Hosea 12 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Buli siindu si baandu ba Yisiraeli bahola, ohutula echuli ohwoola esiro, sibulamo obuhoonyi daawe, haandi siiti. Ohukaadirisa neende ebiholwa by'obwaalaba byamenya nibibyemeedaangamo. Bahola Endagaano neende Asiria, haandi bahola obuchurusi neende Misiri.

² Omwaami ali neende ohwekanyiirisa hwaleeta hu baandu ba Yuda; haandi achia ohusaandya Yisiraeli hulw'engira yi baandu bae beehola. Achia ohubatuunga ebiindu bi bahola.

³ Yakobbo kuuka yaabwe, yalwaanakana neende Esau, ehwaana lyaasye, boombi nibali nibasisiiri mu nda ya ng'inaabwe; mani Yakobbo niyahula, haandi yeecha yalwaanakana neende Nasaae

⁴ yalwaanakana neende malaika mani yaayingira. Yalira ohwoola lu yanyoola ehabi. Haandi mu Bbeteli, Nasaae yeecha eyiri Yakobbo kuuka yeefwe, mani yaalomaloma nae.

⁵ Wuno yali niye Nasaae Ow'obunyala bwoosi, Omwaami nilyo eliita lyahoyere ohwiinamirwaanga nalyo.

⁶ Mani bulaanu, eng'we abeechuhulu ba Yakobbo, mwesike Nasaae weeng'we mani mumukobolere. Mube abatiiririrwa haandi abahola esihoyera, mani muliindirire Nasaae weeng'we ohubaaho neende syaahola, nimwesimiriise.

Emboosi chimeedaho echiheengera Yisiraeli omusaango

⁷ Omwaami aboola ati, “Abaandu ba Yisiraeli sibeesikiha koti Abakanani; baheera muno ohwiiba abakulaana nabo nibehoonyera ebikero by'obubacha.

⁸ ‘Efwe huli abayiinda,’ beeboola. ‘Efwe hwabitamo. Haandi abulao oyo yeesi onyala ohutusitaaka hulw'ohunyoola obuyiinda mu ngira cho bwiibi.’

⁹ Nae ese, Omwaami Nasaae weeng'we, owabeemirira ndaabatusa mu Misiri, njia ohubahola mwoole ohumenyaanga mu mayeema haandi, koti lumwalichiingi hale nindeecha yi muli nimuli mu siparara.

¹⁰ “Ese ndalomalomera abanabbi, haandi ndaababeresaanga ebibonehera ebiingi, haandi ohubitira mu banabbi nimwo mu ese ndeechera mani ndaabereseramo abaandu baange ebibalabula.

¹¹ Kata katyo, ebiloongaloongwe bisiinamirwaanga sa mu Gileadi bweene muno, mani abo abasiibinamiraanga bachia ohufwa sa. Esurusi chiyaanwayo mu Giligaali, neende alutaari chiri ebweene eyo chichia ohweehola ebiswa by'amakina ebiri alafu peengerere.”

¹² Yakobbo kuuka yeefwe, yeecha yoola ohwiiruhira mu Mesopotamia, yi olw'ohudaha ohunyoola omuhasi adeehye, yeecha yaanyala ohuholeraanga omusaacha waasye haandi yayaanga amakoondi kae.

¹³ Omwaami nae yaatuma omunabbi ohuchia ohununula abaandu ba Yisiraeli ohutula mu buyiike mu Misiri, haandi neende ohubaliindaanga.

¹⁴ Mani abaandu ba Yisiraeli baholere Omwaami yanyoolera ebilulu; bahoyere sa ohufwa baawa, hulw'obwiiti bwaabwe obwo. Omwaami waabwe, achia ohubasaandya hulw'esoni chibamuleetereho.