale naalya.

⁸ Nae abeeki bae nibabona batyo, haba sibawulira bulai daawe, baboola bati, “Ohunyaasa amafuta mutyo hwaasi?

⁹ Olwohuba amafuta kano bahakakusiremo hu obukusi bw'aakulu muno, mani eseende chahatuliremo bahachikabiire abamanani.”

¹⁰ Nae Yesu koti lu yali n'amanyire bino yababoolera ati, “Eng'we, omuhasi wuno mumufwaambya siina syeene? Koti sa luyaaholeere esiindu silai muno siti, kose?

¹¹ Buli siha muli neende abamanani, nae simuchia ohuba naange ebiha byoosi.

¹² Olwohuba omuhasi wuno yaanjuhireho amafuta kano naatekeha omubiri kwaange ohuchia ohusiihwa.

¹³ Mbaboolera obwadyeeri endi, buli abuundu woosi, mu syaalo syoosi, buli yibaneekeseenge Emboosi Endai yino, esiindu si yaholeere sino, bachia ohusilomalomaangaho sa ohumwiichulisa.”

Yuda afukiirira ohulya mu Yesu olukwe

¹⁴ Olwoola, mulala hu beeki ehumi-na-babiri, olaangwa Yuda Yisikarioti yachia eyiri Abalaamisi bahuluundu,

¹⁵ mani yaabateeba ati, “Munaamberesa siina syeene ni mbadiisa Yesu?” Mani ni bamubalira eseende ch'efeesa ebituundu amahumi kadatu bamuberesa.

¹⁶ Ohutula ebiha ebyo, Yuda yachaaka ohukiiya engira yaanyala ohuliira mu Yesu olukwe.

Yesu alya Esidyaalo sya Paasaka neende abeeki bae

¹⁷ Bulaanu, hu ludaalo lutaangira lw'esidyaalo sy'Emigaati Ekitabbaahirwe, abeeki ba Yesu beecha yaali baamuteeba bati, “Mani odaha huhutekehere yeena bweene aw'ohuliira Esidyaalo sya Paasaka?”

¹⁸ Nae yababoolera ati, “Muchie mu siko, mu daala ly'omuundu wuundi mani mumuboolere muti, ‘Omweekesa aboola ati, ebiha byaange mbao byoolere. Njia ohuliira Esidyaalo sya Paasaka alala neende abeeki baange mu nyuumba yao.’ ”

¹⁹ Mani abeeki beemao baahola koti lu Yesu yababoolera, mani baachia baatekeha Esidyaalo sya Paasaka.

²⁰ Nibwoola engoloobe, Yesu yeehala alala neende abeeki ehumi-na-babiri, bachaaka ohulya.

²¹ Mani nibali balya, Yesu yaboola ati, “Mbaboolera obwadyeeri endi mulala hweeng'we achia ohuundyaamo olukwe.”

²² Abeeki bawuka muno, baachaaka ohumuteebaanga sya mulala-mulala bati, “Omwaami, oli ohuboolaanga ese, kose?”

²³ Yesu yakobolamo ati, “Oyo odoonga naange mu saani ndala niye ochia ohuundyaamo olukwe.

²⁴ Mani Omwaana w'Omuundu achia ohufwa koti lu byandiiko byoolerefu bi muboolaho, nae chiakaanire oyo ochia ohulya mu Omwaana w'Omuundu olukwe! Byahahirire omuundu oyo obuteebulwa!”

²⁵ Abweene ao Yuda omuhobi yalomalomera aakulu ati, “Omweekesa, oli ohuboola ese, kose?” Nae Yesu yaamuboolera ati, “Mbao omweene oboolere.”

Esy'engoloobe sy'Omwaami

²⁶ Bulaanu nibali nibasiilya, Yesu yabukula omugaati, yaakusabira ehabi, yaakumekula-mekula mani yaakuberesa abeeki bae n'aboola ati, “Mubukule mulye, kuno nikwo omubiri kwaange.”

²⁷ Haandi yabukula esikoombe, mani niyamala ohweebasa, yasiberesa abeeki bae n'aboola ati, “Mubukule, mung'we hu sino mweesi;

²⁸ olwohuba kano niko amabaanga kaange ak'Endagaano akachia ohwiidiha hulw'abaandu baangi hulw'ohuleherwamo ebyonoono.

²⁹ Mbaboolera endi siinjia hung'waaho haandi hu syaamo sy'efiini sino ohwoola hu ludaalo lundahang'weereho efiini njaaha alala naang'we mu Obwaami bwa Laata.”

³⁰ Mani nibamala ohweemba olweembo lw'ohufumia Nasaae, batula baachia hu lugulu lw'Emiseituuni.

Yesu atuumbula ohwekaana hwa Petero

³¹ Abweene ao, Yesu yababoolera ati, “Mweesi muchia ohwiiruha muundehe syeng'ene esiro sy'enyaanga yino, olwohuba syandiikwa siti, ‘Njia ohuhubba omwaayi, mani amakoondi k'omusidwooli kasalaane.’

³² Nae niimalire ohusyuuha, njia ohubataangiriramo ohuchia Galilaaya.”

³³ Petero yalomalomera alafu naamuboolera ati, “Kata neende abaandi boosi bahulehe, ese haba siinjia huhuleha daawe.”

³⁴ Yesu yamuboolera ati, “Huboolera obwadyeeri bweene endi, esiro sy'enyaanga yino, engoho niyisisiiri ohuholyoohaho, onaba wundekaanire amahabi kadatu.”

³⁵ Petero nae yamuboolera ati, “Kata nihuli ohufwa naawe, haba siinjia ohuhwekaanaho daawe.” Mani nilwo nasilala lu beeki baandi bosi baboola.

Yesu asaba Nasaae naali mu Getisemane

³⁶ Bulaanu, Yesu yamala yaachia neende abeeki bae abuundu alaangwa ati, Getisemane, mani yaboolera abeeki bae ati, “Eng'we mudoong'eho ano, njieho aala ndekongooye.”

³⁷ Niyamala atyo, yabukula Petero neende abaana ba Sebbedaayo babiri mani yaachia nabo. Engisa yamudiira muno, yaaba neende esibeera siingi.

³⁸ Mani yaababoolera ati, “Engisa enyiingi yi ndi hu mwooyo, kata yinyala sa ohunjita-bwiita. Eng'we mudoong'eho sa ano mani mube naange.”

³⁹ Mani niyasudaho budiidi mu moni ati, yeenama, yageng'a aasi obweeni bwae mani yaasaba n'aboola ati, “Laata, nisinyalihana, esikoombe syohusaandisibwa sino sihaye ohuunjolaho; nae sitaba koti lu ese ndaha, ohutusaho sibe koti lu ewe odaha.”

⁴⁰ Nae niyakaluha eyiri abeeki bae yabanyoola nibakona mani naaboolera Petero ati, “Eng'we haba simunyala ohumokaho naange kata esaa ndala yoong'ene?

⁴¹ Muliinde, mani musabe hu muhaye ohukwa mu mateemo. Omwooyo kweenya sa nae omubiri nikwo omukata.”

⁴² Haandi ehabi lyohubiri, yasiingira yaachia ohwekongooya n'aboola ati, “Laata, esikoombe sino, nisitachia ohuundulaho nitasing'weere, leha syoodaha nisyo esiba siholebwe.”

⁴³ Yakobola haandi yanyoola nibakona olwohuba emoni chaabwe chali chisidooye, chichuule endoolo.

⁴⁴ Mani yaabaleha ao, haandi yaachia ohwekongooya ehabi lyohudatu n'aboola emboosi nasilala echo.

⁴⁵ Yakobola eyiri abeeki bae mani yaboola ati, “Eng'we musiikonere sa nimwewuluhira? Bone! Ebiha mbano byahoola eby'ohuliiramo Omwaana w'Omuundu olukwe, bamudiise mu mahono k'abonooni.

⁴⁶ Musiingire huweeo; omuhobi nguno amalire ohwoola.”

Ohudiirwa hwa Yesu

⁴⁷ Yali nasiilomalomaanga atyo, Yuda, mulala hu beeki ehumi-na-babiri niyoola. Yaba ali neende esidiiyiha sy'abaandu nibakiingire engaanga neende endabuhi nibatula eyiri Abalaamisi bahuluundu neende abeemirisi b'Abayudaaya.

⁴⁸ Bulaanu omuhobi oyo yali amalire ohuwuliirisania neende esidiiyiha esyo ohubaberesa ahalolero mbwe, “Oyo yindaakwe mu sirifu niye yi mweenya, mumukweeho mumudire.”

⁴⁹ Yuda niyoola yachooma sa Yesu tiiri mani n'aboola ati, “Omweekesa, omuleembe kube naawe!” Mani yaamukwa mu sirifu.

⁵⁰ Yesu yaamukobolamo ati, “Wasyaange, siina esihuleetere?” Mani beecha baakwa hu Yesu mani baamudiira.

⁵¹ Nae bone, mulala hu abo abali neende Yesu, yachoolayo olugaanga yaatemaho ohutwi hw'omuwaambe w'Omulaamisi muhuluundu.

⁵² Nae Yesu yamuboolera ati, “Kalusa olugaanga lwao mu silaalo syalwo, olwohuba abo boosi abehoonyera olugaanga, balifwa olugaanga.

⁵³ Mubaasa muti sinyala ohwekongooya Laata yamberesa obuhoonyi, ni abweene ao atume eye lya bamalaika emikaanda kihira ehumi-na-kibiri?

⁵⁴ Nae nibyahabeere bityo, ebyandiiko byoolerefu ebiboola biti, bino bihoyere ohuholwa, byahoolerere bitye?”

⁵⁵ Esiha esyo, Yesu yalomaloma neende esidiiyiha esyo yaboola ati, “Mwiichire neende engaanga alala neende endabuhi ohundiira, koti abeechera omwiibi? Buli ludaalo mbechaanga niinjekesa mu Nyuumba ya Nasaae nae lwasiina haba simundiiraangaho.

⁵⁶ Nae bino byoosi biholwe hu byandiiko byoolerefu bi banabbi baandiika byoolerere abweene.” Mani abeeki boosi beecha beeruha baleha Yesu yeeng'ene.

Yesu ayaasibwa mu siina

⁵⁷ Abo abali badiirire Yesu beemao baamuyira ewa Kayaafa omulaamisi muhuluundu, yi abeekesa b'Amalako neende abeemirisi b'abaandu bali nibebuusiire.

⁵⁸ Nae Petero yamuloondaangaho sa enyuma ohwoola lu boola mu lwaanyi lw'omulaamisi muhuluundu oyo. Yeengira mu lwaanyi mani yeehala aasi neende abaliindi naadaha ohubona koti lu buli siindu sinaabe.

⁵⁹ Bulaanu Omulaamisi Muhuluundu neende ab'esiina boosi bateemaho ohukoonyeresa obuloli bw'obubacha obudiira hu Yesu obunyala ohukera bamwiita;

⁶⁰ nae haba sibanyoolaho esiindu syoosi. Kata katyo mbwe abaandu baangi bateemaho ohulomaloma eby'obubacha hu Yesu. Luunyuma abaandu babiri bamala beema,

⁶¹ baboola bati, “Omuundu wuno yaboola ati, ‘Nyala ohulikula enyuumba ya Nasaae yino, haandi ndayoombahira mu ndaalo chidatu.’ ”

⁶² Mani Omulaamisi muhuluundu, yasiingira yateeba Yesu ati, “Obulaho neende esy'ohukobolamo kata silala? Siina syeene si bano bahufwaambya?”

⁶³ Yesu nae yabuleera-buwuleera. Omulaamisi muhuluundu, yakobolamo n'aboola ati, “Mu liita lya Nasaae mulamu, ndaha weechube: Tuboolere nooli Kristo Omwaana wa Nasaae.”

⁶⁴ Yesu nae Yamuboolera ati, “Niiwe oboolere otyo. Nae mbaboolera endi, ohutula enyaanga yino, muchia ohubona Omwaana w'Omuundu niyehaale hu muhono muluungi kw'oyo oli n'obunyala bwoosi, haandi niyeechera mu maleesi ko Muukulu.”

⁶⁵ Mani Omulaamisi muhuluundu, yataandula engubo chae yaboola ati, “Ngandi enomanoma yino y'ohufwoola Nasaae. Lwasiina haandi hukoonya obuloli buundi? Mbao abeene mweewuliirireho emboosi chae embi echo.

⁶⁶ Nae eng'we muheengao mutye?” Bakobolamo bati, “Ahoyera ohufwa sa.”

⁶⁷ Abweene ao bachaaka ohumufuuchaho amate mu moni alala neende ohumuhuya; nae abaandi bamupaama nibaboola bati,

⁶⁸ “Ewe Kristo, tutumbulireho. Wiina mweene ohuhuyire?”

Petero yekaana Yesu

⁶⁹ Esiha esyo, Petero yali yehaale erwaanyi mu lwaanyi, nae omuhaana mulala hu bahalaabani b'Omulaamisi Muhuluundu yeecha yali yamuboolera ati, “Ewe wesi obeere neende Yesu Omugalilaaya.”

⁷⁰ Nae Petero yekaana muno mu moni w'abaandu boosi ati, “Ese ngoterwe byooli ohuboola ebyo.”

⁷¹ Niyamala atyo yasiingira yaachia mu siruwa. Omuhaana wuundi yamubona ao, yaboolera abali beemere ao ati “Omusaacha wuno yesi abeere neende Yesu Omunasareeti.”

⁷² Petero haandi yekaana niyechuba ati, “Omuundu oyo, ese haba simumanyireho daawe.”

⁷³ Ebiha bidiidi nibyabitao, abali nibeemere ao, beecha eyiri Petero mani baamuboolera bati, “Mubwadyeeri bweene, ewe oli mulala hu baandu bae, olwohuba engeri yoolomalomeramo yihubuula sa.”

⁷⁴ Haandi Petero yachaaka ohwekaana niyechuba ati, “Omusaacha oyo ese mukoterweho.” Abweene ao, edaaywa niyiholyooha.

⁷⁵ Mani Petero yeechulisa bulai bweene bi Yesu yaboola ati, “Edaaywa niyisisiiri ohuholyooha, onaabe wundekaanire amahabi kadatu.” Mani yaatula erwaanyi yaalira muno.