Hosea 4 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohwekanyiirisa hw'Omwaami eyiri Yisiraeli

¹ Omwaami ali neende ohwekanyiirisa hwaadaha ohuyira eyiri abaandu bamenya mu syaalo muno. Tekeerese, ewe Yisiraeli, hu siindu siinjia ohuboola sino: “Yibuulayo obweesikwa bwoosi, oba obuheeri bwoosi mu syaalo muno, haandi abaandu haba sibaamanyire koti ese luundi Nasaae waabwe daawe.

² Bahola ebisuubise haandi nibabihalaka; babacha, beeta, beeba, haandi bairana. Obusuku bwemeeda, mani ohwiitana huli ano neende aala.

³ Mani sakira esyaalo esyo sichia ohwoomerera, mani buli siindu syasimenyaho sifwe. Ebisolo byoosi, neende amayoni koosi, kata neende eng'eeni, byoosi bichia ohufwa.”

Omwaami yekanyiirisa abalaamisi

⁴ Omwaami aboola ati, “Leha abuleo omuundu yeesi owekanyiirisa abaandu oba obayiingania daawe ohwekanyiirisa hwaange huli sa hu eng'we abalaamisi.

⁵ Esiro neende esideete mulumiriire ohwegumulaanga sa nimuchianakana, haandi kata abanabbi bosi abula esilai sibahola ohuhiraho eng'we daawe. Ese njia ohusihirisa Yisiraeli, ng'ineeng'we oyo.

⁶ Abaandu baange bafwiire baweere olw'ohuhaya ohuumanya. Abalaamisi eng'we, mwesi mwahaya ohuumanya daawe, nae mwalehana neende enjekesa yaange, mani syeesi ndehana naang'we, haandi syeesi siinjia hufukiirira abasyaani beeng'we babe abalaamisi baange daawe.

⁷ “Obuungi bw'abalaamisi eng'we koti abwaaka, niwo yi mweesi mwaaka ohwonoona mu moni waange, mani sakira ese njia ohukaluuhania oluyaali lweeng'we lube esoni.

⁸ Muyiindiyalira mu bibi by'abaandu baange, mani sakira mwekoomba sa muti bemeedeenge sa batyo ohwonoona.

⁹ Mani eng'we muchia ohubonereswa neende esibonereso sy'abaandu beene abo! Ese njia ohubasaandya mani nyemeo mbahole mutuungire ebyonoono bi muli ohuholaanga.

¹⁰ Muchia ohulichaanga emikabo kyeeng'we ky'ebiyaanwa, nae kata katyo muchia ohudoong'aanga sa nimuli njala. Muchia ohwiinamiraanga sa banasaae b'olwiibulo, nae kata katyo, simuchia ohunyala ohubaaho neende omwaana kata mulala yeeng'ene daawe, olwohuba eng'we mwamala ohukaluuhana mwaandulaho mani mwaachia ohuloondaanga banasaae baandi sa.”

Omwaami yolobya ohwiinamira hweesikafiiri

¹¹ Omwaami aboola ati, “Efiini, ehale neende enjaaha sidubaanie, niyo eyiri ohumala amakesi mu baandu baange!

¹² Bali ohukoonyaanga ohubwiihulirwa ohutula hu situundu sa esy'olubbaao! Olusaala sa lweene, mbwe nilwo oluli ohubabooleraanga ebiindu bibabadaha ohumanya! Hane baandulireho. Koti sa lu muhasi weehola omudaamba, bachiire bewaayo abeene eyiri banasaae baandi sa.

¹³ Mu bituundu byoolerefu, aakulu w'engulu, niyo yi bahayaanire ebiyaanwa byaabwe, haandi hu bigulu nihwo hu bachia ohuniooheseraho obubbaani, aasi w'emisaala mileeyi ky'emituumba, olwohuba ebiiniha byakyo bisangaasa muno! “Esitulamo, abahaana beeng'we beene nibo abachia nibahalaabanirayo koti abadaamba, haandi bah'abasyaani beeng'we beene niyo yibahaholere obuyirani.

¹⁴ Nae kata katyo ese haba siinjia ohubaboneresera ebyeene bino daawe, olwohuba eng'we abeene niing'we abayiranaanga neende abadaamba bomu nyuumba ya banasaae abo, haandi alala neende abeene abo, niing'we abayanaangayo ebiyaanwa by'obukafwiiri ebyo. Sakira koti sa lu lukaado luundi luboola sa luti, ‘Abaandu babulamo amakesi bachia ohusihaanga.’

¹⁵ “Kata neende eng'we abaandu ba Yisiraeli muli abataali neende obweesikwa yi ndi, Yuda yihoya yaahaya ohukiinga omusaango kw'esiiholwa syeene esyo. Mutachichaanga ohwiinamiraanga Nasaae mu Giligaali, oba mu Bbetafeeni daawe, oba ohuholeraanga ebweene eyo ebisuubise mu liita ly'Omwaami mulamu daawe.

¹⁶ Abaandu ba Yisiraeli bano b'esimyeeni koti esuhiri njere. Ese ndahabaliisa endye omuboka kwakiire ao kutyo koti otukoondi tudoto?

¹⁷ Abaandu ba Yisiraeli bali sa koti abalokwa neende ebiloongaloongwe. Mani ewe leha sa abeene bechiire yi beedahira abeene.

¹⁸ Luunyuma lw'ohung'wa amalwa mabitiirifu, besangaasiraanga mu budaamba bwaabwe obwo, nibedooleraanga esoni ohuhiraho oluyaali.

¹⁹ Abo bachia ohudumuulwa baweeo neende omuyaka, mani bachia ohudiirwa esoni hulw'ebiyaanwa byaabwe by'obukafwiiri ebyo.