Matayo 12 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esiteebo sidiira hu Sabbaato

¹ Endaalo nichibitirehoo ndiidi Yesu yabitira mu ndalo y'engaano yiindi hu ludaalo lwa Sabbaato. Enjala yali niyiluma abeeki bae muno, mani sakira bachaaka ohwaakula emitwe ky'engaano ekyo, baakiwuula nibalya.

² Nae Abafarisaayo nibabona batyo, baboolera Yesu bati, “Bone, abeeki bao bali ohuhola esitafukiirirwa ohuholwa hu ludaalo lwa Sabbaato.”

³ Yesu yababoolera ati, Musisiiri ohusomaho bi Daudi yahola enjala niyimuluma neende ba yali nabo:

⁴ koti lu beengira mu Nyuumba ya Nasaae baalya hu migaati kyohu alutaari ekyali nikitafukiirirwa ohuliibwa neende omuundu yeesi ohutusaho abalaamisi ba Nasaae boong'ene?

⁵ Nae oba eng'we musisiiri ohusomaho hu malako ka Musa kaboola koti lu buli lwa Sabbaato, omulaamisi womu Nyuumba ya Nasaae afunakaanga elako lya Sabbaato, nae aba koti otaafunaakeho elako?

⁶ Mbaboolera endi, abweene ano aliwo esihuluundu esihiraho enyuumba ya Nasaae.

⁷ Eng'we muba mwamanya amahuluundu k'emboosi chino, Ese nyenya esisa, ataali ebiyaanwa by'esolo chisaambwa, haba simwahaheengeere omusaango abo ababa nibataaholereho esibi syoosi.

⁸ Olwohuba Omwaana w'Omuundu niye Omwaami wa Sabbaato yosi.

Omusaacha w'omuhono kwafwa

⁹ Yesu niyatula ao, yeengira mu Sinagoogi, yabukaanamo omusaacha w'omuhono kwafwa.

¹⁰ Abaandu baandi bamuteeba bati; “Sifukiirirwa ohuwonia omuundu hu ludaalo lwa Sabbaato?” Bamuleetera omusaacha oyo hu beemeo banyale ohumunyoolaho emboosi y'ohumufunaaniraho.

¹¹ Nae Yesu yababoolera ati, “Naanu hweeng'we mweesi, yi koondi lyae niliba nilikwiire mu liina, otahalihweesa yaalitusamo hu ludaalo lwa Sabbaato?

¹² Nae siba sitye, hu muundu wuno ohirira elalira eyale ekoondi obuhoonyi! Mani sakira omuundu naaba naahola esiindu silai hu ludaalo lwa Sabbaato, haba s'aba afunaka amalako.”

¹³ Abweene ao, Yesu yaboolera omuundu w'omuhono kwafwa oyo ati, “Kolola omuhono kwao.” Mani omuundu oyo nga lu yakololosa sa ati omuhono kwae, kwawonerao kwaaba koti okwaasye.

¹⁴ Abafarisaayo nabo bachaaka sa ohukoonya engira yohumwiita.

Omuhalaabani wa Nasaae mulobole

¹⁵ Yesu niyamanya esyo, yeemao yaatula ao. Esidiiyiha sy'abaandu syamala syaamuloondaho, yaawonia abalwaae boosi abaliwo,

¹⁶ mani yaabalagira ati, batabooleraho abaandu baandi ebimudiiraho.

¹⁷ Yaboola atyo, hu mboosi chi nabbi Yisaaya yaboola choolerere chiti:

¹⁸ “Eng'we boneho, omuhalaabani waange yi mweene ndedoolera; Omukoosi waange, haandi yi mwooyo kwaange kusangaalira muno; Ndahamuteeho Mwooyo Mwoolerefu waange hu achie alaangirire obwoolerefu, mu syaalo syoosi.

¹⁹ Oyo haba saachia ohuyiingana, alala neende ohuhabuha; kata abulao owahawulireho ekono lyae hu ngira.

²⁰ Oyo haba saachia ohufunaka kata ekada lyahooha, oba kata yaasimia olutaambi lulyoolyoota, yaheedinyirise ohwoola lu bwadyeeri bwaheechule mu syaalo,

²¹ haandi ni mu liita lyae nimwo mu Bateende balisuubira.”

Yesu neende Bbelisebbuuli

²² Olwoola abaandu baandi baleetera Yesu omuundu muwofu haandi otanyala ohulomaloma olwohuba yaliho omusaambwa. Yesu yeemao yaawonia omuundu oyo, yachaaka ohulomaloma alala neende ohubona.

²³ Abaandu bawuka muno baaboola bati, “Wuno haba saanyala ohuba naali niye omwiichuhulu wa Daudi?”

²⁴ Nae Abafarisaayo nibawulira sino, bakobolamo bati, “Omuundu oyo yeerusa emisaambwa olwohuba ali neende amaani ka Bbelisebbuuli, omwaami w'emisaambwa kyoosi.”

²⁵ Yesu nae koti lu yali naamanyire ebibaaso byaabwe, yababoolera ati, “Obwaami bwoosi nibweekabuhaniamo obweene bwachaaka ohulwaanakana, haba sibwahayiindira.

²⁶ Sakira nikali mbwe Sitaani yahachaaka ohwiirusa Sitaani waasye mu bwaami bw'emisaambwa kyeene ekyo, esyo siba syeekesa siti Sitaani mweene amalire ohweekabuhaniamo, mani bulaanu, obwaami bwae bwahayiindira butye?

²⁷ Mani nikali mbwe ese njirusa emisaambwa hulw'amaani ka Bbelisebbuuli, nae abaloondi beeng'we baba bakiirusa hulw'amaani ka naanu? Sakira abaandu beeng'we beene nibo abacha ohubaheengera omusaango kubahire!

²⁸ Nae nikali mbwe njirusa emisaambwa hulw'amaani ka Mwooyo wa Nasaae, mani eng'we muhoyere mumanye muti, Obwaami bwa Nasaae bwamala ohuboolamo.

²⁹ Abulao omuundu onyala ohufunaka enyuumba y'omuundu w'amaani maangi, yaayiingiramo yaamunyakaho ebiindu byae byoosi naatataangiire yaamuboya, hu yaanyala ohumunyakaho ebiindu byomu nyuumba yae.

³⁰ Omuundu wutaholera alala naange, aba ali ohunwaania, haandi mubwadyeeri bweene, omuundu wutahoonyana naange ohubuusa alala, aba ali ohusalaania sa.

³¹ Sakira mbaboolera endi, abaandu babi bachia ohuleherwamo alala neende enomanoma yaabwe yifwoola Nasaae eyo, nae omuundu yeesi olomaloma bubi hu Mwooyo Mwoolerefu, haba saachia ohuleherwamo bulaanu buti haandi kata neende mu ndaalo chiichayo choosi.

³² Omuundu yeesi olomaloma bubi hu Omwaana w'Omuundu, achia ohulerwamo, nae oyo yeesi owulomaloma bubi hu Mwooyo Mwoolerefu, saachia ohuleherwamo, bulaanu kata neende mu ndaalo chiichayo.

Olukaado ludiira hu musaala neende ebyaamo byakwo

³³ “Omusaala mulai kwaamaho ebyaamo bilai; Nae omusaala mubi kwosi kwaamaho ebyaamo bibi. Olwohuba, obulai bw'omusaala bumanyihaniraanga hu byaamo byakwo.

³⁴ Abaana b'enjuha eng'we, mwahanyala mutye ohulomaloma emboosi ndai, nimuli neende emyooyo mibi kityo? Olwohuba, omuundu alomalomaanga ebitula mu mwooyo kwae.

³⁵ Omuundu mulai atusa hu biindu bilai biba nibyeechula mu mwooyo kwae; haandi omuundu mubi yesi yaatusa hu biindu bibi, biba nibyeechula mu mwooyo kwae.

³⁶ Ese mbaboolera obwadyeeri endi, hu ludaalo lw'ohuheengeraho emisaango, buli muundu yeesi achia ohweelomalomaho hulwabuli mboosi mbi yoosi yi yalomaloma.

³⁷ Olwohuba emboosi chao nicho echirihutusaho omusaango kata chaahuboyaho omusaango.”

Abeemirisi badaha Yesu ahole esiholwa sy'amayia

³⁸ Olwoola, Abeekesa b'Amalako baandi, alala neende Abafarisaayo, balomalomera aakulu nibaboola bati; “Omweekesa, efwe hudaha ohole esyaamayia huboneho.”

³⁹ Yesu niyawulira atyo, yabakobolamo ati; “Abaandu b'oluse lubi koti eng'we, nibo abasaba esilolero sy'amayia mberi hu bamale bafukiirire. Mani abulao esilolero si bachia ohubaberesa, ohumalaho esya nabbi Yona syoong'ene.

⁴⁰ Koti lu Yona yamala endaalo chidatu neende ebiro bidatu mu nda y'okung'eeni, nilwo lu Omwaana w'Omuundu yesi achia ohumala endaalo chidatu neende ebiro bidatu n'asisiiri emakoombe.

⁴¹ Oludaalo lw'ohuheengeraho omusaango, abaandu ba Ninefe baheeme mu siina naang'we mani babaheengere omusaango ohubahira, olwohuba nibawulira enjekesa ya Yona, beeyolobya ebyonoono byaabwe, nae ano mbano aliwo omuundu ohirira elalira Yona oluyaali!

⁴² Oludaalo lw'ohuheengeraho omusaango, omutuki muhasi wa Seebba, yesi yaheeme mu siina naang'we, yaabaheengera omusaango ohubahira, olwohuba omweene oyo yakeenda ohutula mu syaalo sy'eyale muno ohuchia ohuwuliraho hu makesi ka Solomooni, nae ano aliwo omuundu ohirira elalira Solomooni oluyaali!

Ohukobola hw'ebihyeeno

⁴³ “Esihyeeno nisitula mu muundu, sing'alaalaanga mu siparara nisikoonya abuundu wohuwuluuhira, mani sihaywa ohunyoola.

⁴⁴ Bulaanu nisiba nisihayirwe ohunyoola yi sichiira, syebooleraanga siti, ‘Ese haangaluhe sa mu nyuumba yaange yi ndaatuliremo yira.’ Mani nisikaluhayo, syaanyoola enyuumba eyo niyiri ebihaya, haandi niyitereeserwe niyiboneha bulai,

⁴⁵ sichichaanga sikoonya mani sikaluha neende ebihyeeno byaasye biindi, bitaanu-na-bibiri, ebisihiraho obubi, biingira mu nyuumba eyo nibimenyamo. Mani muhumaliiriha, omuundu oyo, amalaanga aba mu bulamu bubi muno ohuhiraho bu yalimo hale. Nasilala nilwo lu byaheehole hu baandu b'oluse lubi luno.”

Ng'ina Yesu neende bamwaanang'ina Yesu

⁴⁶ Yesu niyali n'asilomalomaanga neende abaandu abo, nae boneho ng'ina neende bamwaanang'ina beecha boola yali. Niboola ao, beema erwaanyi, baatuma emboosi eyiri Yesu nibadaha ohulomalomaho nae.

⁴⁷

⁴⁸ Yesu niyawulira atyo, yakobolamo ati, “Maama niye naanu? Nae bamwaanama nibo naanu?”

⁴⁹ Yesu yakolola omuhono kwae mani yaasyoomesa hu beeki bae yaaboola ati, “Bone, maama neende bamwaanama mbano.”

⁵⁰ Olwohuba omuundu yeesi ohola bi Laata wo Muukulu adaha, oyo niye mwaanaama, mboocho yaange neende maama.