Hosea 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Mani ewe laangaho Abaisiraeli basyo oti, “Abaandu ba Nasaae” haandi oti “Abaheerwa neende Omwaami.”

Gomeri otaali omweesikwa neende Yisiraeli yitaali eyeesikwa

² Eng'we baana baange, mwekweede ng'ineeng'we oyo kata neende nataali omuhasi waange bulaanu buti, haandi kata ese mweene nitaali wamwe. Mumwekweede yaakamyeho obung'aabani neende obucheke.

³ Nae naatahola atyo, ese mweene njia ohumufwaalulamo engubo chae choosi mani mulehe abe syeekenye syeene koti lu yali niyaheebulwa. Ese njia ohumuhola abe koti eloba lyoomu lyasuuna, mani yoole ohufwa obuluwo.

⁴ Haandi siinjia hukwiira esisa kata neende abaana bae abo bosi, olwohuba abaana abo b'obudaamba nibo.

⁵ Olwohuba ng'inaabwe yali omuyirani; oyo owabeebula yali yeehola eby'esoni. Olwohuba yeecha yaboola mbwe ati, Ese njicha ohwechiira sa neende abadya baange, abambechaanga ebyohulya byaange neende amaachi kaange, obwooya bw'amakoondi bwaange haandi neende elaasi, amafuta haandi ebing'weebwa byaange.

⁶ Mani sakira ese njia ohumusitiraho olukaka lw'emisaala ky'amawa, haandi male nyombahe esida esinyala ohumwiikalira engira yae.

⁷ Achia ohuloondanaanga neende abadya bae nae haba saachia ohunyala ohubakaana daawe. Mani hu anyale ohwoola yaboola ati, “Ese njia ohwekobolerayo eyiri wamwaange wataangira yi ndali ni ndi bulai ohuhira koti lu ndi bulaanu.”

⁸ Haba saachia ohunyala ohwiichulisaho mbwe niise oyo owamubechaangaho emere, amalwa, amafuta k'enaasi, haandi neende efeesa yoosi neende esaabbu yoosi yi yehoonyeraanga mu hwiinamiraanga Bbaali.

⁹ Mani mu siha sya ekesa, ese njia ohwekobosera ebiyaanwa byaange by'emere neende amalwa, haandi njia ohubukula maleo obwooya bw'amakoondi neende elaasi bi ndali nindamuberesa bibecheenge engubo chae.

¹⁰ Ese njia ohumufwaalula adoong'e syeekenye syeene mu moni w'abadia bae abo mani abuleo oyo yeesi ochia ohunyala ohumuwonia ohutula mu bunyala bwaange daawe.

¹¹ Ese njia ohutaao enjakamo eyiri ebidyaalo byae byoosi ebyabuli mwaaka neende ebyabuli mwoosi, haandi neende emiholo kya Sabbaato neende emihung'aano kyae kyoosi ky'esinadiini.

¹² Ese njia ohusihirisa emisabbiibbu kyae kata neende emituli kyae kyosi, ki yabolaanga mbwe abasaacha bae nibo abamubechaanga ohumuhoonyaanga. Njia ohukaluuhania emisabbiibbu kyae neende emichuungwa kyae kibe esiparara; mani ebisolo biteende biiche bibisihirise.

¹³ Njia ohumusaandya hu lw'amahabi koosi ka yanjibiriraanga, n'anioohesaanga obubbaani eyiri Bbaali, haandi neende ohwefwalaanga ebbaangili ohuchia ohuloondaanga hu basaacha bae. Omwaami niye olomaloome.

Obuheeri bw'Omwaami eyiri abaandu bae

¹⁴ Mani ese njia ohumuyira mwiingise mu siparara haandi; ebweene eyo niyo yiimba njia ohumusererera neende emboosi ch'obuheeri mani nyale ohumweekobosaho.

¹⁵ Ese njia ohukobosera emikuunda ky'emisabbiibbu ki yali naali nakyo hale, mani nyale ohuhola Ehooho lya Bidinyu libe omulyaango kwiingisa esuubi. Mani ao aba achia ohuungobolamo koti lu yahola niyali n'asisiiri omuyere, niyali hwaatula mu Misiri.

¹⁶ Mani haandi ehabi lya habiri, anyale ohunangaanga wamwe haba saachia ohuba nasinangaanga Bbaali ati wamwe daawe.

¹⁷ Ese haba siinjia ohumukanya atuumbuleho eliita lya Bbaali haandi daawe.

¹⁸ Mu siha esyo syeene, nimwo muunjia ohuholeramo Endagaano neende ebisolo biteende byoosi, neende amayoni, hu bihaye ohunyaalaangaho abaandu baange. Ese haandi njia ohumalao ebilwaaniso by'ebiita byoosi bitule mu syaalo muno, engaanga choosi alala neende obuyiingo, mani ndehe abaandu baange boong'ene nibo ababa bamenyemo neende omuleembe neende obuliindi bulai.

¹⁹ Ewe Yisiraeli, ese njia ohuhuhola obe omuhasi waange mweene; Ese njia ohubechaanga owadyeeri haandi omweesikwa; Ese njia ohuhweekesaanga obuheeri butahendeera, haandi neende esisa mani huhole obe owaange endaalo choosi pe.

²⁰ Ese njia ohwooseresa ebisuubise byaange, haandi huhole obe owaange, mani ao niwo yi ewe oba ochia ohuumanyira koti Omwaami.

²¹ “Haandi hu ludaalo olwo, Omwaami aboola ati, ese njia ohukobolamo ekulu nae ekulu lichia ohukobolamo esyaalo;

²² nae esyaalo sichia ohukobolamo emere, amalwa, neende amafuta, nabyo biba bichia ohukobolamo Yesireeli;

²³ naange ese njia ohumwetaakira omweene mu syaalo omwo. Haandi ese njia ohukwiira esisa eyiri abo abatakwirwaanga esisa, haandi ese njia ohuboolera abo Abataali abaandu baange endi, ‘Eng'we bulaanu muli abaandu baange’ nae oyo achia ohuboola ati, ‘Ewe oli Nasaae waange.’ ”