Mariko 6 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abaandu ba Nasareeti beekaana Yesu

¹ Yesu yatula ao yaachia mu syaalo sy'ewaabwe syeene mani abeeki bae bamuloondaho.

² Nae oludaalo lwa Sabbaato nilwoola, yachia mu Sinagoogi yachaaka ohweekesa. Abaandu abaangi bali omwo nibawulira bi yeekesa, besiinduha muno mani beeteeba bati, “Nae omusaacha wuno yatusa yeena bino byoosi? Makesi siina kano ka bamuberesa? Anyalirwa atye ohuhola ebiwuukisa bino!

³ Wuno haba siniye omuraandi w'embaao sa, omwaana wa Maria, haandi mwanaang'ina Yakobbo neende Yosefu, neende Yuda neende Simooni, haandi bambochoong'ene sibamenya sa naafwe?” Mani baamwekaana.

⁴ Nae Yesu yababoolera ati, “Omunabbi yeesi saahaywa ohubereswa oluyaali ohutusaho mu siko sy'ewaabwe syeene, haandi mu baandu bae beene, haandi mu b'enyuumba yae yeene.”

⁵ Mani Yesu siyaholerahooyo eby'amayia byoosi, ohumalaho ohwiisa amahono kae hu balwaae badiidi sa mani yaabawonia.

⁶ Yesu yesiinduha muno hulw'efukiirira ndiidi yi bali nayo. Yesu yabita niyeekesa mu ngoongo.

Yesu atuma abeeki ehumi-na-babiri

⁷ Yalaanga abeeki ehumi-na-babiri beeche yaali, mani yaabatuma bachie babiri-babiri, naababereese obunyala bw'ohwiirusa ebihyeeno.

⁸ Yabalagira batakiingaho esiindu syoosi hu lukeendo lwaabwe ohutusaho endabuhi; batakiinga omugaati kwoosi, kata omufuuko, kata eseende yoosi mu sibiro chaabwe;

⁹ nae befwaale ebiraato bya akaala, haandi ati batefwaalaho amakaanju kabiri.

¹⁰ Yesu yababoolera ati, “Nimwiingiraanga mu nyuumba yoosi, mubecheenge omwo ohwoola lu muweerao.

¹¹ Nae nimwolaanga abuundu yi batababukaanira mani bahaya ohubawulira, nimuba nimutula mu syaalo esyo, muteeng'ulaanga olufu luli hu makulu keeng'we lube esilolero sibakabuhania nabo.”

¹² Abeeki abo bachia bayaala bati abaandu bahoyere ohwefunaka.

¹³ Sakira beerusa hu baandu emisaambwa miingi muno, baabaha abalwaae abaangi amafuta, mani baabawonia.

Ohufwa hwa Yowaana Omubatiisi

¹⁴ Bulaanu omutuki Herode yeemao yaawulira ebyo byoosi, olwohuba eliita lya Yesu lyali lifuma muno. Abaandu baandi baboola bati, “Wuno niye Yowaana Omubatiisi owasyuuhiiswe ohutula mu bafu; mani sakira obunyala buno bwoosi buli ohumuholeramo.”

¹⁵ Nae abaandu baandi nabo baboola bati, “Wuno niye Elija.” Abaandi haandi baboola bati, “Wuno niye omunabbi, oli sa koti mulala hu banabbi bahale.”

¹⁶ Nae Herode niyawulira ebyo yaboola ati, “Yowaana, yi ndaheengaho omutwe, niye wuno yuuhiiswe.”

¹⁷ Olwohuba Herode yali yatuma haandi niyadiira Yowaana, mani nibamuboyera mu jeela hulwa Herodia, owali omuhasi wa Filipo mwanaang'ina, yi Herode yali yadeehya.

¹⁸ Olwohuba Yowaana yali yaboolera Herode ati, “Haba sisihoyera ewe ohudeehya omuhasi wa mwaanamaao.”

¹⁹ Herodia yali yadiirira Yowaana ehiinda, n'akiiyanga ohumwiita. Nae yali saanyala ohusihola,

²⁰ olwohuba Herode yali yatya muno Yowaana n'amanyire bulai bweene ati, Yowaana yali omusaacha omuluungifu mweene haandi omwoolerefu, mani yaamuliinda bulai bweene. Niyawulira Yowaana n'ayaala, yateenga muno; kata niyasaangaalira bi Yowaana yayaalaanga.

²¹ Nae ehabi yadiira Herodia, hu ludaalo lw'esichuliso sy'ohwiibulwa hwa Herode. Herode yali aholere esidyaalo sihoongo muno, niyehaase abaami bahuluundu neende bahuluundu b'abasikaari, alala neende abaandu bahunuufu mu Galilaaya.

²² Nae omuhaana wa Herodia ni yahina, yasaangaasa muno Herode alala neende abakeni bae; mani omutuki oyo yaboolera omuhaana oyo ati, “Saba esiindu syosi si wekoomba, njia ohuhusiberesa.”

²³ Yeechuba n'aboolera omuhaana oyo ati, “Buli siindu syosi-syosi syonasaba, njia ohuhuberesa, kata sibe esituundu sy'obwaami bwaange.”

²⁴ Mani omuhaana oyo yatula erwaanyi, yaachia yaboolera ng'ina ati, “Sabe siindu siina?” Nae ng'ina yamuboolera ati, “Saba omutwe kwa Yowaana Omubatiisi.”

²⁵ Abweene ao, omuhaana oyo yeeruha bwaangu yakaluha eyiri omutuki oyo mani yamuboolera ati, “Ndaha wumberese bulaanu buno omutwe kwa Yowaana Omubatiisi hu lusaani.”

²⁶ Mani omutuki oyo yelalihirira muno; nae niyabaasa hu sichubo syae alala neende hu bakeni bae, siyadaha ohuhalaka bi yali aboolere omuhaana oyo.

²⁷ Abweene ao, omutuki oyo yatuma mulala hu basikaari baliindi, yamulagira ohuleeta omutwe kwa Yowaana. Omusikaari oyo yachia yaatemaho omutwe kwa Yowaana naali mu jeela,

²⁸ yaleeta omutwe okwo hu lusaani, mani n'akudiisa omuhaana oyo; omuhaana oyo nae yaachia yaakudiisa ng'ina.

²⁹ Abeeki ba Yowaana nibawulira sino, babukula omubiri kwae, mani baakusiiha mu ng'ani.

Yesu aliisa esidiiyiha sy'abaandu sihoongo muno

³⁰ Olwoola, abatume bakobola eyiri Yesu, mani baamukaniaayira ebiindu byoosi bi bali nibaholere haandi nibekeese.

³¹ Nae Yesu yababoolera ati, “Mutuleyo muchie yi baandu bataali, mube eyo mweeng'ene, mani muwuluuheho budiidi.” Olwohuba abaandu abaangi bali bemeeda ohwiicha haandi abaandi nibawaao, nibihaire Abeeki ohunyoola kata obweyaango bw'ohulya.

³² Beengira mu lyaato, baambuha baachia abuundu abulao abaandu, baba eyo boong'ene.

³³ Bulaanu, abaandu abaangi bababona, baabamanyirisa, beeruhaho nibatula mu biko byoosi, mani baabataangirira ohwoolayo.

³⁴ Yesu niyoola sa ati hu sikobero, yabona esidiiyiha sihoongo nisimalire ohwebuusa, mani yaabakwira esisa, olwohuba bali nibali koti amakoondi kabula omwaayi; mani yachaaka ohubeekesa ebiindu biingi muno.

³⁵ Obwiire nibweera, abeeki bae beecha yaali baboola bati, “Abuundu ano abulao abaandu, haandi mbao obwiire buli ohwiira;

³⁶ Seebula abaandu bano baweeo, bachie mu ngoongo neende mu byaalo by'aambi ano, banyale ohwekulira esyohulya.”

³⁷ Yesu nae yabakobolamo ati, “Eng'we mubaberese esyohulya.” Nae abeeki bae nabo bamuboolera bati, “Efwe huchie hukule emigaati ky'edinaari emia chibiri hubaberesa balye?”

³⁸ Nae Yesu yababoolera ati, “Naang'we muliho neende emigaati kiinga? Muchie mubaliise.” Mani nibamala ohubaliira, bamuboolera bati, “Kiri emigaati kitaanu neende eng'eeni chibiri.”

³⁹ Yesu yaboolera abaandu boosi ohwiihala aasi hu bunyaasi bw'omuboka mu mikaanda.

⁴⁰ Abaandu beehala aasi, mu mikaanda ky'abaandu emia ndala-ndala, haandi abaandi mu mikaanda kya amahumi kataanu-kataanu.

⁴¹ Yesu yabukula emigaati kitaanu echo neende eng'eeni chibiri echo, yatingaala aakulu Muukulu, yabiberesa ehabi, yamekula-mekula emigaati ekio, yaakidiisa abeeki bachie bakiberese abaandu; haandi yaakaba abaandu boosi eng'eeni chibiri echo.

⁴² Abaandu abo boosi balya beekuta.

⁴³ Babuusa alala ebimweero ehumi-na-bibiri ebichuule ebidonye-donye byadoong'aho eby'emigaati neende eby'eng'eeni.

⁴⁴ Abalya ebyohulya ebyo bali abasaacha elifu chitaanu enaamba.

Yesu akeenda hu maachi

⁴⁵ Abweene ao Yesu yaboola abeeki bae beengire mu lyaato bamutaangirire ohwaambuha bakwe engereha w'enyaanja, mu Bbetisaida, omweene naasisebulaanga esidiiyiha sy'abaandu esyo.

⁴⁶ Yesu niyamala ohubeetusaho boosi, yaachia yaaniina hu lugulu ohulaama eyiri Nasaae.

⁴⁷ Nae obwiire nibweera, elyaato ly'abeeki bae lyali limalire ohwooloberera ebusiba w'enyaanja, nae omweene n'adoong'ere yeeng'ene engereha hu lukoongo.

⁴⁸ Yesu yeemao yabona ati abeeki bae abo bali nibali ohunyaahana muno ohufuka elyaato ohusuda, olwohuba omuyaka kwali nikuwuucha nikutulira yi bali nibachoomere. Nae nichali aambi w'esaa chine ch'esiro, Yesu yabonehana n'akeenda hu maachi, niyeecha yi bali. Yali adaha abitireho sa aambi nabo,

⁴⁹ nae nibabona naali ohukeenda hu maachi babaasa bati syali esihyeeno, mani boobba wuuwi;

⁵⁰ olwohuba boosi bali bamubweene, mani nibakwiiremo oluteengo. Nae abweene ao, Yesu yalomaloma nabo n'aboola ati, “Mugume omwooyo, olwohuba niise mweene; mutatya.”

⁵¹ Yesu yeemao yeengira mu lyaato li balimo elyo mani omuyaka kwaakama. Mani abeeki bawuka muno,

⁵² olwohuba sibali nibamanyire esy'amayia sy'emigaati kira, olwohuba emyooyo kyaabwe kyali kyahahanyala.

Yesu awonia abalwaae mu Genesareeti

⁵³ Nibali nibamalire ohwaambuha engereha, boola hu lukoongo lwa Genesareeti, baaboya elyaato lyaabwe ao.

⁵⁴ Nae nibatula sa bati mu lyaato, abaandu bamanyirisa Yesu bwaangu,

⁵⁵ mani beeruha basalaanira mu ngoongo chisibiraane ao choosi, baachaaka ohuleeteraanga abalwaae hu buliri bwaabwe, buli abuundu woosi yi babeechaanga bawuliire bati ao niwo yi Yesu ali.

⁵⁶ Buli abuundu woosi yi Yesu yechaanga, kata mu ngoongo, ebiko bihuluundu, oba esyaalo, haandi abaandu baalisaanga abalwaae mu biito, mani nibamusabaanga bati badiireengeho sa kata hu kemo ly'engubo yae; nasitalomwa buli oyo yeesi owayidiirangaho, yawoneraangao.