Mariko 10 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yesu yeekesa hu hulobana

¹ Yesu yaatula ao, yaachia mu syaalo sya Yudea mani yaambuha omwaalo kwa Yorodaani, haandi esidiiyiha syaamwebodoohaniaho; nae koti lu yali yanala ohuholaanga, yachaaka ohubeekesa haandi.

² Nae Abafarisaayo beecha yaali, bamuteeba nibamuhema bati, “Sifukiirirwa omusaacha ohwiirusa omuhasi wae?”

³ Yesu yabakobolamo ati, “Musa yabalagira siina syeene?”

⁴ Nabo baboola bati, “Musa yafukiirira omusaacha ohwandiika ebbarwa y'ohwiirusa omuhasi, mani yaamwemaliraho elalira.”

⁵ Nae Yesu yababoolera ati, “Musa yabaandiikira atyo ohweema hu bwaangalafu bw'emyooyo kyeeng'we.

⁶ Nae ohutula hu huloongwa hw'esyaalo, ‘Nasaae yabaloonga boombi, omusaacha neende omuhasi.’

⁷ ‘Mani hulw'esifune sino, omusaacha achia ohulehaanga laatang'ene neende ng'ina yambaanisibwe neende omuhasi wae,

⁸ mani boombi beehola omubiri mulala. Bulaanu sibaba basisiiri babiri haandi, nae baba bali omubiri mulala.’

⁹ Sakira, esyo si Nasaae yamala ohwambaania alala, omuundu yeesi atasikabuhanianga.”

¹⁰ Nae nibali mu nyuumba, abeeki bae haandi bamuteeba ebidiira hu siindu sino.

¹¹ Nae Yesu yababoolera ati, “Oyo yeesi owiirusa omuhasi wae, mani yaadeehya owuundi, aba aholere obucheke;

¹² haandi omuhasi yesi naaloba wamwe, yamala yadeehera omusaacha wuundi, aba ahola obucheke.”

Yesu aberesa abaana bayere ehabi

¹³ Abaandu baandi bali nibaletaanga abaana eyiri Yesu abadiireho neende amahono kae, nae abeeki bae baabakayira n'obwaalaba.

¹⁴ Nae Yesu niyabona atyo, yanyoolera, mani yaababoolera ati, “Mulehe abaana beeche yi ndi, mutabakayira; olwohuba abali koti bano nibo abeene obwaami bwa Nasaae.

¹⁵ Mbaboolera obwadyeeri bweene endi, oyo yeesi otaakaanira obwaami bwa Nasaae koti omwaana muyere, haba saacha ohubwiingiramo daawe.”

¹⁶ Mani Yesu yabaakata yaababeresa ehabi, nabeesaho amahono.

Omusaacha muyiinda

¹⁷ Mani Yesu niyali hwaatula ohuchaaka olukeendo lwae ati, omusaacha wuundi yeecha yaali niyeeruha mani yaasigama mu moni wae yaamuteeba ati, “Omweekesa mulai ewe, siina syeene si hoyeere ohuhola hu nyemeo nyoole obulamu butaakama?”

¹⁸ Nae Yesu yamuboolera ati, “Lwasiina wunaanga omulai? Abulao omulai, ohutusaho Nasaae yeeng'ene.

¹⁹ Omanyire amalako kano: Oteetaanga, Otayiranaanga, Oteebaanga, Otabachiraanga owaasyo, Otabachaanga, Yiisaanga oluyaali mu lataao neende maakoo.”

²⁰ Nae omusaacha oyo yamukobolamo ati, “Omweekesa, ako koosi, ndakooseresa ohutula mubuyere bwaange.”

²¹ Yesu niyamwewuunja, yamusiima, mani yamuboolera ati, “Obuliraho esiindu silala siti; chia okuse byooli nabyo, omale obikabe abamanani, ochia ohunyoola obuyiinda Muukulu; mani wiiche, wuunoonde.”

²² Nae omusaacha oyo niyawulira atyo, yawaamo amaani, mani yaawaao nasinyiihe muno; olwohuba yali naali neende emyaandu emiingi muno.

²³ Yesu yeemao yaatingaala abeeki bae, mani yaababoolera ati, “Nga bicha ohudinyira muno abayiinda ohwiingira mu Bwaami bwa Nasaae!”

²⁴ Abeeki bae bawuka muno emboosi eyo. Nae Yesu yababoolera haandi ati, “Baana baange, nga sidinyu muno ohwiingira mu Bwaami bwa Nasaae.”

²⁵ Syaangu muno engamia ohubita mu liina ly'esindaani, ohuhira omuundu muyiinda ohwiingira mu Bwaami bwa Nasaae.

²⁶ Haandi bemeeda ohwesiinduha muno, mani baaboolera Yesu bati, “Nikali katyo, wiina mweene onyala ohuwonisibwa bulaanu?”

²⁷ Yesu yabatingaala, mani yaaboola ati, “Eyiri abaandu sisinyaliha, nae sibiri bityo eyiri Nasaae; olwohuba ebiindu byoosi binyaliha eyiri Nasaae.”

²⁸ Nae Petero yamuboolera ati, “Bona, efwe hwaleha ebiindu byoosi mani hwaahuloonda.”

²⁹ Yesu yaboola ati, “Mbaboolera obwadyeeri bweene endi, abulao omuundu yeesi owaleha enyuumba, kata bamwanaang'ina, kata bambochoong'ene, kata ng'ina, kata laatang'ene, kata abaana, kata amaloba, hulwaange neende hulw'emboosi ndai,

³⁰ otahanyoole amayuumba neende bamwanaang'ina neende bambochoong'ene neende bang'ina neende abaana neende amaloba amahabi emia ndala mu bulamu buno, alala neende ohusaandisibwa, nae mu bulamu bwiicha, achia ohunyoola obulamu butaakama.

³¹ Nae abaangi abataangiramo bulaanu, bachia ohumaliirihayo, nae abamaliirihayo bachia ohutaangiramo.”

Yesu alomaloma ehabi lyohudatu hu hufwa hwae

³² Haandi Yesu neende abeeki bae bali nibali hu ngira nibakeenda nibachia Yerusalemu, nae Yesu yali naabeemiriiremo; mani besiinduha muno, neende abo abali nibabaloondaho baatya muno. Yesu yeemao yaakabula abeeki bae ehumi neende babiri yaabasudya endulo, mani yachaaka ohubaboolera ebyo ebyali nibichia ohumweeholaho ati,

³³ “Bone, mbao huchia Yerusalemu; yi Omwaana w'Omuundu achia ohudiisirwa abalaamisi bahuluundu alala neende abaandiiki b'Amalako, mani bamuheengere omusaango okw'ohufwa, haandi bamudiise Abateende;

³⁴ mani bachaake ohumuhomoola, ohumufuuchaho amate, ohumunaala ehoba, neende ohumwiita; nae luunyuma lw'endaalo chidatu, achia ohusyuuha.”

Ohusaba hwa Yakobbo neende Yowaana

³⁵ Mani ao, Yakobbo neende Yowaana, abasyaani ba Sebbedaayo, beecha mu moni wa Yesu, mani baamuboolera bati, “Omweekesa, efwe hudaha ofukiirire ohutuholera esyo syoosi si huchia ohuhusaba.”

³⁶ Mani Yesu yabateeba ati, “Siina syeene si mudaha ese mbaholere?”

³⁷ Nabo bamuboolera bati, “Tufukiirire hwiihale, mulala hu muhono kwao muluungi, nae owuundi hu mukaada, mu bwaami bwao.”

³⁸ Nae Yesu yababoolera ati, “Eng'we haba simumanyire si muli ohusaba. Munyala ohung'wa esikoombe sy'esaando si njia ohung'wa, oba ohubatiisibwa mu ngeri nasilala neende yiinjia ohubatiisibirwamo?”

³⁹ Nabo bamuboolera bati, “Eee hunyala.” Nae Yesu yababoolera ati, “Esikoombe si njia ohung'wa muchia ohusing'wa; haandi embatiisa yiinjia ohubatiisibirwamo, niyo yi mwesi muchia ohubatiisibirwamo;

⁴⁰ nae ohwiihala hu muhono kwaange muluungi, oba hu mukaada, haba sibunyala bwaange ohubanyalira, nae hu abo ba hwamala ohutekeherwa.”

⁴¹ Nae ehumi badoong'ereo nibawulira batyo, banyoolerera muno Yakobbo neende Yowaana.

⁴² Yesu yeemao yaabalaanga boosi beecha yaali, mani yaababoolera ati, “Eng'we mumanyire muti abaandu bamanyihaane koti batuki b'abateende babeehalaho neende obunyala buungi muno, haandi abeemeresi baabwe bahunuufu babatukira amaani maangi.

⁴³ Nae haba sisihoyere ohuba sityo mweeng'we daawe; nae oyo odaha ohuba omuhoongo mweeng'we, ahoyere ohuba omuhalaabani weeng'we,

⁴⁴ nae haandi oyo odaha ohuba omweemeresi mweeng'we ahoyere ohuba omutumwa wa boosi.

⁴⁵ Olwohuba Omwaana w'Omuundu yesi haba siyeecha ohuhalaabanirwa, nae yeecha ohuhalaabanira abaandu, haandi neende ohuyaanayo obulamu bwae bube obwohununula abaandu abaangi.”

Yesu awonia omuwofu Bbatimaayo

⁴⁶ Beemao beecha mu Yeriko; mani haandi koti lu Yesu yali hwatula sa ati mu Yeriko alala neende abeeki bae neende esidiiyiha sihoongo sy'abaandu, baakaana Bbatimaayo owali omuwofu musabirisi, omwaana wa Timaayo, niyehaale hu ndulo w'engira.

⁴⁷ Nae niyawulira ati hane Yesu wa Nasareeti niye owali niyeecha, yachaaka ohwaayulira aakulu n'aboola ati, “Yesu, Omwaana wa Daudi, ngwiire esisa!”

⁴⁸ Nae abaandu baandi bamwaalabira nibamuboolera bati awuleere; nae nga lu bemeedaanga ohumwaalabira bati abuleere, nilwo lu Bbatimaayo yaniinianga ekono lyae niyaayulira aakulu muno ati, “Ewe Omwaana wa Daudi, ngwiire esisa!”

⁴⁹ Yesu yeema mani yaaboola ati, “Mumulaange.” Mani nibalaanga omusaacha muwofu oyo nibamuboolera bati, “Sangaala; siingira, mbao ahulaanga.”

⁵⁰ Mani niyawulira atyo, yasukuna era engubo yae, yaasiingira yeema yeecha eyiri Yesu.

⁵¹ Nae Yesu yamuteeba ati, “Siina syeene sy'odaha huholere?” Nae omusaacha muwofu oyo yaboolera Yesu ati, “Omwaami, leha mbone haandi.”

⁵² Yesu yamuboolera ati, “Efukiirira yao yihuwoniisye, weweereo.” Mani ao-na-ao, omusaacha oyo yachaakirao ohubona mani yaaloonda Yesu.