Matayo 13 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Olukaado lw'omuwaanyi w'Emere

¹ Hu ludaalo olwo, Yesu niyatula mu nyuumba yachia hu sikobero sy'enyaanja, yeehala aasi.

² Esidiiyiha sy'abaandu sihoongo syeecha syaamwebodoohania, mani yeengira mu lyaato yeehalamo; nae esidiiyiha esyo syoosi syadoong'a hu lwaasi lw'enyaanja.

³ Yesu yachaaka ohubaboolera ebiindu biingi niyehoonyera engaado ati; “Olwoola, omulimi yachia ohuwaanya emwo yae.

⁴ Mani niyali ayaanya, emwo yiindi yakwa hu ngira, nae amayoni keecha kaayiboocha.

⁵ Emwo yiindi yakwa hu bikina-kina ataali eloba liingi, mani yaanguya ohumera, nae koti lu yitaba niyayira emisi aasi muno,

⁶ omubasu nikwatula, kwayimamula; nae haandi koti yitali neende emisi mileeyi, yaalala.

⁷ Emwo yiindi yakwa mu mawa, mani amawa ako kaafumita ebyali bimerere.

⁸ Emwo yiindi yakwa mu loba lai, mani yaama ebyaamo: eyiindi ebyaamo emia ndala, eyiindi amahumi kasaasaba, eyiindi amahumi kadatu.

⁹ Oyo yeesi oli neende amatwi, leha Awulire!”

Esihuluundu siri mu hweekesera mu ngaado

¹⁰ Abweene ao, abeeki ba Yesu beecha yali bamuteeba bati, “Siina esikera noolomaloma neende abaandu mu ngaado?”

¹¹ Nae Yesu yabakobolamo ati: “Eng'we niing'we ababereswa ehabi y'ohumanya ebyaama bidiira hu bwaami bwo Muukulu, nae abo haba sibabereswa.

¹² Olwohuba buli muundu oli neende esiindu, achia ohumeedwaho ebiindi, mani abe neende ebiingi bihiraho; nae owumaho nasyo achia ohutusibwaho kata neende byaali nabyo.

¹³ Sino nisyo esikera ndaalomalomera nabo mu ngaado, olwohuba batingaala nae haba sibabona, batekeeresa nae haba sibawulira, kata sibamanya n'ohumanya.

¹⁴ Sakira emboosi y'omunabbi Yisaaya yoolerera abweene niyibalomalomaho yiti: ‘Mubwadyeeri bweene mwahawulire nae simwahamanye amahuluundu keene, haandi mwahewuunje, nae mwaahaya ohubona.

¹⁵ Olwohuba emyooyo ky'abaandu bano myaangalafu nikyo, haandi amatwi kaabwe sikawuliraanga, haandi bamala ohuliimba emoni chaabwe, ataalyaao, bahabweene neende emoni chaabwe, baawulira neende amatwi kaabwe, haandi baamanya amahuluundu k'emboosi neende emyooyo kyaabwe, mani baakaluha yi ndi ohubawonia.’

¹⁶ Nae emoni cheeng'we chiri neende ehabi olwohuba chibona, haandi amatwi keeng'we kosi k'ehabi olwohuba kawulira.

¹⁷ Mbaboolera obwadyeeri endi, abanabbi baangi neende abaandu boolerefu baangi beekoomba muno ohubonaho bi mubona bino, nae haba sibabibona, ohuwuliraho bi muwulira bino, nae haba sibabiwulira.

Yesu atuumbula amahuluundu kali mu lukaado lw'omuwaanyi w'emwo.

¹⁸ “Bulaanu muwulire amahuluundu k'olukaado lw'omuwaanyi w'emwo.

¹⁹ Omuundu yeesi naawulira emboosi yidiira hu bwaami bwo Muukulu mani yaahaya ohumanya amahuluundu kayo, omusuku Sitaani yeechaanga ayuula esyali ni syataakwa mu mwooyo kwae; eyo niyo emwo yakwa hu ngira.

²⁰ Nae emwo yakwa hu bikina-kina nayo, niyo omuundu owuliraanga emboosi ya Nasaae mani yaayifukiirira bwaangu neende esangaalo;

²¹ nae koti lu mboosi eyo yiteengiraanga muno mu mwooyo kwae, yesimiirisaangaho sa budiidi, nae esidinyu syoosi kata esaando yoosi niyiicha hulw'emboosi ya Nasaae, abitulaangaho alehana nayo bwaangu muno.

²² Nae emwo yakwa mu mawa, niyo oyo owuliraanga emboosi ya Nasaae, nae ohweelalihira hw'obulamu bw'esyaalo neende obwekoombi bw'emyaandu, bifwiinyirira emboosi eyo yihaya ohwaamaho ebyaamo byoosi.

²³ Nae emwo yakwa mu loba lai eyo, niyo oyo owuliraanga emboosi ya Nasaae, mani amanya amahuluundu kayo, yaama ebyaamo, mani aduuhana eyiindi emia ndala, eyiindi amahumi kasaasaba, nae eyiindi amahumi kadatu.”

Olukaado ludiira hu baye limera mu ndalo

²⁴ Yesu haandi yabakaadira olukaado luundi ati; “Obwaami bwo Muukulu bunyala ohufwaananisibwa neende omuundu wuundi owawaanya mu ndalo yae emwo ndai y'engaano.

²⁵ Nae abaandu nibali nibeeyaliise, omusuku wae yawaanya ebaye mu ngaano eyo, mani yaamala yeweerao.

²⁶ Nae ebirime ebyo nibyahula byoola ohumuliha, ebaye elyo lyosi lyaboneheramo.

²⁷ Mani abahalaabani bae bamuboolera bati; ‘Omwaami, siwataaka emwo ndai yoong'ene mu ndalo yao? Nae ebaye nalyo lituliire yeena?’

²⁸ Nae yabakobolamo ati; ‘Omusuku niye oholere sino.’ Nae abahalaabani bamuboolera bati; ‘Mani wadaha huchie hwiiyemo ebaye elyo?’

²⁹ Nae yabakaluhamo ati; Haba; olwohuba nimunaba nimwiiyamo ebaye, engaano yosi yicha ohwiiyihiramo.

³⁰ Mulehe byoombi bihulire alala ohwoola ebiha by'ekesa, yi njia ohuboolera abakesa endi: mutaangire mberi mubuuse alala ebaye elyo, mani muliboye mu hanya lisaambwe, nae mubuuse engaano nayo muyibiihe mu syaaki syaange.”

Olukaado ludiira hu lumwo lw'omutuumba

³¹ Yesu haandi yabakaadira olukaado luundi ati, “Obwaami bwo Muukulu bukeraanisibwa hu lumwo lw'omutuumba, lu muundu yabukula yataaka mu ndalo yae;

³² luno nilwo oluhiramo obudiidi mu bumwo bwoosi, nae nilumala lwaahula, lukaliyaanga luhira emisaala kyoosi obuhoongo, lweehola omusaala, ku mayoni koombaha hu masaga kakwo ebiyu.”

Olukaado ludiira hu mamera

³³ Yesu yabakaadira olukaado luundi ati, “Obwaami bwo Muukulu bufwaanana neende amamera k'omuhasi yabukula mani yaakaandira alala neende ebikero bidatu by'obusye, mani yaabuleha ao ohwoola lu bwoosi bufwiimbira.”

Esyakera Yesu niyehoonyera engaado

³⁴ Yesu yaboolera abaandu ebiindu bino byoosi mu ngaado. Siyababooleraangaho esiindu syoosi naatehonyeere engaado.

³⁵ Byaba bityo hu mboosi yi munabbi yalomaloma yoolerere yiti; “Njia ohwehoonyera engaado niinomanoma nabo; Njia ohubatuumbulira ebyali nibyeekisa ohutula esyaalo nisiloongwa.”

Yesu atuumbula amahuluundu k'olukaado lw'ebaye

³⁶ Olwoola, Yesu yasiingira yaatula eyiri esidiiyiha sy'abaandu, mani yeengira mu nyuumba. Abeeki bae beecha yaali, baamuboolera bati; “Tweekese amahuluundu k'olukero lw'ebaye lyomu ndalo.”

³⁷ Yesu yakobolamo ati; “Omuundu wawaanya emwo ndai, niye Omwaana w'Omuundu;

³⁸ endaalo niyo esyaalo sino; nae emwo ndai, niyo abaana bomu Bwaami bwa Nasaae; ebaye nilyo abaana b'omusuku Sitaani;

³⁹ nae omusuku wataaka ebaye, niye Sitaani mweene; ekesa, nilyo oludaalo lw'enjakamo, nae abakesa, nibo bamalaika.

⁴⁰ Mani koti lu balibuusa ebaye, mani baalisaamba mu muliro, nilwo lu bichi ohuba hu ludaalo lw'enjakamo.

⁴¹ Omwaana w'Omuundu yahatume bamalaika bae, mani bahabuuse abo abakera abaandu nibonoona, alala neende abahola-mbi boosi, babatuse mu Bwaami bwae,

⁴² mani babasukune mu muliro kutasima; eyo yi bahalirire nibeesia ameeno.

⁴³ Nae aboolerefu bachia ohumesamesana koti elyuuba mu Bwaami bwa Saabwe. Oyo yeesi neende amatwi, leha awuliire.

Olukaado ludiira hu mwaandu kwakiswa

⁴⁴ “Obwaami bwo Muukulu buli koti omwaandu kwakiswa mu mukuunda, omuundu naakweduuyaho, amalaanga akubwiihaho, mani akukisa mberi. Omuundu oyo, mu sangaalo liingi, achichaanga akusa ebiindu byaali nabyo byoosi, mani akula omukuunda okwo.

Olukaado ludiira hu ekina ly'obukusi bw'aakulu

⁴⁵ “Haandi, Obwaami bwo Muukulu bufwaanana neende omuchurusi wuundi okoonya amakina k'obukusi bw'aakulu,

⁴⁶ mani naamala yanyoola ekina ly'obukusi buhoongo muno, akobolaangayo achia akusa ebiindu byae byaali nabyo byoosi, mani amala achia akula ekina elyo.

Olukaado ludiira hu lweero lunaaba

⁴⁷ “Haandi Obwaami bwo Muukulu bufwaana neende olweero lu bafuuba mu nyaanja, mani lwaachia lwayaambia eng'eeni cha buli ngeri.

⁴⁸ Nilwiichula, abanaabi baluhweesaanga balwoosa hu sikobero, beehala aasi, mani bachaaka ohukabulamo eng'eeni echo; nibata endai mu bisero, nae embi, nibachisukuna.

⁴⁹ Nilwo lu byahabe hu ludaalo lw'enjakamo. Bamalaika baheeche bakabulemo abaandu babi, babatuse mu balai,

⁵⁰ mani babasukune mu muliro kutasima; eyo niyo yi bahalirire nibeesia ameeno.

Obwadyeeri buyaaha neende obuhale

⁵¹ “Yesu yateeba abaandu ati, ‘Mani mumanyire amahuluundu k'ebiindu bino byoosi?’ Bamukobolamo bati, ‘Eee.’

⁵² “Mani yaababoolera ati, Sakira omweekesa w'amalako yeesi, owamala ohweekeswa ebidiira hu bwaami bwo Muukulu afwaanana neende omweeneengo odaya mu syaaki syae emere njaaha neende ehale.”

Abaandu ba Nasareeti bekaana Yesu

⁵³ Yesu niyamala ohuboola engaado chino, yatula ao,

⁵⁴ yaakaluha mu siko sy'ewaabwe syeene yachaaka ohubeekesera mu Sinagoogi chaabwe, nae abo boosi abawulira enjekesa yae bawuka muno, beteeba bati, “Nae wuno yatusa yeena amakesi kano neende amaani k'ohuhola eby'amayia bino?

⁵⁵ Wuno siniye omwaana w'omubaachi w'embaao wula? Ng'ina siniye olaangwa Maria? Haandi bamwaanang'ina sinibo Yakobbo, Yosefu, Simooni neende Yuda?

⁵⁶ Nae bamboochong'ene boosi sibali ano naafwe? Nae wuno yatusa yeena bino byoosi?”

⁵⁷ Mani baamuhayira elalira. Nae Yesu yababoolera ati, “Omunabbi yeesi, aduuhanaanga oluyaali abuundu woosi, ohutusaho mu siko syaabwe syeene neende mu ngo waabwe bweene.”

⁵⁸ Mani Yesu siyaholahooyo eby'amayia biingi, olwohuba bali nibabula efukiirira.