Mariko 9 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Yesu yababoolera ati, “Mubwadyeeri mbaboolera endi, aliwo abaandu baandi hu beemere ano, abacha ohubona obwaami bwa Nasaae nibwiichire neende obunyala, nibatoola ohufwa.”

Ohukaluuhanisibwa hw'efwaani ya Yesu

² Luunyuma lw'endaalo chisaasaba, Yesu yabukula Petero neende Yakobbo neende Yowaana, yaabayira hu lugulu luleeyi boong'ene; yakaluuhanisibwa nibabona,

³ ebyefwaalo byae byaang'enaang'ena, neende obwarachaari bumilamilana muno, ohuhira bi silabya syosi siri hu syaalo syahanyala ohulabya.

⁴ Abweene ao waboneherao Elija alala neende Musa; nibali ohulomaloma neende Yesu.

⁵ Petero yeemao yaboobera Yesu ati, “Omwaami, silai muno efwe ohuba ano; leha efwe hwoombahe ebikaali bidatu, silala esyao, silala esya Musa, haandi silala esya Elija.”

⁶ Petero yali awuungire n'ahayiiswe neende esyohuboola, olwohuba bali batiire muno.

⁷ Esireesi syabafuuniha, mani ekono lyatulira mu sireesi omwo niliboola liti, “Wuno niye Omwaana waange muheerwa; mumuwulire.”

⁸ Abweene ao nibachaaka ohwewuunja bulai, haba sibabonaho omuundu wuundi yeesi naali nabo ohutusaho Yesu yeeng'ene.

⁹ Nibali mbwe hubeehirira aasi w'olugulu, Yesu yabalagira obutabooleraho omuundu yesi ebyo bi bali nibabweene, ohwoola lu Omwaana w'Omuundu aliba n'amalire ohusyuuha ohutula mu bafu.

¹⁰ Mani babiiha esiindu esyo mu myooyo kyaabwe, nibeteebanaanga abeene ohumanya bi mboosi echo mbwe “Ohusyuuha ohutula mu bafu” cheekesa siina.

¹¹ Nae bamuteeba bati, “Lwasiina, abeekesa b'Amalako baboola bati Elija niye ohoyere ohutaangira ohwiicha?”

¹² Nae Yesu yababoolera ati, “Elija niye otaangira ohwiicha atekehe ebiindu byoosi bibe koti lu bihoyere ohuba; nae ebyandiikwa bidiira hu Omwaana w'Omuundu byeekesa siina, biti mbwe ahoyere ohusaanda muno haandi ayirwe koti omusyuule?

¹³ Nae ese mbaboolera endi Elija yamala ohwiicha, mani bamala ohumuhola syoosi sibadaha, koti sa lubyamulomalomaho mu byandiiko byoolerefu.”

Yesu awonia omusyaani oliho esihyeeno

¹⁴ Mani niboola eyiri abeeki, babona esidiiyiha sihoongo muno nisibebodoohaanie, mani abeekesa b'Amalako nibali ohuyiinganaanga nabo.

¹⁵ Abweene ao abeeki nibabona Yesu, besiinduha muno, mani beeruha baachia yaali, baamuheesa.

¹⁶ Nae Yesu yabateeba ati, “Siina syeene si muli ohuyiinganiraangaho nabo?”

¹⁷ Nae mulala hu baandu bali mu sidiyiiha yamukobolamo ati, “Omweekesa, ndeetere omwaana waange yooli, olwohuba aliho esihyeeno sy'ohuwuumumala

¹⁸ mani buli lu simuniina, simuubbaanga aasi; mani abira efiro muhanwa niyeesia ameeno mani amala abbaangalala. Sabire abeeki bao ohusiirusa nae sibanyalire.”

¹⁹ Nae Yesu yabakobolamo ati, “Eee, eng'we oluse lutaamanyire Nasaae, njia ohuba naang'we ohwoola liina? Njia ohubeesimiirisa ohwoola liina? Mumundeetere ano.”

²⁰ Baleeta omusyaani oyo eyiri Yesu; nae esihyeeno esyo nisyabona Yesu, abweene-na-bweene ao syaniina omusyaani oyo, syaamususuucha, yaakwa aasi, yekalaangasa, n'abira efiro muhanwa.

²¹ Yesu yateeba laatang'ene mwaana oyo ati, “Yahaba ati ohumala embaka siina?” Nae yaboola ati, “Ohutula mu budoto bwae.

²² Buli siha simusukunaanga mu muliro neende mu maachi, siti simusihirise; mani niwahanyalaho ohuhola esiindu syoosi, tukwiire esisa otuhoonye.”

²³ Nae Yesu yamuboolera ati, “Mbwe niwahanyalaho! Ebiindu byoosi binyaliha eyiri oyo ofukiirira.”

²⁴ Abweene ao, laatang'ene mwaana oyo yaayula n'aboola ati, “Ese fukiirira; ewe ndehere hulw'ohutaba neende efukiirira hwaange ohwo!”

²⁵ Nae Yesu niyabona ati esidiiyiha syali sichaakire ohwiiruha nisyebuusa alala, yahabuhira esihyeeno esyo n'aboola ati, “Ewe esihyeeno sy'obudiimbe haandi esy'ohukwiisa esiru, hulagira endi, tula mu mwaana oyo, haandi otamukaluhaangamo ehabi liindi.”

²⁶ Mani nisyamala ohwaayula neende ohumususuucha bubi muno, syamutulamo, mani omusyaani oyo yaaba koti omulaambo kwafwa hale; mani abaandu bahira obuungi baaboola bati, “Amalire ohufwa.”

²⁷ Nae Yesu yamusesa n'amudiirire omuhono, mani yaasiingira yeema.

²⁸ Yesu niyali n'amalire ohwiingira mu nyuumba, abeeki bae bamuteeba nibali boong'ene bati, “Lwasiina efwe sihunyalire ohwiirusa esihyeeno esyo?”

²⁹ Nae Yesu yababoolera ati, “Esihyeeno sifwaana koti sino, sisinyala ohwiiruswa neende esiindu syoosi ohutusaho ohulaama hwoong'ene.”

Yesu haandi alomaloma hu hufwa hwae

³⁰ Yesu neende abeeki bae batula ao, baahalakania mu Galilaaya. Yesu siyakanyaho omuundu yeesi amanye atyo;

³¹ olwohuba yali niyeekesaanga abeeki bae n'ababoolera ati, “Omwaana w'Omuundu achia ohudiiswa mu mahono k'abaandu baandi, bamwiite; mani n'amalire ohwiitwa, oluunyuma lw'endaalo chidatu, achia ohusyuuha.”

³² Nae abeeki bae sibanyala ohumanya enomanoma eyo, mani baatya ohumuteeba.

Wiina ohiramo oluyaali mu baasye?

³³ Boosi boola Kaperanaumu; mani Yesu niyali amalire ohwiingira mu nyuumba, yabateeba ati, “Mubeere nimuyiinganiraanga siina hu ngira?”

³⁴ Nae abeeki boosi bawuleera sa chi; olwohuba nibali hu ngira bali bayiinganeenge abeene-na-beene oyo owali nabahiramo oluyaali.

³⁵ Yesu yeehala aasi mani yaalaanga ehumi-na-babiri abo; yababoolera ati, “Omuundu yeesi oba n'achia ohuba omwiimirisi, ahoyere ohuba ow'enyuma ohira mu boosi, haandi ohuba omuhalaabani wa boosi.”

³⁶ Yesu yabukula omwaana muyere, yaamweemesa akati waabwe; yaamwaakata mu mahono kae, yaababoolera ati,

³⁷ “Oyo yeesi owaakaanira omwaana ofwaana koti wuno mu liita lyaange aba yanjakaaniire; nae haandi oyo owunjakaanira, aba siyanjakaaniire sa, nae aba yakaaniire oyo owaanduma.”

Oyo otatuyiingania aba ali naafwe

³⁸ Nae Yowaana yaboolera Yesu ati, “Omweekesa, hubweene omuundu wuundi niyeerusa emisaambwa mu liita lyao, mani hwaamukayira olwohuba saali mulala hweefwe.”

³⁹ Nae Yesu yaboola ati, “Mutamukayira; olwohuba abulao onyala ohuhola omulimo kw'amaani mu liita lyaange, haandi abweene ao yaanomanomaho bubi.

⁴⁰ Olwohuba oyo otatuyiingania, aba ali alala naafwe.

⁴¹ Mbaboolera obwadyeeri endi, buli obaberesa amaachi k'ohung'wa olwohuba muli abaandu ba Kristo, haba saacha hufwiirwa omukabo kwae.

Amateemo kakwiisa mu syonoono

⁴² “Oyo okera mulala hu bayere bano abafukiiriramo yaakwa mu syonoono, syahahirire yaaboywa okukina kuhoongo mu kosi mani yaasukunwa mu nyaanja.

⁴³ Nae omuhono kwao nikukera waakwa mu syonoono, kutemeengeho; olwohuba ohwiingira mu bulamu butaakama nooli neende omuhono mulala, bihira ohuchia mu nyaanja y'omuliro neende amahono koombi, eyiri omuliro kutasima. [

⁴⁴ Eyo, enyeende chibalya haba sichahafwe daawe, haandi omuliro kubasaamba haba sikusima daawe.]

⁴⁵ Nae ohukulu hwao nihukera waakwa mu syonoono hutemeengeho, olwohuba ohwiingira mu bulamu butaakama nooli n'ohukulu hulala bihira ohuchia mu nyaanja y'omuliro nooli neende amakulu koombi. [

⁴⁶ Eyo ‘enyeende chibalya haba sichahafwe daawe, haandi omuliro kubasaamba haba sikwahasime daawe’.]

⁴⁷ Nae emoni yao niyikera waakwa mu syonoono, yichomoleengemo; olwohuba ohwiingira mu bwaami bwa Nasaae nooli neende emoni ndala bihira ohuchia mu nyaanja y'omuliro neende emoni choombi.

⁴⁸ Eyo ‘enyeende chibalya haba sichahafwe daawe, haandi omuliro kubasaamba haba sikwahasime daawe.’

⁴⁹ Olwohuba buli muundu achia ohuluungibwa n'omuliro.

⁵⁰ Omuunyu mulai nikwo; nae omuunyu nikuwaamo echamu lyakwo, kunyala kutye ohukaluswamo echamu elyo? Mubecheengemo echamu, haandi mumenyeenge neende omuleembe abeene-na-beene.”