Matayo 24 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yesu alomaloma hu husihiriswa hw'Enyuumba ya Nasaae

¹ Yesu niyali naatula mu Nyuumba ya Nasaae, abeeki bae beecha bamweekesa koti lu Nyuumba ya Nasaae eyo yoombahwa bulai.

² Nae yabakobolamo ati, “Eng'we mubona ebiindu bino byoosi koti lu biri? Mbaboolera obwadyeeri endi, libulao ekina lichia ohudoong'a hu liindi nilitaagemuulwe.”

Obudinyu neende ohusaandisibwa

³ Yesu niyali niyehaale hu lugulu lw'Emiseituuni, abeeki bae beecha yaali mu bweekisi, baamusaba nibaboola bati, “Tuboolereho oludaalo lweene lu biindu bino byahakwiireo, haandi halolero siina ahalyeekesa ohwiicha hwao neende enjakamo y'esyaalo?”

⁴ Yesu yabakobolamo ati, “Mweliinde omuundu yeesi ahaye ohubabachirisaho naabakosa.

⁵ Olwohuba, abaandu baangi baheeche mu liita lyaange nibaboola bati, ‘Niise Kristo,’ mani bachia ohukosa abaandu abaangi.

⁶ Haandi mwahawulire ebiita by'aambi neende eby'eyale, nae mutesiinduhaanga hulwabyo daawe, olwohuba bino nibyo ebiindu bihoyere ohubaao, nae enjakamo y'esyaalo nayo yisisiiri ohwoola.

⁷ Olwohuba, esyaalo silala syahaseete esiindi, haandi obutuki bwosi bwahaseete obutuki buundi. Haandi yahakweeo enjala neende ohutengereha hw'esyaalo mu bituundu biingi.

⁸ Bino byoosi nihwo sa ohuchaaka hw'ohusaanda, koti obuchuuni butaangiraanga ohuba hu muhasi omwaana naali aambi ohwiibulwa.

⁹ “Mani bachia ohubawaamba babasaandye, haandi babeete. Haandi abaandu boosi bachia ohubasyuulaanga hulw'eliita lyaange.

¹⁰ Abaandu baangi bahalehuulire efukiirira hulweebyo, bahobe abaasyaabwe, mani basyuulane abeene-na-beene.

¹¹ Nae abanabbi bobubacha baangi bachia ohwiicha babache abaandu baangi, mani babakose.

¹² Obwonooni bwahemeede bwaasaalaanira mu syaalo mani byaakera obuheeri bw'abaandu baangi bwaanyita.

¹³ Nae, omuundu wahagumire ebidinyu ebyo ohwoola hu njakamo, niye owahawone.

¹⁴ Haandi Emboosi Ndai y'Obwaami bwa Nasaae buno, yichia ohuyaalwa mu syaalo syoosi, sibe esyohuboneraho eyiri abaandu boosi, hu njakamo y'esyaalo yimale yoole.

Obuti bw'amakana

¹⁵ “Mani nimubonaanga amatiichasi k'amasira k'omunabbi Danieli yalomalomaho hale niketeengeehe abuundu woolerefu, (leha omuundu osoma emboosi chino, amanyirise amahuluundu kachio),

¹⁶ nilwo lu baandu bali mu Yudea baheeruhire mu ngulu.

¹⁷ Nae omuundu wahabe hu sirama sy'enyuumba, haba siyahanyaleho ohwiiha aasi ohubukula ebiri mu nyuumba yae.

¹⁸ Haandi omuundu wahabe naali mu ndalo, haba siyanyaleho ohukobola engo wae ohweenda engubo chae.

¹⁹ Chiahaakaane muno abahasi baliba nibali aasito, mu ndaalo echo, alala neende abahasi baliba nibali neende abaana badoto basiinuuna!

²⁰ Nae eng'we musabe muti ebiha by'ohwiiruhiramo hweeng'we ebyo, bihaye ohubaao mu ndaalo ch'etoocho, oba hu ludaalo lwa Sabbaato!

²¹ Olwohuba ebiha ebyo ohusaanda hwamakana huchia ohubaao ohutabechaangahoo ohutula esyaalo nisiloongwa ohwoola bulaanu buti, haandi sihwahabeeo ehabi liindi daawe.

²² Haandi endaalo echo chiba nichitaheendeeswaho, abulao omuundu yeesi owahaonere daawe. Nae hulw'obulai bw'abaandu balobole ba Nasaae, endaalo echo chaheendeeswaho.

²³ Mani omuundu yeesi n'ababooleraanga ati, ‘Mubone Kristo, nguno!’ Kata ati, ‘Ngula’ mutasifukiiriraanga.

²⁴ Olwohuba yahabeeo abelaanga Kristo bataali badyeeri, neende abelaanga abanabbi abataali badyeeri. Bachia ohwoola baholeenge eby'amayia biingi by'ohubachirisa abaandu, haandi nisinyaliha bakose kata neende abadoole ba Nasaae bosi.

²⁵ Mani sakira mweliinde, mbao malire ohubalabula hale-hale oludaalo olwo nilutoola.

²⁶ Sakira, nibababooleraanga bati, ‘Boneho ngula ali mu sichiimi sira,’ mutachichaangayo; haandi nibaboola bati, ‘Boneho nguno yeekisire muno, mutasifukiiriraanga.’

²⁷ Olwohuba koti lu lumesu lw'efula lumesuhaanga ohutula ebukwe ohwoola emuumbo, nilwo nasilala lu hwiicha hw'Omwaana w'Omuundu huchia ohuba.

²⁸ Olwohuba, yi mulaambo kuli, niwo yi ngosya chaheebuusire alala.

Ohukobola hw'Omwaana w'Omuundu

²⁹ “‘Ohusaanda hw'endaalo echo nihwahawe huti; elyuuba lyaheerime, haandi omwoosi sikwahaaduhe. Eng'ining'ini chahabuluunguhe ohutula Muukulu, haandi amaani ko Muukulu kachia ohudengaana.’

³⁰ Ao niwo yi halolero h'omwaana w'Omuundu hachia ohubonehera Muukulu, haandi abaandu bohu syaalo boosi bachia ohulira haandi bachia ohubona Omwaana w'Omuundu naakobolera mu maleesi ko Muukulu naali neende amaani alala neende oluyaali luhoongo muno.

³¹ Mani achia ohutuma bamalaika bae ohuubba eturumbete neende ekono hoongo, mani babuuse alala abalobole bae ohutula mu mbeka ch'esyaalo choosi, ohutula hu lubeka lulala lw'ekulu ohwoola hu luundi.

Amahuluundu ka hweeka ohutula hu mutuli

³² “Bulaanu mweeke elyeeko ohutula hu mutuli. Esaga lyakwo nililoha sa amasaafu madoto liti, ni mumanyirao muti, endaalo ch'esiminyu chiri aambi.

³³ Sakira eng'we mwesi nimubona ebiindu bino byoosi nibyeehola, manyeenge muti, ali aambi ohwoola, ali hu siruwa bweene.

³⁴ Mbaboolera obwadyeeri endi, oluse luno silwahafwe lwaawa ebiindu bino byoosi nibiteeholeha.

³⁵ Ekulu neende esyaalo bichia ohuwaao, nae emboosi chaange haba sichahaweeo daawe.

Abulao omanyire oludaalo kata ebiha

³⁶ “Nae oludaalo lweene olwo, kata ebiha byeene, abulao omuundu omanyireho, kata bamalaika bo Muukulu, kata Omwaana ohutusaho Laataang'ene yeeng'ene niye obimanyire.

³⁷ Koti lu byali mu ndaalo cha Nowa, haandi nilwo nasilala lu bichia ohuba hu ludaalo lu Omwaana w'Omuundu yaheechereho.

³⁸ Olwohuba, oludaalo lw'amaachi k'ofwomboole, nilusiiri ohwoola, abaandi balichaanga, bang'wa, abasaacha badeehya, haandi abahasi badeeha, ohwoola hu ludaalo lu Nowa yeengiriraho mu lyaato.

³⁹ Nae haba sibanyala ohumanyaho ohwoola lu maachi k'ofwomboole keechera kaabamira. Nasilala nilwo lu byahabe hu ludaalo lu Omwaana w'Omuundu achia ohukoboleraho.

⁴⁰ Ebiha ebyo, abasaacha babiri bahabecheenge mu ndalo, mani mulala abukulwa, nae owaasye alehwa.

⁴¹ Abahasi babiri bahabecheenge nibasia hu lukina, mani mulala abukulwa nae owuundi alehwa.

⁴² Mani sakira mbaboolera endi mubecheenge abeetekefu, olwohuba mukoterwe oludaalo lu Omwaami yahakaluhireho.

⁴³ Nae mumanyeenge muti, omweene nyuumba aba niyahamanyireenge ebiha by'esiro bi mwiibi yeecheramo, aba yaheetekeeheenge, mani ahaya ohukanya omwiibi yaafunaka enyuumba yae.

⁴⁴ Sakira eng'we mwesi mubecheenge abeetekefu, olwohuba Omwaana w'Omuundu achia ohukobola mu biha bi mutamubaasirisiramo.

Omuhalaabani mweesikwa neende otaali omweesikwa

⁴⁵ “Nae muundu siina oba omuhalaabani mukesikesi haandi omweesikwa? Niye yi mwaami wae ataawo ohuliindaanga edaala lyae neende ohuberesaanga abaandu bomuungo mwae ebyohulya mu biha bihoyera.

⁴⁶ Omuhalaabani oyo, aba ali ow'ehabi, yi mwaami wae akobola, mani yaamwaakaana naahola emirimo kyae ekyo.

⁴⁷ Mbaboolera obwadyeeri endi, omwaami wae oyo aba achia ohumuhola aliinde emyaandu kyae kyoosi.

⁴⁸ Nae niwiichuhira omuhalaabani yaaba omubi, omweene yachaaka ohweeboolera mu mwooyo kwae ati, omweeneengo wae ahiindire muno ohukobola,

⁴⁹ mani yachaaka ohuhuya abahalaabani baasye, haandi yachaaka ohulya neende ohung'wera alala neende abameesi,

⁵⁰ omwaami wae aba achia ohukaluha hu ludaalo lw'atamubaasirisiramo neende mu biha bi ataamanyire.

⁵¹ Omweeneengo oyo aba achia ohumusaandya, haandi amube esinyaaso alala neende abebachirisi, eyo niyo yi baba bachia ohulirira alala nibeesia ameeno.