Mariko 11 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yesu yeengira mu Yerusalemu neende oluyaali

¹ Nae nibali niboola mu Yerusalemu, aambi neende Bbetifaage neende Bbetani, boola hu Lugulu lw'Emiseituuni, mani Yesu yaatuma babiri hu beeki bae,

² naababoolera ati, “Muchie mu lukoongo lubali mu moni, nae nimunalwiingiramo sa muti, muchia ohunyoola omwaana kw'esuhiri nikuboyerwe, okuteehalwahooho neende omuundu; mukuboolole mani mukuleete.

³ Nae omuundu yeesi naababoolera ati, ‘Muli ohuhola siina sino?’ Muboole muti, ‘Omwaami niye okudaha, achia ohukukalusa bwaangu.’ ”

⁴ Mani bawaao, banyoola omwaana kw'esuhiri nikuboyerwe amulyaango w'enyuumba hu ndulo w'engira ndakalafu; mani baakuboolola.

⁵ Nae abo abali nibeemere aambi ao bababoolera bati, “Eng'we muhola siina esyo? Lwasiina muli ohuboolola omwaana kw'esuhiri okwo?”

⁶ Nae abeeki abo baabakaluhamo koti Yesu yali ababoolere; mani baabaleha bawaao.

⁷ Abeeki abo baleetera Yesu omwaana kw'esuhiri okwo, baakwaalaho engubo chaabwe; mani Yesu yaakwiihalaho.

⁸ Mani abaandu abaangi baala engubo chaabwe hu ngira, nae abaandi baakula amasaga k'emisaala akaliho amasaafu maangi mani baakaala hu ngira.

⁹ Mani abo abali nibatangiiremo neende abo abali nibaloondaho bachaaka ohuhuumula nibaboola bati, “Hosaana! Ali neende ehabi oyo owiicha mu liita ly'Omwaami!

¹⁰ Buli neende ehabi obutuki bwa seefwe Daudi obuli ohwiicha! Hosaana aakulu muno!”

¹¹ Yesu yeengira mu Yerusalemu, yaachia mu Nyuumba ya Nasaae; yatingaala yaaswaania buli siindu; nae koti obwiire bwali bwiirire, yatula yaachia Bbetani alala neende abeeki bae ehumi-na-babiri.

Yesu abwaaba omutuli

¹² Nibwahya, hu ludaalo luloondaho, nibeecha ohutula Bbetani, enjala yaluma Yesu.

¹³ Nae niyabona omutuli eyale nikudidiisye amasaafu, yasuda aambi ohubona naanyala ohukunyoolahooho esyaamo syosi. Nae niyakwoolaho, haba siyakunyoolahooho esiindu syosi ohutusaho amasaafu sa, olwohuba sisyali esiha sy'emituli ohwaama.

¹⁴ Mani Yesu yaakuboolera ati, “Omuundu yeesi ahoya yahaya ohuhulyaahooho esyaamo syosi haandi.” Mani abeeki bae nabo bawulira sino.

Yesu yeengira mu Nyuumba ya Nasaae

¹⁵ Mani boola Yerusalemu. Nae niyeengira mu Nyuumba ya Nasaae, yachaaka ohwiirusamo abo abali nibakusira alala neende abo abali nibakulira mu Nyuumba ya Nasaae eyo. Mani yafuumamya emeesa ch'abafuunji b'eseende neende ebisaala by'abo abali nibakusa amabburuuku;

¹⁶ mani haba siyafukiirira omuundu yeesi ohubisira esiindu syosi mu Nyuumba ya Nasaae.

¹⁷ Yesu yeekesa n'ababoolera ati, “Haba sisyandiikwa mu byandiiko byoolerefu siti, ‘Enyuumba yaange yahalaangwe enyuumba y'esaala eyiri abaandu boosi?’ Nae eengwe muyiholere obweekiso bw'abanyaka.”

¹⁸ Nae abalaamisi bahuluundu alala neende abaandiiki b'Amalako nibawulira batyo, bachaaka ohukiiya engira y'ohumwiitiramo; nae bamutya olwohuba esidiiyiha sy'abaandu syali siwukaho sa enjekesa yae.

¹⁹ Nae engoloobe niyoola, Yesu neende abeeki bae batula mu siko esyo.

Elyeeko litula hu mutuli

²⁰ Nae nibali nibabitao echuli, babona omutuli okwo nikwoomere ohwoolera elalira hu misi.

²¹ Ao Petero yeechulisa, mani yaboobera Yesu ati, “Omwaami, bonaho! Omutuli ku wabwaabire kumalire ohwooma.”

²² Nae Yesu yabakobolamo ati, “Mufukiirire mu Nasaae.

²³ Mbaboolera obwadyeeri endi, oyo yeesi oboolera olugulu luno ati, ‘Wekiinge weesukune mu nyaanja,’ mani yahaya ohukana-kana mu mwooyo kwae, nae yafukiirira ati esyo syaaba alomaloma sichia ohweehola, siba sichia ohumweeholehera sityo.

²⁴ Sakira mbaboolera endi, buli syosi syooba noosaba mu saala, fukiirira oti omalire ohusinyoola esyo, haandi siba sichia ohuba esyeeng'we.

²⁵ Nae nimweema ohulaama, mulehereenge abasyeeng'we babaliho emboosi mberi, hu Seeng'we oli Muukulu yesi anyale ohubalehera ebyonoono byeeng'we.

²⁶ Nae nimutalehera abasyeeng'we, Seeng'we oli Muukulu yesi haba saaba achia ohubalehera ebyonoono byeeng'we mwesi.”

Esiteebo sidiira hu bunyala bwa Yesu

²⁷ Mani haandi boola mu Yerusalemu. Nae niyali akeenda mu Nyuumba ya Nasaae, abalaamisi bahuluundu alala neende abaandiiki b'Amalako, beecha yi yali,

²⁸ bamuboolera bati, “Otusaanga yeena obunyala bw'ohuhola ebiindu bino, kose wiina owahuba obunyala bw'ohuhola bino?”

²⁹ Yesu yababoolera ati, “Njia ohubateeba esiteebo silala syoong'ene; nimuungaluhamo, syesi mba njia ohubaboolera yi ndusaanga obunyala bw'ohuhola bino.

³⁰ Ohubatiisa hwa Yowaana, hwatula Muukulu, kose mu baandu? Muungaluhemo.”

³¹ Baboolanira abeene-na-beene bati, “Nihuboola huti, ‘hwatula Muukulu,’ achia ohutuboolera ati, ‘Lwasiina simwamufukiirira?’

³² Kose huboole huti, ‘Hwatula mu baandu?’ ” Bali batiire abaandu, olwohuba abaandu boosi bali bamanyire bati, Yowaana yali omunabbi mweene.

³³ Mani bakaluha mu Yesu bati, “Efwe hukoterwe.” Nae Yesu yababoolera ati, “Syesi haba siinja ohubaboolera yi ndusaanga obunyala bw'ohuhola ebiindu bino.”