Luka 22 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohukiiywa hwa Yesu

¹ Bulaanu, esidyaalo sy'Emigaati Ekitabbaahirwe esilaangwa Paasaka, syali siri aambi ohwoola.

² Mani abalaamisi bahuluundu neende abaandiiki b'Amalako bali nibakoonyeresa engeri yi banyala ohumwiitiramo; olwohuba bali nibatya abaandu baandi ohubabona.

Yuda afukiirira ohuhoba Yesu

³ Bulaanu Sitaani yaniina Yuda olaangwa Yisikarioti, owali mulala hu beeki ehumi-na-babiri;

⁴ yatula ao yaachia ohuchwichwiisania neende abalaamisi bahuluundu alala neende abahuluundu baandi engeri yaanyala yaamutumbuliramo yi bali.

⁵ Basangaala muno, bomiisa ohumubaaho eseende.

⁶ Mani sakira yesi yafukiirira, mani yakonyeresa ehabi yinyala yamukwiira yamutuumbuliramo yi bali abuundu ataali omuhunu kw'abaandu.

Yesu yetekehera ohulya Emideeho cha Paasaka

⁷ Oludaalo lw'ohuliiramo esidyaalo sy'Emigaati Ekitabbaahirwe, lubeteraangaho ekoondi yeere lweemao lwoola.

⁸ Mani sakira Yesu Petero neende Yowaana n'aboola ati, “Muchie mututekehere Paasaka, fwesi huyilye.”

⁹ Nabo bamuboolera bati, “Ni yeena bweene yonadahe huchie huyitekehere?”

¹⁰ Nae yababoolera ati, “Boneho, nimunaba nimumalire ohwiingira mu siko sihuluundu, omusaacha onaba n'akiingire esyoongo y'amaachi achia ohubakaanira; mani mumuloondaanga mwiingira nae mu nyuumba yaba achia ohwiingiramo,

¹¹ mani muboolere omuliindi w'enyuumba eyo muti, ‘Omweekesa ali ohuhuboolera ati, Enyuumba y'abakeni yiri yeena, yi njia ohuliiramo Paasaka alala neende abeeki baange?’

¹² Mani aba achia ohubeekesa esiseenge sitaabafu esiri aakulu esimalire ohuteebwamo ebiindu bidahibwa; ni eyo niyo yiimuba muchia ohutekeha.”

¹³ Mani beemao bachia basibukaana koti sa luyali ababoolere; bamala batekeha Paasaka.

Esy'engoloobe sy'Omwaami

¹⁴ Mani ebiha nibyoola, Yesu neende abeeki bae abo bachaaka ohulya.

¹⁵ Yesu yababoolera ati, “Ndekoombere elalira ohulya Paasaka yino naang'we nitoola ohusaandisibwa;

¹⁶ olwohuba mbaboolera endi haba siinjia huyilyaaho ohwoola lu yilyoosereswa abweene mu bwaami bwa Nasaae.”

¹⁷ Yesu yabukula esikoombe, mani n'amalire ohweebasa Nasaae, yaboola ati, “Mubukule sino, mani musikabaneho abeene-na-beene;

¹⁸ olwohuba mbaboolera endi, ohutula bulaanu buti, ohuchia mu moni, siinjia hung'waaho hu syaamo sy'omusabbiibbu ohwoola lu bwaami bwa Nasaae bulichiira.”

¹⁹ Haandi yabukula omugaati, mani niyamala ohweebasa Nasaae, yakudonyala-donyalamo, yaababeresa n'aboola ati, “Kuno nikwo omubiri kwaange okwakabulwa hulw'eng'we. Muholeenge sino ohunjuchulisa.”

²⁰ Haandi nasilala yahola atyo esikoombe luunyuma lw'ohumala ohulya esy'engoloobe n'aboola ati, “Esikoombe sino sa sibeeresebwa hulw'eng'we, nisyo endagaano njaaha eya ab'amabaanga kaange.

²¹ Nae muboneho, omuhono kw'oyo owundyaamo olukwe kuli ohulya naange hu meesa.

²² Olwohuba Omwaana w'Omuundu wuno achia ohuwaao sa koti lu syaheengwawo; nae chakaanire omuundu oyo ochia ohwehoonyerwa mu humulyaamo olukwe!”

²³ Mani bachaaka ohuteebana abeene-na-beene wiina mweene hu beene abo onanyale ohuhola sino.

Amayiingani kadiira hu buhunuufu

²⁴ Amayiingani kosi kabatuumbuhamo, akaboola mbwe wiina mweene hu beene abo ochia ohuyiribwa koti omuhunuufu obahiramo boosi.

²⁵ Nae Yesu yababoolera ati, “Abatuki b'abaandu Bateende babeekeseraangaho obwaami; haandi abo ababa nibaliho aakulu mu bunyala nibo abalaangwa bati, ‘abaliindi b'abaandu’.

²⁶ Nae haba sibiri bityo mwesi yi muli; nae mukanye oyo omuhunuufu oli mweeng'we yehole abe koti omuyere mweene, haandi omwimirisi nae abe koti oyo odidiihanira abaasye.

²⁷ Olwohuba wiina mweene omuhunuufu ohiramo, oyo owihaale ohulya, kose oyo omuhalaabanira? Sisiri mbwe niye oyo owihaale hu meesa ohulya? Nae ese ndi mweeng'we koti oyo oli ohubahalaabaniranga.

²⁸ “Eng'we ning'we abachiririire ohuba naange ni ndi mu mateemo kaange;

²⁹ mani ndi ohubaba omulimo ohuhola koti Laata yamberesa obwaami,

³⁰ endi muchia ohuliira neende ohung'wera hu meesa yaange mu bwaami bwaange, haandi muchia ohwiihala hu bisaala by'obutuki nimukayaanga enono ehumi-na-chibiri echa Yisiraeli.

Yesu atuumbula ohwekaana hwa Petero

³¹ “Simooni, ewe Simooni! Bonaho, Sitaani yekombere ohubabukula koti engaano,

³² nae ese malire ohubekongooyera endi efukiirira yeng'we yitahaywa; nimuba nimumalire ohwomiira haandi, muhoyere ohugumya abasyeeng'we.”

³³ Nae Simooni yaboolera Yesu ati, “Omwaami, ese ndi omwetekefu ohuchia naawe mu jeela kata neende mu hufwa.”

³⁴ Yesu nae Yaboola ati, “Ese huboolera ewe Petero endi, edaaywa haba siyichia ohuholyooha enyaanga yino, ohwoola lu ewe ochia ohuba n'omalire ohwekaana amahabi kadatu oti haba siwumanyireho.”

Omufuuko, esanduuku neende olugaanga

³⁵ Haandi Yesu yababoolera ati, “Mani ludaalo lu ndabatumira muchie nimutaaliho neende omufuuko, kata esanduuku, kata ebiraato, mwachia mwahaya ohubaaho neende esiindu syoosi?” Baboola bati, “Poo!”

³⁶ Yababoolera ati, “Nae bulaanu buti, leha oyo oli neende omufuuko akubukule, haandi katyo sa neende esanduuku lyosi. Haandi leha oyo otaali neende olugaanga akuse engubo yae alukule.

³⁷ Olwohuba ndi ohubaboolera endi, esyandiiko syoolerefu sino sichia ohunjosereswaho, siti ‘Yabalirwa mu badoondobanu;’ olwohuba esyo syoosi esyanyandiikwaho siri neende ohwosereswa hwaasyo.”

³⁸ Haandi baboola bati, “Omwaami, lolaho, ngandi engaanga chibiri njino chiri ano.” Haandi Yesu yababoolera ati, “Ebyo bimala.”

Yesu asabira hu sigulu sy'emiseituuni

³⁹ Yesu yatula erwaanyi, mani koti lu yali niyanala ohuhola, yacha hu sigulu sy'Emiseituuni; mani abeeki bae nibamuloondaho ebweene eyo.

⁴⁰ Nae niyoola abuundu ao, yababoolera ati, “musaba muhaye ohukwa mu huteemwa.”

⁴¹ Haandi yabatulaho yaasudaho eyale yiwahasukuna ekina lyoola, mani yaasigama aasi yalaama ati,

⁴² “Laata, nikali mbwe ni ohweenya hwao, nduseho esikoombe sino; kata katyo, bitaba mbwe muhudaha hwaange, nae ohwao nihwo ohuba huholerweho.”

⁴³ Abweene ao malaika yamubonehera ohutula Muukulu n'amugumya.

⁴⁴ Haandi niyali nasiiri mubuchuuni atyo, yasaba neende esinani sihirahoo, mani oluuyia lwae lwaba koti amabaanga katoonya aasi hu loba.

⁴⁵ Mani niyasiingira yaatula mu husaba, eyiri abeeki mani yabanyoola nibali ohukona hulw'obwelalihirifu,

⁴⁶ yababoolera ati, “Lwasiina mukona? Musiingire musabe munyala ohukwa mu huteemwa.”

Ohudiirwa hwa Yesu

⁴⁷ Yesu niyali n'asilomalomaanga, esidiiyiha sy'abaandu syoola, mani omusaacha olaangwa Yuda, owali mulala hu ehumi-na-babiri, niye owali abemiriire. Yeecha yaasuda muno eyiri Yesu ati amukwe mu sirifu;

⁴⁸ nae Yesu yamuboolera ati, “Ewe Yuda, onyala otye ohuchia ohuhoba mu Omwaana w'Omuundu mu humukwa mu sirifu?”

⁴⁹ Mani abo boosi abali nibali aambi neende Yesu nibabona esyali sichia ohuloondaho, baboola bati, “Omwaami, hwehoonyere olugaanga kose?”

⁵⁰ Mani mulala hu beene abo yaatema omuhalaabani muwaambe w'omulaamisi muhuluundu mani yaamumalaho ohutwi hw'omuhono muluungi.

⁵¹ Nae Yesu yaboola ati, “Bino biweere ao!” Mani yadiira hu hutwi ohwo, yamuwonia.

⁵² Bulaanu Yesu yaboolera abalaamisi bahuluundu neende abaandu bahunuufu b'Enyuumba ya Nasaae neende abahuluundu, abali nibamwichiire ati, “Mwiichire koti abeechera omunyaka, nimuli neende engaanga neende ebiruga?

⁵³ Nindabereenge sa naang'we buli ludaalo mu Nyuumba ya Nasaae, nimutanyalaanga ohungwaaho kata. Nae olwohuba sino nisyo esiha syeeng'we, neende obunyala bw'esiirima.”

Petero yekaana Yesu

⁵⁴ Mani bamukwaaho, nibamutusa ao, nibamuleeta mu nyuumba y'Omulaamisi Muhuluundu mweene. Petero nae yaloondangaho naali eyale hooho;

⁵⁵ nibali nibahaadusa omuliro akatikaati w'olwaanyi nibahehala alala, Petero yesi yeecha yabehalamo.

⁵⁶ Nae omuhaana omuhalaabani niyamubona niyehaale mu bulafu yamuhang'aasaho emoni n'aboola ati, “Omusaacha wuno yesi abeere neende omuundu oyo.”

⁵⁷ Nae yaasikaana muno n'aboola ati, “Omuhaaye, ese haba simumanyire daawe.”

⁵⁸ Haandi ebiha bidiidi nibyabitao, omuundu wuundi yeecha yamubona yaboola ati, “Ewe wesi oli mulala hu beene abo.” Nae Petero yaboola ati, “Omuhongo, ese siindiho nabo daawe.”

⁵⁹ Luunyuma lw'esiha syoola esaa ndala, haandi omuundu wuundi yomiisa n'aboola ati, “Ataali ohukana-kana, omusaacha wuno yesi abeere nae; olwohuba yesi Mugalilaaya niye.”

⁶⁰ Nae Petero yaboola ati, “Omuhongo, ese haba siimanyire ebyo byooli ohulomalomaanga.” Ni abweene ao, niyali mbwe hwasilomalomaanga, edaaywa yaholyooha.

⁶¹ Omwaami yakaluuhana yalingaala Petero. Mani Petero yechulisa emboosi y'Omwaami yira, koti luyali n'amuboolere ati, “Edaaywa niyitaholyooha enyaanga yino, onandekaana amahabi kadatu.”

⁶² Petero mani n'atula erwaanyi yaalira muno.

Ohudyabuhirwa neende ohutoochwa hwa Yesu

⁶³ Nae bulaanu abasaacha bali nibadiirire Yesu bachaaka ohumudyaabuhira neende ohumutoocha;

⁶⁴ haandi bachaaka ohumufuunihaanga emoni, nibamuteeba bati, “Tuumbulaho! Wiina mweene ohuhuyire?”

⁶⁵ Haandi nibachiiririra ohulomalomaho emboosi nyiingi cheene nibamunyeka.

Yesu aleetwa mu siina

⁶⁶ Nibwahya, oluhung'aano lw'abahuluundu b'abaandu bebuusa alala, neende abalaamisi bahuluundu alala neende abaandiiki b'Amalako boosi; mani bamutusa ao bamuyira enaluhiiho lwaabwe, mani nibeteeba abeene-ne-beene nibaboola bati,

⁶⁷ “Nikali mbwe niiwe Kristo, tuboolere.” Nae yababoolera ati, “Ese nimbaboolera, haba simuchia ohufukiirira;

⁶⁸ haandi naange nimbateeba, haba simuchia hunyala ohungobolamo.

⁶⁹ Nae kali mbwe ohuchaakira esiha sino ohwemeeda mu moni, Omwaana w'Omuundu wuno achia ohuba niyehaale hu muhono muluungi okw'obunyala bwa Nasaae.”

⁷⁰ Haandi boosi baboola bati, “Niiwe Omwaana wa Nasaae?” Nae yababoolera ati, “Muli ohuboola muti niise oyo.”

⁷¹ Nabo baboola bati, “Baliwo abaloli baandi bahusiidaha? Humalire ohwewuliirira abeene ohutula mu munwa kwae kweene.”