Matayo 17 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohukaluuhanisibwa hw'efwaani ya Yesu

¹ Mani luunyuma lw'endaalo chisaasaba, Yesu yabukula Petero neende Yakobbo neende Yowaana mwaanang'ina, yaachia nabo hu lugulu luleeyi, baaba eyo boong'ene.

² Mani Yesu yaakaluuhanisibwa efwaani yae nibabona. Obweeni bwae bwamesamesana koti elyuuba, haandi engubo chae chaalafuya chaamilamilana.

³ Abweene ao, Musa neende Elija beecha baababonehera nibali ohulomaloma nae.

⁴ Petero yeemao yaaboolera Yesu ati, “Omwaami, silai muno ohuba ano; noojama, njia ohwoombaha ano ebikaali bidatu, silala esyao, esiindi esya Musa, haandi esiindi esya Elija.”

⁵ Niyali naasilomalomaanga, esireesi sing'enaang'ena syeecha syaabeebodoohania, mani ekono lyawuliirihanira mu sireesi omwo niliboola liti, “Wuno niye Omwaana waange mukoosi, ohiramo ohuusaangaasa; mumuwulire.”

⁶ Nae abeeki nibawulira sino, obuti bwabadiira muno beehubba aasi mafumaame.

⁷ Nae Yesu yabadiiraho yaaboola ati, “Musiingire, mutatya.”

⁸ Nae nibatingaala aakulu, abulao omuundu wuundi yi babonaho ao, ohutusaho Yesu yeeng'ene.

⁹ Nibali nibeeha ohutula hu lugulu, Yesu yabalagira ati, “Mutabooleraho omuundu yeesi bi muboneheerwe, ohwoola lu Omwaana w'Omuundu yahasyuuhire mu bafu.”

¹⁰ Nae abeeki bae abo bamuteeba bati, “Lwasiina abeekesa b'Amalako baboola bati, Elija ahoyere ohukobola mberi?”

¹¹ Yesu yakobolamo ati, “Ohuboola obwadyeeri bweene Elija ahoyere ohwiicha, haandi ali neende ohutereesa buli siindu syoosi;

¹² nae mbaboolera endi, Elija yamala ohwiicha, ohutusaho abaandu haba sibamumanyirisa, mani sakira bamusaandya koti lu badaha. Mani mu ngeri nasilala eyo niyo yi Omwaana w'Omuundu achia ohusaandisirwa mu mahono kaabwe.”

¹³ Nibawulira batyo, abeeki beemao baamanya bati yali ali ohulomaloma hu Yowaana Omubaatiisi.

Yesu awonia omusyaani oliho omusaambwa

¹⁴ Mani niboola eyiri esidiiyiha sy'abaandu, omusaacha wuundi yeecha eyiri Yesu, yaasigama mu moni wae,

¹⁵ mani yaaboola ati, “Omwaami, kwiiraho omwaana waange esisa, olwohuba afwiichaanga endulume, haandi achuunisibwa muno; oluundi yimukwiisa mu muliro, haandi oluundi mu maachi.

¹⁶ Luliwo lu ndamuleeta eyiri abeeki bao, nae haba sibanyala ohumuwonia.”

¹⁷ Yesu nae yakobolamo ati, “Poo, eng'we oluse lubi luwuma efukiirira, ndahabe naang'we ohwoola liina? Ndahabeesimiriise ohwoola liina? Mumundeetere ano.”

¹⁸ Yesu yeemao yaahabuhira omusaambwa okwo, kwaamutulamo, mani ohutula esiha esyo, omusyaani oyo yaawona.

¹⁹ Nae abeeki beecha eyiri Yesu mu bweekisi baamuteeba bati, “Lwasiina, efwe sihunyalire ohwiirusa omusaambwa okwo?”

²⁰ Yesu yababoolera ati, “Olwohuba muli neende efukiirira ndiidi. Mbaboolera obwadyeeri endi, muba muli neende efukiirira yaakana koti olumwo lw'omutuumba, mwahaboolere olugulu luno muti, ‘Tula ano ochie era,’ mani lwaatulao; haandi abulao esiindu syoosi esiba sinabahaya ohuhola.”

²¹

Yesu alomaloma hu hufwa hwae haandi

²² Mani abeeki nibali nibebuusiire mu Galilaaya, Yesu yababoolera ati, “Omwaana w'Omuundu achia ohudiiswa mu mahono k'abaandu,

²³ mani bachia ohumwiita, nae hu ludaalo lwohudatu achia ohusyuuha.” Sino syabamalamo omwooyo muno.

Ohutooya omusolo kw'Enyuumba ya Nasaae

²⁴ Nae niboola mu Kaperanaumu, abatoosa b'omusolo kw'Enyuumba ya Nasaae, beecha eyiri Petero baamuteeba bati, “Mani omweekesa weeng'we, atooyaangaho omusolo?”

²⁵ Petero yakobolamo ati, “Eee.” Mani Petero naakaluuhe engo, Yesu yataangira ohulomaloma nae, n'aboola ati, “Simooni, naawe obaasaho otye? Abatuki b'esyaalo, basolosaanga emisolo ohutula hu baandu siina? Hu beene syaalo, kose hu baandu baandi?”

²⁶ Petero yakaluhamo ati, “Hu baandu baandi.” Yesu nae yamuboolera ati, “Mbao hane abeene syaalo balehuule.

²⁷ Nae obutanyoolesa abaandu bano, chia mu nyaanja oteke elobo. Mani obukule eng'eeni yoonataangira ohuloba, oyaasamye omunwa kwayo, ochia ohunyoolamo eseende, mani ochibukule ochie otooyere omusolo kwaange neende okwao.”