Luka 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohwiibulwa hwa Yesu

¹ Mu ndaalo echo, Kaisaari Agusito yatusa elako ati abaandu boosi mu bwaami bwae bahoyere ohubalibwa.

² Huno nihwo ohwali ohubalibwa hutaangira Kwirino naali gafana wa Siria.

³ Mani buli muundu yeesi yacha ohubalibwa, mu siko syae.

⁴ Mani Yosefu yesi yatula mu Galilaaya, mu siko sya Nasareeti, yacha Yudea, mu siko sya Daudi, esilaangwa siti Bbetilehemu, olwohuba yali ow'enyuumba haandi ow'olwiibulo lwa Daudi,

⁵ ohuchia ohubalibwa neende Maria, yi yali afukiirisaanie nae ohudeehisania. Maria oyo yali ali asito.

⁶ Nae nibali eyo, ebiha byae by'ohweetusaho byoola.

⁷ Mani yeebula omwaana wae musyaani omwikula-nda, yamubwiha mu bikubo, mani yamwalisa mu bwaato bu byaayo birirangamo obunyaasi, koti lubatanyoola obweyaango mu nyuumba ch'abakeni.

Abaayi neende Bamalaika

⁸ Nae mu syaalo esyo, mwalimo abaayi nibali mu lwaayiro, nibaliindire ebyaayo byaabwe esiro.

⁹ Malaika w'Omwaami yababonehera, mani oluyaali lw'Omwaami lweechula lwaaduha nilubebodohaanie, beecha besiinduha muno.

¹⁰ Nae malaika yababoolera ati, “Mutaba neende ohutya; olwohuba bone, mbaleetera emboosi ndai ch'esangaalo liingi, elicha ohuba hu baandu boosi;

¹¹ olwohuba enyaanga yino, mu siko sya Daudi, Omuwonia abebuliirwe, niye Kristo Omwaami.

¹² Mani hano niho ahanaba ahalolero heeng'we; muchia ohwakaana omwaana mudoto yibabwihire mu bikubo, haandi nibamwaliise mu bwaato bu byaayo biriraangamo.”

¹³ Nae bwaangu-bwaangu, malaika oyo alala neende bamalaika baandi baangi abo Muukulu baboneha nibafumia Nasaae nibaboola bati,

¹⁴ “Oluyaali lube eyiri Nasaae aakulu Muukulu, nae omuleembe kube hu syaalo mu baandu abahola ebiindu bisangaasa Nasaae!”

¹⁵ Nae Bamalaika nibatulao bawaao bachia Muukulu, abaayi beecha baboolanira abeene-na-beene bati, “Mulehe huchie Bbetilehemu, hubone esiindu sino esiholehaane, si Omwaami atwekeese.”

¹⁶ Mani badiindikirira ohuchia, bakaana Maria neende Yosefu, alala neende omwaana mudoto oyo, nibamwaliise mu bwaato bu byaayo biriiraangamo.

¹⁷ Mani nibabona omwaana oyo, batuumbula ebyo ebyali bibabooleerwe ebidiira hu mwaana wuno;

¹⁸ Mani abo boosi ababiwulira, bawuka muno ebyo bi baayi bali nibababooleere.

¹⁹ Nae Maria yabiiha ebiindu bino byoosi, n'abibasaangaho muno mu mwooyo kwae.

²⁰ Mani abaayi bakobolayo ewaabwe, nibafumia haandi nibaberesa Nasaae oluyaali, hulweebyo byoosi bi bali nibawuliire haandi nibabweene, olwohuba byali sa koti lu byali nibibabooleerwe.

Yesu abereswa eliita

²¹ Nae luunyuma lw'endaalo chitaanu-na-chidatu, omwaana niyali amalire ohuhebwa, yabeereswa eliita Yesu, eliita li malaika yamuberesa n'atayerwa mu nda.

Yesu ayirwa mu Nyuumba ya Nasaae

²² Nae ebiha nibyoola eby'ohulabiswa babe aboolerefu, koti elako lya Musa lyali, Yosefu neende Maria baleeta Yesu Yerusalemu ohudiisa Omwaami

²³ (koti lu syandiikwa mu lako lya Omwaami siti, “Buli mwaana musyaani yeesi, owikula enda ya ng'ina achia ohulaangwaanga omwoolerefu w'Omwaami”)

²⁴ haandi bachia ohuyanaanga esiyaanwa esihoyerwa koti lu lako ly'Omwaami liboola liti, “amaguugu kabiri, oba amabburuuku madoto kabiri.”

²⁵ Bulaanu, mu Yerusalemu, mwalimo omusaacha olaangwa mbwe Simeoni, owali omuluungifu haandi owaheera Nasaae muno, owali n'aliindaanga ohulemeswa omwooyo hwa abaandu ba Yisiraeli, haandi nga Mwooyo Mwoolerefu amuliho.

²⁶ Haandi yali yamala ohwekeswa neende Mwooyo Mwoolerefu ati, haba saachia hufwa n'ataabona Kristo wa Nasaae.

²⁷ Mani niyali niyeemiriirwe neende Mwooyo, yeecha mu Nyuumba ya Nasaae; mani abeebusi ba Yesu nibali hubamwiingisa bati mu Nyuumba ya Nasaae, bamuholere koti lu lako liboola,

²⁸ Simeoni yakiinga Yesu mu mahono, mani yeebasa Nasaae n'aboola ati,

²⁹ “Omwaami, bulaanu onyala ohuleha omuhalaabani wao yawaawo mu muleembe, koti lu mboosi yao yiboola;

³⁰ olwohuba emoni chaange chimalire ohubonaho obuwonia bwao

³¹ bu ewe mweene watekehera mu moni w'abaandu boosi,

³² obulafu buhosera Abateende obuheeri bwao, haandi obw'oluyaali eyiri abaandu bao Yisiraeli.”

³³ Mani laatang'ene neende ng'ina bawuka muno ebiindu byali bimulomalomwaho;

³⁴ haandi Simeoni yabasabira ehabi mani yaboolera Maria ng'ina ati, “Bone, omwaana wuno ateerweo hulw'ohukwa neende ohusiingira hw'abaandu baangi mu Yisiraeli, haandi neende ohuba esilolero siyiinganisibwa

³⁵ (haandi olugaanga luchia ohuhufumita lubite mu mwooyo kwao kwosi), hu bibaaso by'emyooyo miingi binyale ohubonehana alafu.”

³⁶ Haandi yaliwo nabbi muhasi, Ana, omuhaana wa Fanueli, ow'enono y'Aseri; yali omukofu naali neende emyaaka miingi muno. Ohutula n'awaamo omubiri ati, yamenya neende wamwe wamutusamo omubiri oyo emyaaka kitaanu-na-kibiri kyoong'ene,

³⁷ mani yadoong'a koti omuhasi mufwiirwe olw'embaka y'emyaaka amahumi kataanu-na-kadatu-na-kine. Haba siyalehaho Enyuumba ya Nasaae, nae yabechaanga sa omwo nalaama, haandi nasiiba alala neende ohusaba esaala esiro neende esideete.

³⁸ Nae niyoolerao ebiha byeene ebyo, yebasa Nasaae, haandi yaboolera abo boosi abali baliindiriire ohuwonisibwa hwa Yerusalemu, ebidiira hu mwaana oyo.

Abeebusi ba Yesu bakobola Nasareeti

³⁹ Nae nibamala ohuhola ebyo byoosi, bi lako ly'Omwaami liboola, bakobolayo mu Galilaaya, mu siko syaabwe syeene sya Nasareeti.

⁴⁰ Mani omwaana oyo yahula, haandi yaba ow'amaani, niyeechula amakesi; haandi ehabi ya Nasaae yamuliho.

Yesu achia mu Nyuumba ya Nasaae n'asisiiri omuraaga

⁴¹ Bulaanu abeebusi bae bachichaanga Yerusalemu buli mwaaka hu Sidyaalo sya Paasaka.

⁴² Mani Yesu niyoosa emyaaka ehumi neende chibiri eky'obuhuluundu, bachia Yerusalemu hu sidyaalo, koti lu bali nibaholaanga;

⁴³ Nae esidyaalo nisyawa, nibali nibakobolayo engo, omuraaga wuno Yesu yadoong'a enyuma mu Yerusalemu. Nae sino, abeebusi bae haba sibasimanya,

⁴⁴ nae koti lu bali babaasa bati ali mu baasye babakeenda nabo, bakeenda oludaalo olulaamba nibatamubona, mani bachaaka ohumukoonya mu beeho baabwe neende mu baandu babamanyire;

⁴⁵ nae nibatamuduuhana, bakaluha Yerusalemu nibamukoonya.

⁴⁶ Endaalo chidatu nichabitao, bamuduuhana naali mu Nyuumba ya Nasaae, niyehaale mu beekesa, n'abatekeeresaanga haandi n'abateebaanga ebiteebo;

⁴⁷ mani abo boosi abawulira by'aboola, bawuka muno amakesi kae neende engaluhamo yae.

⁴⁸ Nae abeebusi bae nibamubona, bawuka muno; mani ng'ina yamuboolera ati, “mwaana waange, lwasina otuholere otyo? Bonaho, ese neende lataao koti lu huhukoonyere nihwaabaaba.”

⁴⁹ Nae yabakobolamo ati, “Bibeere bitye mwangoonya? Mubeere mukoterwe muti hoyeere ohuba mu nyuumba ya Laata?”

⁵⁰ Mani byabahaya ohumanya biyeemaho ohubaboolera ebyo.

⁵¹ Mani Yesu yasiingira yawaawo nabo bakobola Nasareeti, mani yaba omuwulisi yi bali; nae ng'ina yabiiha ebiindu bino byoosi mu mwooyo kwae.

⁵² Mani Yesu yemeeda ohuhula, haandi amakesi kae kemeeda, haandi yemeeda ohuheerwa neende abaandu alala neende Nasaae.