Hosea 14 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohwelirira hwa Hosea eyiri Yisiraeli

¹ Eng'we kobole eyiri Omwaami, Nasaae weeng'we, baandu ba Yisiraeli eng'we. Esibi syeeng'we sibaholere mweegumula mani mwaamala mwaakwa.

² Kobole eyiri Omwaami, mani muhole ohusaba huno hube esiyaanwa syeeng'we yaali: “Lehera ebyonoono byeefwe byoosi, ofukiirire ohusaba hweefwe huno, mani huba huchia ohuhufumia sa koti lu hwamala ohuhusuubisa.

³ Asiria haba sisinyala ohutuwonia, haandi kata neende efaraasi ch'ebiita chosi sichinyala ohutuliinda daawe. Efwe haba haandi sihuchia ohubooleraho ebiloongaloongwe byeefwe bino huti, mbwe nibyo Nasaae weefwe daawe. Omwaami, ewe okwiraanga esisa abo boosi ababula oyo yeesi yi banyala ohuchiaho.”

Omwaami asuubisa Yisiraeli obulamu buyaaha

⁴ Mani Omwaami aboola ati, “Ese njia ohukobosa abaandu baange engo yiindi. Ese njia ohubaheera neende omwooyo kwaange kwoosi; sisisiiriho neende obunyoolefu bwoosi nabo daawe.

⁵ Ese njia ohuba eyiri abaandu ba Yisiraeli koti efula hu loba lyooma. Bachia ohumuliha koti ebimuli; bachia ohwomiisa bulai emisi kyaabwe koti sa emisaala kya Lebbanooni.

⁶ Bachia ohuba abalamu nibalimo ohuhula huyaaha, haandi ohuba ab'esiiso koti omusaala museituuni. Bachia ohuwunya esing'aari koti sa emituumba kya Lebbanooni.

⁷ Ehabi liindi, bachia ohumenyaanga aasi w'obuliindi bwaange. Bachia ohulimaanga ebilime by'emere mani babe abeebusi koti emituli. Bachia ohumanyihanaanga koti efiini ya Lebbanooni.

⁸ Abaandu ba Yisiraeli bachia ohuhaya ohubaaho neende esiindu syoosi si baholera ebiloongaloongwe; Ese mweene njia ohukobolaangamo amasaayo kaabwe, mani omweene mbaliindeenge. Koti sa omusaala kutaaluluhaanga, ese njia ohubeyikamia mu siiniha syaange; Ese niise emoni yitulamo ehabi chaabwe choosi.”

Emaliirisa

⁹ Abo abakesi bahoya baanyala ohumanya esiiba nisyaandiikwa ano sino, haandi bahoya baasita mu myooyo kyaabwe. Olwohuba engira ch'Omwaami choosi nichio echihoyera, mani abaandu baluungifu babaao hulwohuchilondaangaho, nae abonooni beegumulaanga sa mani bamala bakwa, olwohuba sibachifwichaangaho daawe.