Hosea 7 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ “Buli lundahaanga ohuwonia Yisiraeli abaandu baange, haandi neende ohubahola abayiinda, biimbonanga byoong'ene ni obubi bwaabwe, neende ebyonoono bi bahola. Babachana abeene-na-beene; bahalaka nibeengira mu mayuumba mani nibeebana; banyaka abaandu hu makira.

² Haba sisiingiraangaho mu mitwe kyaabwe mbwe ese nyala ndaachia ndeechulisa ebyonoono bino byoosi daawe; nae ebyonoono byaabwe byabebodoohania sa, mani ese haba siinyala ndeekaya ohubibonaanga daawe.”

Ohuhobana ohuli mu dooho

³ Omwaami aboola ati, “Abaandu babachaanga omutuki neende abakali bae neende endekeha chaabwe embi.

⁴ Abo boosi balyaanga haandi bahayuha. Obusyuuli bwaabwe bwemuheenyaanga kaala koti omuliro kw'omumayika, okutaasakuulwe neende omudeehi, ohwoola lu kudeeha emigaati kyaaya.

⁵ Hu ludaalo lw'omutuki ohuliiraho esidyaalo, bachia baahola omutuki oyo alala neende abakali bae bameera haandi baasiruwaswa neende amalwa.

⁶ Eee, baaduhaanga koti amaika mu huteka hwaabwe. Esiro syoosi etima lyaabwe limwenyuuhaanga sa, mani nibuhya echuli liicha lyaatubuha lyaaba koti enjeserye ch'omuliro.

⁷ “Mu bumemu bw'etima lyaabwe, beecha beetaanga abeemirisi baabwe. Abatuki baabwe baniegwa sya mulala-mulala, nae abulao oyo yeesi owusabangaho ati mbahoonye daawe.”

Yisiraeli neende ebyaalo biindi

⁸ Mani Omwaami aboola ati, “Abaandu ba Yisiraeli bali koti omugaati kutayiire. Beesika sa ebyaalo bibebodohaanie

⁹ nae haba sibamanyaho bati, ohweesika abakeni huno nihwo ohwabanyakamo amaani kaabwe. Mani endaalo chaabwe mbale nichio, nae abeene haba si basimanyireho daawe.

¹⁰ Ohudyaabuha hw'abaandu ba Yisiraeli ohweene hubalira-bulira. Kata neende ebyo byoosi ebyamala ohuholehana, basisiiri ohukaluuhana yi ndi daawe, ese Omwaami Nasaae waabwe.

¹¹ Yisiraeli syebodoohanianga sa abuundu alala koti ebburuuku; esitaangira syeene siri mbwe abaandu basyo balangaanga Misiri mbwe yiiche yibahoonye, nihaandi beeruhira eyiri Asiria!

¹² Nae ese njia ohubaambula olweero lwaange, mani nyale ohubaambia koti amayoni nibasyebodoohanianga aambi ano. Ese njia ohubasaandya hulw'ebibi bi bahola hale.

¹³ “Abo chibaakaanire! Bamala ohumbwaaho, haandi banjeemera hale. Mani bachia ohusihiriswa. Ese mbeere niindahire endi mbawonie, nae ohuunyinamira hwaabwe hwali ohwoobubacha buhaya.

¹⁴ Basisiiri ohunyala ohulaama ese mubwadyeeri bweene, nae beehubbaanga aasi eminyiha nibachereenjesa koti sa lu bakafiiri baholaanga. Nibaba nibasabira emere neende amalwa, besaandya abeene koti abakafiiri. Bano bajeemu ba ngeri siina yino!

¹⁵ Kata neende nikali mbwe ni neese owabahusa mani ndaabadinya baaba neende amaani kakiire ao katyo, beecha bachaaka ohundeehoba.

¹⁶ Balumirira sa ohukaluuhanaanga nibaandulaho, mani nibamala nibachia eyiri nasaae otaalimo kata neende amaani koosi daawe. Bali abateesikiha koti oluyiingo lweekodakoda. Olwohuba abeemirisi baabwe balomaloma nibadyaabuha, mani bachia ohufwa efwa enjalaba, mani Abamisiri banyale ohucheheerera.”