Luka 24 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohusyuuha hwa Yesu

¹ Nae hu ludaalo lutaangira mu juma, mu mabwiibwi, abahasi abo babukula ebiindu biwunya esing'aari bi bali nibatekeehe, bachia hu siriindwa.

² Mani babukaana ekina nilisiingiiswe nilitusirwe hu mulyaango kw'esiriindwa,

³ nae nibeengiramo, haba sibanyoola omubiri.

⁴ Nibali basyeemere ao, nibawuka esyali siholehane, bone, abasaacha babiri abefwaalire engubo chimesa-mesana beema aambi nabo;

⁵ nae koti lu bali batiire, haandi beenamye obweeni bwaabwe hu loba, abasaacha abo bababoolera bati, “Lwasiina mukoonya omulamu mu bafu?

⁶ Mwiichulise koti lu yababoolera, n'asisiiri mu Galilaaya,

⁷ ati, Omwaana w'Omuundu ahoyere ohuteebwa mu mahono k'abahola-mbi, haandi abaambwe hu musalabba, nae hu ludaalo lwohudatu asyuuhe.”

⁸ Mani beechulisa emboosi chae echo,

⁹ batula hu ng'ani bachia baboolera ehumi neende mulala alala neende abadoong'ereo boosi ebiindu bino byoosi.

¹⁰ Bulaanu abahasi bano bali, Maria Magidalena, neende Yoana neende Maria ng'ina Yakobbo alala neende abahasi baandi ba bali nabo ababoolera Abatume ebiindu bino;

¹¹ nae Abatume bayira emboosi chino koti olukano sa, mani bahaya ohufukiirira eby'abahasi ebyo. [

¹² Nae Petero yasiingira yeruha naachia hu siriindwa; yaguunama yalingaalamo, yabona engubo ch'elaasi nichiri choong'ene; mani yaakobola engo n'awuka sa esyali nisyeholeehe.]

Olukeendo luchia Emausi

¹³ Hu ludaalo lweene olwo, babiri hu beeki ba Yesu, bali bachia mu lukoongo lulaangwa luti Emausi, aambi wa ekilomiita ehumi-na-ndala ohutula Yerusalemu,

¹⁴ bali nibalomalomaanga abeene-na-beene hu biindu byoosi ebyali nibiholehaane.

¹⁵ Nibaba nibasiilomalomaanga haandi nibeteebanaho abeene-na-beene, Yesu mweene yaasuda aambi yakeenda nabo.

¹⁶ Bamubona nae bahaya ohumumanyirisa.

¹⁷ Mani Yesu yababoolera ati, “Mbaha siina yino yi muli ohukaniaayaanga abeene-na-beene nimukeenda?” Mani beema nibelalihiriire muno.

¹⁸ Mani mulala hu abo, olaangwa ati Kiliopa, yamukobolamo ati, “Niiwe omukeni weeng'ene mu Yerusalemu otaamanyireho ebiindu byeeholeheyo mu ndaalo chino?”

¹⁹ Nae Yesu yababoolera ati, “Biindu siina?” Nae bamuboolera bati, “Ebidiira hu Yesu wa Nasareeti, owali omunabbi w'amaani muno mu biholwa neende mu mboosi mu moni wa Nasaae neende mu moni w'abaandu boosi,

²⁰ haandi koti, abalaamisi bahuluundu beefwe neende abatuki bamuyira aheengerwe omusaango kw'ohufwa mani bamubaambe hu musalabba.

²¹ Nae hwali hubaasa huti niye ochia ohuwonia Yisiraeli. Eee, haandi ohumeeda hu bino byoosi, bulaanu chibitireo endaalo chidatu, ohutula bino biholehana.

²² Haandi, abahasi baandi ohutula mu mukaanda kweefwe batusinduuse muno. Bachiire hu siriindwa echuli muno,

²³ bahaya ohubukaanayo omubiri kwae; mani bakobola nibaboola bati, baboneheerwe bamalaika, abababooleere bati, mulamu.

²⁴ Abasyeefwe baandi bosi bachiire hu siriindwa, babukaana nisiri sa koti lu bahasi babeere nibaboolere; nae omweene haba sibamubweneho.”

²⁵ Nae Yesu yababoolera ati, “Bae eng'we, nga muli abasiru, haandi emyooyo ky'eng'we nga chihiinda ohufukiirira ebyo byoosi bi banabbi baboola!

²⁶ Mubaasa muti sisyali nisihoyeerwa Kristo ohusaanda atyo mberi hu yemewo yengire mu luyaali lwae?”

²⁷ Mani Yesu yachaaka ohubatotolera ebiindu byoosi ebimudiiraho ebiri mu byandiiko byoolerefu, ohutulira elalira hu Musa alala neende banabbi boosi.

²⁸ Mani nibali aambi ohwoola mu lukoongo lu bali bachiamo. Yesu yaboneha koti oli ohuchiiririra mu moni,

²⁹ bamwekweeda nibaboola bati, “Doong'a naafwe, olwohuba mbano bwiira haandi oludaalo mbano luweere.” Yesu yadoong'a nabo.

³⁰ Nae niyali hu meesa nabo, yabukula omugaati, mani yakuberesa ehabi, mani yaakumekula, mani yakubaberesa.

³¹ Mani emoni chaabwe chaamuha, bamumanyirisa; abweene-na-bweene ao yabahamyuhaho.

³² Mani nibaboolanira abeene-na-beene bati, “Emyooyo kyeefwe sikinyahaneenge mweefwe sa naalomaloma naafwe hu ngira, koti lwatutotoleere ebyandiiko byoolerefu?”

³³ Basiingiraniramo ebiha byeene ebyo, bakobola Yerusalemu; banyoola ehumi-na-mulala nibebuusire alala neende abo ba bali nabo,

³⁴ ababoolera bati, “Bwadyeeri, Omwaami asyuuhire, haandi aboneheere Simooni!”

³⁵ Bosi bababoolera ebyaholehana hu ngira, haandi koti lu bamumanyira mu humekula omugaati.

Yesu abonehera abeeki bae

³⁶ Nae nibali basiilomalomaanga bino, Yesu mweene yeecha yeema akatikaati waabwe.

³⁷ Nabo beesiinduha batya muno nibabaasa bati babweene esihyeeno.

³⁸ Yesu yababoolera ati, “Lwasiina mwesiinduha haandi nimukanakana mu myooyo kyeeng'we?

³⁹ Bone amahono kaange neende amakulu kaange, mumanye muti niise omweene; mundiireho mani mubone; olwohuba esihyeeno haba sisiri neende enyama neende amakuumba koti lumubona ni ndi nabyo.”

⁴¹ Nae nibali nibasisiiri ohufukiirira hulw'esangaalo, neende ohuwuka-wukana, yababoolera ati, “Muliho neende esiindu syoosi esyohulya?”

⁴² Bamuberesa omunyonyo kw'eng'eeni ndeehe,

⁴³ mani yaakubukula yaakulya nibabona.

⁴⁴ Yesu yababoolera ati, “Chino nicho emboosi chindababooleraanga nindali nisisiiri naang'we, endi buli siindu syoosi syanyandiikwaho mu malako ka Musa neende mu byandiiko by'abanabbi, alala neende mu Sabbuli ebyali ebyohwoolerera abweene.”

⁴⁵ Yesu yekula ebibaaso byaabwe, bamanye ebyandiiko byoolerefu,

⁴⁶ mani yababoolera ati, “Sino nisyo esyandiikwa siti, Kristo ahoyere ohusaanda mani hu ludaalo lwohudatu, asyuuhe mu bafu,

⁴⁷ haandi siti, ohweyolobya neende ohuleherwa hw'ebyonoono, huhoyeerwe ohuyaalwaanga mu liita lyae mu byaalo byoosi, ohuchaakira mu Yerusalemu.

⁴⁸ Niing'we abaloli b'ebiindu bino.

⁴⁹ Haandi bone, njia ohubatumira si Laata yalaka; nae mudoong'e mu siko ohwoola lu maani katula aakulu kalibehaho.”

Yesu ayirwa Muukulu

⁵⁰ Yesu yabatusa erwaanyi w'esiko yabeemirira ohwoola Bbetani, yasiingisa aakulu amahono kae yababeresa ehabi.

⁵¹ Nae niyali n'ababeresa ehabi, yabatulaho, mani yaakiingwa yayirwa Muukulu.

⁵² Mani baakobola Yerusalemu neende esangaalo liingi muno.

⁵³ bachiiririra ohuba mu Nyuumba ya Nasaae nibafumia Nasaae.