Matayo 23 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yesu alabula abaandu ohweliinda eyiri abeekesa b'Amalako neende Abafarisaayo

¹ Olwoola, Yesu yaboolera esidiiyiha sy'abaandu, alala neende abeeki bae ati,

² “Abeekesa b'Amalako neende Abafarisaayo, nibo abali mu bweyaango bwa Musa bw'ohweekesa amalako,

³ sakira muhoyere ohuholaanga alala neende ohuwuliraanga byoosi-byoosi bi bababoolera, nae mutaholaanga koti lu bahola, olwohuba sibaholaanga bi beekesa.

⁴ Baboyaanga emigugu misito kitanyaliha mani bakidwiiha hu mabeka k'abaandu baandi, nae abeene nibatateemaho ohugeeng'a kata sa olwaala lw'omuhono kwaabwe hu mugugu musito okwo ohubahoonya.

⁵ Buli siindu si bahola, bachiiririraanga sa mbwe hu baandu bababone. Mani muboneho koti lu babambaliyaanga ebibandiiho by'ebyaandiiko byoolerefu, babyeebaandiiha hu bweeni, neende hu maambala; haandi bahola amakemo k'amaganjuula kaabwe kaba amaleeyi, haandi amatakalafu.

⁶ Baheera muno obwiihalo bw'oluyaali nibali hu sidyaalo, kata mu Sinagoogi;

⁷ haandi baheera muno ohubereswaanga oluyaali luhoongo mu biito, neende abaandu ohubafumia bati, Abeekesa! Abeekesa!

⁸ Nae eng'we haba simuhoyere ohulaangwaanga muti, ‘Omweekesa,’ olwohuba muli neende omweekesa mulala yeeng'ene, niye Kristo, nae eng'we mweesi muli abeebulanwa.

⁹ Haandi mutalaangaanga omuundu yeesi hu syaalo huno muti, ‘Seefwe’ olwohuba muli neende Seeng'we mulala yeeng'ene, oli Muukulu.

¹⁰ Haandi batabalangaanga bati, ‘Abaami’ olwohuba muli neende Omwaami mulala yeeng'ene, niye Kristo.

¹¹ Omuundu ohiramo oluyaali mweeng'we, ahoyere ohubechaanga omuhalaabani weeng'we.

¹² Omuundu yeesi, oweniinia omweene, achia ohwiiswaanga aasi, nae omuundu yeesi oweyisa aasi, achia ohuniinisibwaanga.

Yesu abwaaba obweebachirisi bw'abahoongo b'ediini

¹³ “Chibaakaanire eng'we, Abafarisaayo alala neende Abaandiiki b'Amalako. Abebachirisi eng'we! Olwohuba mwiikaliraanga abaandu omulyaango kuchia mu bwaami bwo Muukulu, nae eng'we beene simwiingiriramo daawe, haandi haba simufukiirira abo abadaha ohwiingiriramo beengira.

¹⁴ Chibaakaanire eng'we, Abeekesa b'Amalako neende Abafarisaayo. Abebachirisi eng'we! Mung'uulaanga abahasi bafwiire enyuumba chaabwe, mani mumala mwekaadirisira hu husaba huleeyi muno! Sakira muchia ohunyoola esinyaaso sihiramo obuhoongo.

¹⁵ Chibaakaanire eng'we, Abeekesa b'Amalako neende Abafarisaayo. Abebachirisi eng'we! Mukeendaanaanga hu syaalo, ni mwaambuha-yambuha enyaanja, ohwoola lu mukaluuhanisira omuundu kata mulala sa, yeengira mu diini yeeng'we. Mani nimumala ohumukaluuhania, mukeraanga omuundu oyo yeehola omubi w'ohuchia mu nyaanja y'omuliro, amahabi kabiri ohuhiraho eng'we beene!

¹⁶ “Chibaakaanire eng'we, abeemirisi bawofu! Mweekesaanga muti, ‘Omuundu niyechubira enyuumba ya Nasaae, ohweechuba ohwo haba sihwahamuholaho esiindu syoosi, nae muti niyeechubira esaabbu yomu nyuumba ya Nasaae, ohweechuba ohwo huba humudiiraho.’

¹⁷ Abasiru batabona eng'we! Siina esihira esiindi oluyaali, esaabbu, kose enyuumba ya Nasaae yikera esaabbu eyo yaaba enjoolerefu?

¹⁸ Haandi mweekesaanga muti, ‘Omuundu yeesi niyeechubira alutaari, ohweechuba ohwo sihwahamuholaho esiindu syoosi; nae muti niyeechubira ebiyaanwa biri hu alutaari, ohweechuba ohwo huba humudiiraho.’

¹⁹ Eng'we nga mwawofulira elalira! Siina esihira esiindi oluyaali, esiyaanwa kose alutaari, yikeraanga esiyaanwa esyo nisiba esyoolerefu?

²⁰ Sakira omuundu niyeechubira alutaari, aba yeechubiire alutaari neende buli siindu siyiliho syoosi.

²¹ Haandi omuundu niyeechubira enyuumba ya Nasaae, aba yeechubiire enyuumba ya Nasaae, neende Nasaae oyilimo yesi.

²² Haandi mani omuundu weechubira ekulu, oyo aba yeechubiire esisaala sy'obutuki sya Nasaae neende Nasaae osiihalaangaho mweene.

²³ “Nae chibaakaanire eng'we, Abeekesa b'Amalako neende Abafarisaayo. Abebachirisi eng'we! Olwohuba muberesaanga Nasaae silala sy'ehumi sy'ebiindu bidiidi-diidi koti ebituunguyu, ebiinjaari alala neende ebiindu biindi biwunya esing'aari, nae simudeebaangayo hu biindu bihoongo bi Malako keekesa koti, ohuba neende obwadyeeri, esisa, neende efukiirira. Muhoyere ohwooseresaanga ebiindu bino ataali ohulekeeresa ebiindi ebyo.

²⁴ Eng'we abeemirisi batabona, mwiinamyaanga esikoombe sy'amaachi keeng'we k'ohung'wa muhenenamo esiiye yiba niyikakwiiremo, nae muhaywa ohuhenenamo engamia yiba niyikalimo nayo!

²⁵ “Chibaakaanire eng'we, Abeekesa b'Amalako neende Abafarisaayo. Abebachirisi eng'we! Eng'we aboosa humukulu w'ebikoombe neende ow'esaani, nae muukati wabyo, mweechulamo eby'obwiibi neende okuliira.

²⁶ Abafarisaayo batabona eng'we! Mutaangireenge mberi mwoosa muukati w'esikoombe neende ow'esaani, hu bulaanu erwaanyi yosi yimale yibe cheege endafu.

²⁷ “Chibaakaanire eng'we, Abeekesa b'Amalako neende Abafarisaayo. Abebachirisi eng'we! Mbao mufwaana neende ebiriindwa bibahirwe eraangi ya rachaari, ebiboneha bulai bweene humukulu, nae muukati wabyo mwiichuulemo amakuumba k'abafu, neende engakaayi chahwo.

²⁸ Nasilala, mwesi mufwaana bulai haandi aboolerefu humukulu, nae mu myooyo kyeeng'we bweene, mweechulamo obweebachirisi neende ebyonoono.

Yesu atuumbula esinyaaso syaabwe

²⁹ “Chibaakaanire eng'we, Abeekesa b'Amalako neende Abafarisaayo. Abebachirisi eng'we! Olwohuba niing'we aboombahaanga ebiriindwa by'abanabbi, haandi mutereesa bilai byeene ebiriindwa by'aboolerefu,

³⁰ nimuboola muti, ‘Huba nihwaliwo mu ndaalo cha bakuuka yeefwe, haba sihwahabeere silala nabo mu hwiidisa amabaanga k'abanabbi.’

³¹ Mbao hane eng'we beene mweetuumbulaanga muti muli abeechuhulu baabo, abeeta abanabbi.

³² Sakira bulaanu eng'we muchiiririre sa neende ohuhola bi bakuuka yeeng'we bachaakisa ohutula hale.

³³ Enjuha eng'we, haandi abaana b'enjuha eng'we! Munaawone mutye ohuheengerwa omusaango kw'ohuchia mu nyaanja y'omuliro kutasima?

³⁴ Sakira njia ohubatumira abanabbi, neende abaandu bakesi muno, neende abeekesa b'Amalako, nae abaandi hu abo muchia ohubeeta nimubabaamba hu musalabba, haandi abaandi muchia mubanaale embooko mu Sinagoogi cheeng'we, nimubayiima ohubasaandya ohutula mu siko silala ohwoola mu siindi.

³⁵ Ao niwo yi mabaanga k'aboolerefu boosi akeediswa hu syaalo, kahabeemereho ohutulira elalira hu mabaanga kataaliho omusaango k'Abbeli ohwoola hu mabaanga kataaliho omusaango ka Sakariya omwaana wa Bberakia, yi mweetera akatikaati w'abuundu woolerefu neende alutaari.

³⁶ Mbaboolera obwadyeeri endi, esinyaaso sino syoosi sichia ohwiicha hu luse luno!

Ohudaha hwa Yesu eyiri Yerusalemu

³⁷ “Aaa, ewe Yerusalemu, owiita abanabbi, haandi ohubba abaandu ba bahutumiire amakina! Ndahateemaho amahabi maangi muno ohubabuusa alala mbabwiihe koti lu ngoho yibwihaanga obumwiinyu bwayo mu mbaya chayo, nae mwaahaya ohuufukiirira.

³⁸ Boneho enyuumba ya Nasaae eyo koti lu yichia ohweebwaabwa, yidoong'e koti ekuunda!

³⁹ Mani mbaboolera endi, haba simuchia ohuumbonaho haandi, ohwoola lu mwahaboolere muti, ‘Akinisibwe oyo owiicha mu liita ly'Omwaami.’ ”