Matayo 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abakeni ohutula ebukwe

¹ Yesu niyamala ohwibulirwa mu Bbetilehemu sya Yudea mu ndaalo ch'Omutuki Herode, abasomi baandi, abeeka muno ebidiira hu ng'ining'ini batula Ebukwe beecha boola mu Yerusalemu nibateebaanga bati,

² “Omwaana wibuulwe ohuba omutuki w'Abayudaaya ali yena? Hubweene eng'ining'ini yae niyitulire Ebukwe, sakira hwiichire ohumwiinamira.”

³ Omutuki Herode niyawulira atyo, yeyendeherera muno alala neende abaandu bomu Yerusalemu bosi.

⁴ Herode yabuusa alala abalaamisi bahuluundu boosi, alala neende abeekesa b'Amalako boosi, mani yabateeba ati, “Mbwe Kristo achia ohwibulirwa yeena?”

⁵ Nabo bamukobolamo bati, “Mu siko sya Bbetilehemu mu Yudea. Olwohuba nilwo lu nabbi yandiika ati:

⁶ ‘Ewe Bbetilehemu oli mu syaalo sya Yuda, siniiwe ohiramo obudiidi mu biko bihunuufu muno mu syaalo sya Yuda daawe; mani sakira mu ewe nimwo omuchia ohutula omweemeresi ochia ohutuka Yisiraeli, abaandu baange.’ ”

⁷ Mani Herode yalaanga abakeni abo mungiso yemeeda ohubeteebaho ebiha byeene bi ng'ining'ini yali niyibaboneheeremo.

⁸ Yamala yaabatuma Bbetilehemu n'abalagira ati, “Muchie muteeberese bulai ebidiira hu mwaana oyo, mwiiche muunjekese, mani syesi njie mwiinamire.”

⁹ Mani nibawulira batyo bachiiririra neende olukeendo lwaabwe olwo; nibali nibakeenda, haandi babona eng'ining'ini yira yi bali babweene Ebukwe; mani yabeemirira ohwoola lu yeduungeeresera abuundu yi mwaana oyo yali.

¹⁰ Nibabona batyo basangaala beehoya muno!

¹¹ Nibeengira mu nyuumba eyo babona omwaana neende ng'ina Maria, basigama bamwiinamira. Baboolola emikaangi kyaabwe baamuberesa ebiyaanwa by'esaabbu, obubbaani neende amafuta k'esing'aari siingi neende “miira.”

¹² Nasaae yabalabulira mu silooto obutakaluhira eyiri Herode ohutusaho badiire engira yiindi eyibakalusa ewaabwe.

Ohwiiruhira Misiri

¹³ Mani nibamala ohuwaao, Malaika w'Omwaami yabonehera Yosefu mu silooto yaamuboolera ati, “Siingira obukule omwaana neende ng'ina mwiiruhire Misiri, mube eyo ohwoola lu mweene ndahababoolere endaalo ch'ohukoboleramo: Olwohuba manyire endi Herode yeecha ohukiiya omwaana oyo naadaha ohumwiita.”

¹⁴ Yosefu yabukula omwaana neende ng'ina beeruhira Misiri mu siro syeene esyo,

¹⁵ yibamala baamenya ohwoola lu Herode yafwiira. Kano kali katyo, hu mboosi yi Omwaami yalomalomera mu nabbi yoolerere yiti, “Ndahalaange omwaana waange ohutula mu Misiri.”

Ohwiitwa hw'abaana badoto

¹⁶ Herode niyafumbula ati abasaacha bakesi abo bali bamuheengeere amakesi k'ohumweyibaho, yanyoolera muno, yatusa elako ly'ohwiita abaana basyaani boosi mu Bbetilehemu alala neende ebyaalo byoosi bisibiraane nasyo, ohuchaakira hu myaaka kibiri ohwiiha aasi, naaloondakana hu biha bi basaacha bakesi bala bali baboneeremo eng'ining'ini.

¹⁷ Mani nilwo lu mboosi chi nabbi Yeremia yalomaloma choolererera abweene chiti,

¹⁸ “Ekono lyawuliiriha mu Rama, ohulira hw'esasaakisi liingi, Rakeeli naacherenjesa amasika hulw'abaana bae, nibihaya ohumulemya omwooyo olwohuba abaana bae boosi bali bamuweereho.”

Ohukaluha ohutula Misiri

¹⁹ Herode niyamala ohufwa, malaika w'Omwaami yabonehera Yosefu mu silooto Misiri,

²⁰ yaamuboolera ati, “Siingira obukule omwaana neende ng'ina mukobole mu syaalo sya Yisiraeli olwohuba abo abali nibakiiya ohwiita omwaana bamalire ohufwa.”

²¹ Yosefu yasiingira yaabukula omwaana neende ng'ina baakobola mu syaalo sya Yisiraeli.

²² Nae Yosefu niyawulira ati Akelausi niye owakaluha hu sisaala sya Herode laatang'ene ohuba omutuki wa Yudea, yaatya muno ohukaluhayo. Nae Nasaae yaamukerakira mu silooto, mani yeseenda yachia embeka cha Galilaaya,

²³ nae niyoola eyo, yamenya mu siko silaangwa siti, Nasareeti. Ao nilwo lu bi banabbi balomaloma byoolerera biti, “Yahalaangwe Omunasareti.”