Mariko 7 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Enjekesa ya bakuuka

¹ Nae bulaanu, Abafarisaayo bebuusira ali Yesu, alala neende abeekesa b'Amalako baandi abali nibatulire Yerusalemu,

² babona bati, abeeki ba Yesu baandi balichaanga nibatesaabire amahono, esyeekesa siti, haba sibesaabaanga amahono koti lu sihoyere.

³ (Olwohuba Abafarisaayo, neende Abayudaaya boosi, sibalya nibatesaabire amahono kaabwe ohweema hu muduunga kwali kwa bakuuka yaabwe;

⁴ nae haandi nibakaluha ango nibatula mu siito, sibalya esiindu syoosi si baba nibeechere nasyo nibataasilabiisye mberi haandi aliwo emiduunga kiindi emiingi muno kibahoyerwanga ohwooseresa koti, okw'ohwoosa ebikoombe neende esyoongo alala neende ebiindu byehoonyerwa byoosi ebyaholwa mu sibya sy'omugasa.)

⁵ Abafarisaayo alala neende abaandiiki b'Amalako bateeba Yesu bati, “Lwasiina abeeki bao haba sibaloondakana neende emiduunga kya bakuuka yeefwe, nae balya sa neende amahono mamali?”

⁶ Nae Yesu yababoolera ati, “Bwadyeeri omunabbi Yisaaya yadeeka yaalomaloma hu eng'we abeebachirisi koti lu syandiikwa siti, ‘Abaandu bano baanjisamo oluyaali neende emboosi choong'ene, nae emyooyo kyaabwe kiri eyale naange;

⁷ ohuunyinamira hwaabwe hubulamo amahuluundu,’ ‘beekesa koti amalako ebiindu bi baandu bataao sa.’

⁸ Eng'we muleha Elako lya Nasaae, nimwoomiirira hu miduunga ky'abaandu sa.”

⁹ Haandi Yesu yababoolera ati, “Eng'we muli neende amakesi muno akohunyoola engira ndai y'ohuta ebuleka Elako lya Nasaae, hu mweemeo munyale ohwooseresa emiduunga cheeng'we!

¹⁰ Olwohuba Musa yaboola ati, ‘Yisaanga oluyaali mu lataao neende maakoo’; haandi ati, ‘Oyo yeesi olomaloma bubi hu laatang'ene kata ng'ina, mubwadyeeri bweene ahoyera ohufwa’;

¹¹ naang'we muboola muti omuundu n'aboolera laatang'ene kata ng'ina ati, ‘Esyo si mbeere njia ohuhuberesa bulaanu siri Kobbani,’ (esyo nisyo esiyaanwa sibereeswe Nasaae)

¹² ao bulaanu simuba mumukanya ohuholeraho laatang'ene kata ng'ina, esiindu syoosi,

¹³ ao niwo yimunyaasiraanga elalira emboosi ya Nasaae nimwehoonyera emiduunga kyeeng'we ekyo kimuchiiririra nimweekesa abaana beeng'we. Haandi muhola ebiindu biingi biindi koti ebyo bityo.”

Ebiindu bibaha omuundu omukwoobo

¹⁴ Yesu haandi yalaanga abaandu beecha yaali, mani yababoolera ati, “Eng'we mweesi mutekeerese bulai bi mboola bino, haandi mumanye muti:

¹⁵ abulao esiindu syoosi esiingira mu muundu nisitula erwaanyi wae esinyala ohumubaha omukwoobo; ohutusaho ebyo ebitula mu muundu nibyo ebimubaha omukwoobo.”

¹⁶ Leha oyo oli neende amatwi kawulira, awulire.

¹⁷ Nae abaandu nibaba nibamalire ohuwaao, Yesu yeengira mu nyuumba, mani abeeki bae nibamuteeba amahuluundu k'olukaado olwo.

¹⁸ Nae yababoolera ati, “Hane mbao mwesi musisiiri ohumanya. Haba simubona muti buli siindu syoosi esiingira mu muundu ohutula erwaanyi wae sisinyala ohumubaha omukwoobo,

¹⁹ olwohuba nisiingira, haba sisichia mu mwooyo, nae sichia mu nda yae mani syaabitamo sa?”

²⁰ Niyemeeda ohuboola ati, “Esiindu situla mu muundu nisyo esimubaha omukwoobo.

²¹ Olwohuba, ebiindu bitula mu muundu, biba bitula mu mwooyo kwae, omwo nimwo omutula ebibaaso bibi, obuyirani, obwiibi, obutemo, obucheke,

²² obwekoombi bubi, obusuku, obubacha, obusereri bubi, ehiinda, obumoonyi, esuunga, neende esibboli.

²³ Ebibi bino byoosi, bitula mu muundu, mani nibyo ebimubaha omukwoobo.”

Efukiirira y'omuhasi

²⁴ Niyamala atyo, yasiingira yawaao yaachia mu syaalo sya Tiiro neende Sidoni. Yeengira mu nyuumba, naatakanyaho omuundu yeesi amanye; nae kata katyo, haba siyanyalaho ohweekisa.

²⁵ Abweene ao, omuhasi wuundi yi mwaana wae muhaana yaliho esihyeeno, niyawulira ati Yesu aliwo, yeecha yaakwa aasi mu makulu kae.

²⁶ Omuhasi chana oyo yali Omugiriki, omwiibulanwa wa Foenisia ohutula Siria. Mani yasaba Yesu yeeruse omusaambwa okwomu mwaana wae oyo.

²⁷ Yesu yaboolera omuhasi oyo ati, “Leha mberi huliise abaana, olwohuba sisilai ohubukula ebyohulya by'abaana mani waabisukunira embwa.”

²⁸ Nae omuhasi oyo yamukobolamo ati, “Eee, Omuhuluundu; kata katyo, embwa chiri aasi w'emeesa chosi chilichaangaho kata hu bidonye-donye by'ebyaahulya bi baana balya balehaho.”

²⁹ Nae Yesu yamuboolera ati, “Ohweema hu nomanoma yao eyo, onyala weweraao; omusaambwa kumalire ohutula hu mwaana wao oyo.”

³⁰ Omuhasi oyo yawaao yaakobola engo, yanyoola omwaana wae oyo niyeyaliise hu sitaanda, omusaambwa nikumalire ohumutulaho.

Yesu awonia omudiimbe otanyala ohulomaloma.

³¹ Yesu niyakobola ohutula mu syaalo sya Tiiro, yabitira hu ngira ya Sidoni, eyomu syaalo sy'ebiko ehumi (Dekapooli), naachia hu nyaanja ya Galilaaya.

³² Mani nibamuleetera omusaacha wuundi owali omudiimbe haandi otanyala ohulomaloma; mani baasaba Yesu amwiiseho omuhono kwae.

³³ Nae Yesu yamuyira endulo yi baandu bataali, yaata enjala chae mu matwi k'omusaacha oyo, haandi yafuucha amate, yaamudiira hu lulimi;

³⁴ niyamala atyo yatingaala Muukulu, yeesa omwooyo mani yaamuboolera ati, “Efufaata,” esyeekesa mbwe, “Yikuha.”

³⁵ Mani amatwi kae nikeekuha, olulimi lwae lwaboololoha, yaanyala ohulomaloma bilai byeene.

³⁶ Yesu yabalagira ati batabooleraho omuundu yeesi; nae koti lu yachiiririraanga ohubalagira, nilwo lwosi lu baandu bachiririraanga ohusilomalomaho neende obwomiifu bwoosi.

³⁷ Abaandu besiinduha ohubitiirira, nibaboola bati, “Wuno mbano aholere ebiindu byoosi bilai byeene; ahola kata abadiimbe bosi nibawulira haandi abasiruwala bosi nibalomaloma.”