Luka 10 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yesu atuma abeeki amahumi kataanu-na-kabiri na babiri

¹ Oluunyuma lwa bino, Omwaami Yesu yadoola abeeki amahumi kataanu-na-kabiri na babiri baandi, mani yabatuma bamutaangiriremo ohuchia, babiri-babiri, mu buli siko neende abuundu, yi omweene yali naachia.

² Mani yababoolera ati, “Ekesa nalyo liingi muno, nae abahalaabani nibo abadiidi; mani mulaame eyiri Omwaami wa kesa atume abahalaabani mu kesa lyae.

³ Bulaanu, mani muchie; nae bone, mbao mbatuma, koti abaana b'amakoondi mu manani.

⁴ Mutakiinga ebbeeti ch'eseende, kata emifuuko kw'ohusumiramo, kata ebiraato; haandi, mutaheesa omuundu yeesi hu ngira.

⁵ Nabuli nyuumba yoosi yimwiingiramo, mutaangireenge ohuboola muti, ‘Omuleembe kube hu nyuumba yino!’

⁶ Mani, omuundu yeesi ow'omuleembe naaba mu nyuumba eyo, omuleembe kweeng'we kuchia ohumubaaho; nae nibitaali bityo, omuleembe kuchia ohubakaluhira.

⁷ Mani mudoong'eenge mu nyuumba yene eyo, nimulya haandi nimung'wa buli siindu syoosi sibabakabula, olwohuba buli muhalaabani ahoyera omuheemba kwae; nae mutatulaanga mu nyuumba eyo nimuchia mu yiindi.

⁸ Nimwiingiraanga mu siko syoosi, mani bababukaanira, mulicheenge esyo syoosi si baba nibabakabuule;

⁹ muwonie abalwaae baba nibalimo, mani mubaboolere muti, ‘Obwaami bwa Nasaae bwiichire aambi naang'we.’

¹⁰ Nae buli lumwiingira mu siko syoosi, mani bahaya ohubabukaanira, muchicheenge mu makira kaamwo, mani muboola muti,

¹¹ ‘Kata olufu lw'esiko syeng'we, olwediirire hu makulu keefwe, huli ohubateng'ulira lubaloonde; nae kata katyo, mumanye sino, muti Obwaami bwa Nasaae bwiichire aambi.’

¹² Mbaboolera endi, hu ludaalo olwo, Sodomu syahakwiirwe esisa ohuhiraho esiko esyo.

Ebiko bitafukiirira

¹³ “Chihwakaanire ewe, Korasiini, chihwakaanire ewe, Bbetasaida! Olwohuba eby'amayia byaholwa mweeng'we biba byaholwa mu Tiire neende Sidoni, abaandu bamwo baba nibeeyolobya hale, nibefwaala ebigunia, haandi nibeehala mu kohe.

¹⁴ Nae hu ludaalo lw'ohuheengeraho omusaango Tiire neende Sidoni byahakwiirwe esisa, ohuhiraho eng'we.

¹⁵ Nae ewe Kaperanaumu, odaha ohweniinia ohwoola Muukulu? Mani bachia ohwiiswa aasi ohwoola mu syaalo sy'abafu.

¹⁶ “Oyo obawulira, aba awuliire ese, haandi oyo obahaya, aba ahayire ese, haandi oyo owuhaya aba ahayire oyo owaanduma.”

Amakaluha k'abeeki amahumi kataanu-na-kabiri na babiri

¹⁷ Amahumi kataanu-na-kabiri abo bakobola nibasangaalire muno, nibaboola bati, “Omwaami, kata emisaambwa chosi chituwulireenge, nihwehoonyera eliita lyao!”

¹⁸ Nae Yesu yababoolera ati, “Mbweene Sitaani niyaakuha n'atula Muukulu naakwa aasi koti olumesu.

¹⁹ Nae bone, mbabeerese obunyala bw'ohuseenakira endemo neende eby'obusiba byoosi, haandi neende obunyala bumalao amaani k'omusuku koosi; mani sibulao esiindu sichia ohubanyaala.

²⁰ Nae kata katyo, mutasangaala olwohuba ebihyeeno bibaulira; nae musangaale olwohuba ameeta keeng'we kandiikwa Muukulu.”

Yesu yehoya

²¹ Mani esiha syeene esyo, Yesu yehoyera mu Mwooyo Mwoolerefu mani yaboola ati, “Hweebasa muno Laata, Omwaami w'Ekulu neende esyaalo, olwohuba wakisa ebiindu bino abakesi neende abasoma muno, nae wabibwihulira abaana badoto; Eee, Laata, olwohuba huno hwali ohudaha hwao hw'esisa.

²² Laata yamala ohuumberesa ebiindu byoosi; mani abulao omuundu yeesi omanyire Omwaana ohutusaho Simwaana, haandi omanyire Simwaana, ohutusaho Omwaana neende oyo yeesi yi mwaana aheengao ohubwiihulira.”

²³ Nae Yesu yakaluuhanira abeeki bae nibali boong'ene mani yababoolera ati, “Chiri neende ehabi emoni chaabo echibona bi muli ohubona!

²⁴ Olwohuba mbaboolera endi, banabbi baandi neende abatuki baangi beekoomba ohubona simubona, nae bahaya ohusibona, haandi neende ohuwulira simuwulira, nae bahaya ohusiwulira.”

Olukaado lw'Omusamaria mulai

²⁵ Nae bone, omweekesa w'amalako wuundi, yaasiingira yeema n'adaha ohuhema Yesu n'aboola ati, “Omweekesa, siina syeene siimba hole, hu nyale ohunyoola obulamu butaakama?”

²⁶ Nae Yesu yamuboolera ati, “Ni siina syeene esyandiikwa mu malako? Okasoma otye?”

²⁷ Nae yakobolamo ati, “Heraanga Nasaae Omwaami wao neende omwooyo kwao kwoosi, neende obulamu bwao bwoosi, neende amaani kao koosi, neende amakesi kao koosi; haandi heeraanga owaasyo, koti lu weheera omweene.”

²⁸ Nae Yesu yamuboolera ati, “Okoboolemo bulai; mani hola otyo, mani ochia ohubaao omulamu.”

²⁹ Nae omweekesa w'amalako oyo, koti luyali akiiya ohweekesa ati mulai, yeecha yaboolera Yesu ati, “Nae owasyaange niye naanu?”

³⁰ Yesu yakobolamo ati, “Olwoola, omusaacha wuundi yali n'akeenda niyeehirira ohutula Yerusalemu, naachia Yeriko, mani yaakwa mu banyaka, baamufwaalulaho engubo, baamuhuya bubi muno, mani bawaao, bamuleha naali eyuhayuha.

³¹ Nae bulaanu olw'ehabi, yaliwo omulaamisi wuundi yali n'abitira hu ngira yene eyo; nae niyamubona, yahededya yabitira endulo yeweerawo.

³² Haandi nasilala, Omuleefi wuundi yesi niyeecha yoola abuundu ao yamubona, mani yahededya yabitira endulo.

³³ Nae Omusamaria wuundi, niyali naali hu lukeendo, yoola abuundu yi musaacha oyo yali; nae niyamubona, yamukwiira esisa,

³⁴ mani yacha yali, yamuboya ebinyubuluuhe, yabichuhaho, amafuta neende efiini; mani yaamubukula yamuta hu punda yae yene, mani yaamuyira mu nyuumba y'abakeni, yamala yaamulinda bulai bweene.

³⁵ Haandi nibwahya echuli, yeecha yabukula edinaari chibiri mani yachiberesa omuliindi w'enyuumba y'abakeni eyo, n'aboola ati, ‘Liinda omuundu wuno bulai; haandi nisibaao esiindu syoosi syomeedaho ohumuhoonya, ningaluha njia ohuhutuunga.’

³⁶ Naanu mweene hu baandu badatu bano, y'obaasa oti, yekesa eyiri omusaacha wakwa mu banyaka ati niye owaasye?”

³⁷ Nae yaboola ati, “Oyo owamukwiira esisa.” Mani Yesu yamuboolera ati, “Cha mani wesi ohole otyo.”

Yesu akeniya Marita neende Maria

³⁸ Nae Yesu neende abeeki bae, nibali bachiiririra neende olukeendo lwaabwe olwo, Yesu yoola mu lukoongo luundi; mani omuhasi wuundi olaangwa Marita yeecha yamwaakaanira, yeengira mu nyuumba yae.

³⁹ Nae yali neende mwaanang'ina olaangwa Maria, oweecha yehala mu makulu w'Omwaami, mani yaatekeeresa enjekesa yae.

⁴⁰ Nae Marita owali asidoyeerwe muno neende emirimo ch'obudeehi; yeecha yacha eyiri Yesu mani yaboola ati, “Omwaami, sodeebaho oti, mwaanaama yandehere ohukabula syeng'ene? Mani muboolere yeeche yahoonyeho.”

⁴¹ Nae Omwaami yamukobolamo ati, “Marita, ewe Marita, welalihiriire haandi wachuunirwa ebiindu biingi muno;

⁴² nae esiindu silala syoong'ene nisyo esihoyerwa. Maria aloboole omukabo mulai, okutachia ohumutusibwaho.”