Matayo 20 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abahalaabani bomu ndalo y'emisabbibu

¹ “Obulamu bwo Muukulu bufwaanana neende omwaami, owawuuna echuli ohukoonya abaandu bamuholera mu ndalo yae y'emisabbiibbu.

² Niyamala ohuwuliirisania nabo omusaara kw'edinaari ndala hu ludaalo, yabatuma mu ndalo bachie bamuhalaabanire.

³ Haandi niyachia erwaanyi esaa chidatu ch'echuli, yabona abaandu baandi nibeemere sa mu siito;

⁴ mani yaababoolera ati, ‘Eng'we mwesi muchie mu ndalo yaange muuhalaabanire, njia ohubatuunga omusaara kumuhoyera.’ Mani bosi beemao baachia.

⁵ Haandi niyali n'akeenda erwaanyi esaa chisaasaba, neende esaa chitaanu-na-chine, yahola sa nasilala atyo.

⁶ Haandi aambi w'esaa ehumi-na-ndala, yatula yaachia yaabukaana abaandu baandi bosi nibeemere sa; mani yaababoolera ati, Lwasiina, eng'we mweemere sa ano oludaalo olulaamba nimutaholaho esiindu syoosi?

⁷ Bamukobolamo bati, Olwohuba abulao omuundu yeesi otubeereseho omulimo kw'ohuhola. Nae yababoolera ati, Mani mwesi muchie mu ndalo yaange muhole hooyo emirimo.

⁸ Mani engoloobe niyoola, omweene endalo y'emisabbiibbu oyo yaboolera omweemeresi wa bahalaabani bae ati, Laanga abahalaabani boosi, obakabe omusaara kwaabwe; ohuchaaka neende abamaliiriihe ohwoola, mani omaliirihe neende abataangiire.

⁹ Mani abachaaka ohuhola aambi w'esaa ehumi-na-ndala nibeecha, buli muundu yakabana edinaari ndala-ndala.

¹⁰ Nae abataangira ohuchaaka nibeecha, babaasa bati bachia ohunyoola echihiraho ao; mani bosi bafuna edinaari ndala-ndala sa.

¹¹ Nae nibabukula omusaara kwaabwe okwo bekanyiirisa muno eyiri omweeneengo,

¹² nibaboola bati, Boneho, abamaliriihe bano, baholere esaa ndala yoong'ene, nae ewe obakabaanie nasilala neende efwe, bafunihaane neende omulimo kw'oludaalo lwoosi mu mubasu kwakiire ao.

¹³ “Nae yakobola mu mulala hu abo ati, ‘Tekeeresa huboolere mwiicha waange, ese haba si hubayireho omubayo kata nabudiidi. Haba siwiichulisaho oti hufukiirisaanie naawe ohuholera edinaari ndala yino?

¹⁴ Bukula ebyao mani oweeo; ese omweene heengereo ohuberesa omaliiriiheyo wuno omusaara kwaakana neende ku hubereese.

¹⁵ Ese mbula obunyala bw'ohwehoonyera ebiindu byaange koti lu mba nindaha? Kose oli ohuumbalana hulw'obuwaani bwaange?’

¹⁶ Mani Yesu yababoola ati, abamaliirihayo bachia ohuba abaamberi, nae abaamberi bachia ohuba abamaliirihayo.”

Yesu alomaloma hu hufwa hwae ehabi lyohudatu

¹⁷ Yesu niyali hu lukeendo naachia Yerusalemu, yakabula abeeki bae ehumi-na-babiri yaabasudya endulo yaababoolera ati,

¹⁸ “Mbao huchia Yerusalemu. Nae nihwoolayo, Omwaana w'Omuundu achia ohudiiswa mu mahono k'abalaamisi bahuluundu neende abeekesa b'Amalako. Bachia ohumuheengerayo omusaango kw'ohufwa,

¹⁹ haandi bamale bamudiise Abateende, bamujaare haandi bamunaale embooko, mani bamubaambe hu musalabba. Nae hu ludaalo lwohudatu achia ohusyuuha.”

Ohusaba hwa ng'ina Yakobbo neende Yowaana

²⁰ Abweene ao, ng'ina baana ba Sebbedaayo yeecha eyiri Yesu naali neende abaana bae babiri, mani yaasigama, mu moni wae ohumusaba esiindu silala syoong'ene.

²¹ Yesu yamuteeba ati, “Odaha siina?” Yamukobolamo ati, “Lagira oti, abaana baange bano bachia ohwiihala, mulala hu muhono kwao muluungi, nae owuundi hu muhono mukaada mu Bwaami bwao.”

²² Nae Yesu yakobolamo ati, “Mbao okoterwe syoosaba hane. Mubaasa muti munyala ohung'wa hu sikoombe si njia ohung'wa?” Nae bamukobolamo bati, “Hunyala.”

²³ Yesu yababoolera ati, “Muchia ohung'wa hu sikoombe syaange, nae eby'ohwiihala hu muhono kwaange muluungi oba hu mukaada, mbula obunyala bububeresa, nae bwaabo ba Laata yatekehera.”

²⁴ Mani abeeki ehumi bala nibawulira esyo, etima lyabadiira muno hulwa abasyaani b'enda ndala abo.

²⁵ Nae Yesu yabalaanga ohwiicha yali, mani yababoolera ati, “Mumanyire muti abatuki b'abaandu bali mu syaalo muno baheera ohuhalaabanirwa sa, haandi abo ababa neende obunyala, batukira sa obwaalaba.

²⁶ Nae mweeng'we haba sisihoyere ohuba sityo; ohumalaho,

²⁷ buli odaha ohuba omweemeresi, ahoyere abe omuwaambe w'abaasye;

²⁸ koti lu Omwaana w'Omuundu ateecha ohuhalaabanirwa nae ohuhalaabanira abaandu, neende ohuyaanayo obulamu bwae koti omutuulu kw'ohununula abaangi.”

Yesu awonia abasaacha bawofu babiri

²⁹ Mani nibali nibatula mu Yeriko, esidiiyiha sihoongo sy'abaandu syeecha syamuloonda.

³⁰ Nae bone, abawofu babiri bali nibehaale hu ndulo w'engira, nibawulira bati Yesu niye owali niyeecha ohubita, bachaaka ohwekongooyera mu kono ly'aakulu bati, “Mwaana wa Daudi! Tukwiireho esisa!”

³¹ Nae esidiiyiha sy'abaandu syeecha syabahabuhira, nisiibaboolera ohuwuleera; nae abawofu bano bameeda sa ohwekongooyera aakulu muno nibaboola bati, “Mwaana wa Daudi, Tukwiireho esisa!”

³² Mani Yesu yeecha yeema, mani yabalaanga, n'ababoolera ati, “Eng'we mudaha mbaholere siina syeene?”

³³ Mani bamukobolamo nibamuboola bati, “Omwaami, efwe hudaha otulimbuse emoni fwesi huboneho!”

³⁴ Mani Yesu yeecha yabakwiira esisa, mani yabadiira hu moni chaabwe; mani abweene ao, abasaacha abo beecha bachaakiraniramo ohubona, mani baasiingira baloonda Yesu.