Hosea 11 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Obuheeri bwa Nasaae eyiri abaandu bamujeemera

¹ Omwaami aboola ati, “Yisiraeli niyali n'asisiiri omuyere, ese ndali nindamuheera muno mani ndamulaanga ohutula mu Misiri koti omwaana waange mweene.

² Nae koti lu ndemeeda ohumulaangaanga, nilwo lu yesi yemeedaanga ohuungabuhaho. Abaandu bali abaange bachaaka sa ohuyiraanga ebiyaanwa eyiri Bbaali; bachaaka ohunioheseraanga ebiloongaloongwe obubbaani.

³ Nihaandi niise owataangira ohweekesa Yisiraeli amakeenda. Ndeecha ndaakata abaandu baange mu hwaaya, nae haba sibanyala ohumanyaho bati ndali ni ndi ese mweene owabaleraanga.

⁴ Ese ndeecha omweene ndaabasudya yi ndi neende obwekoombi obuungi muno neende obuheeri. Ndabadoola ndaabakiinga aakulu, mani ndaamala ndaabafwiinyirira hu tama lyaange bweene; Ndaguunamaanga aasi yi bali nimbaliisa buliisa.

⁵ “Nae bahaya ohuungobolaho daawe, mani sakira bahoyere ohukobolayo mu Misiri, mani Asiria yeecha yaabatuka.

⁶ Ebiita bichia ohweyerera nibihalakania mu biko byaabwe, mani nibilikulaanga ebiruwa by'ebiko ebyo. Bichia ohunyaasa abaandu baange abo olwohuba baholaanga sa ebyo abeene bi babaasa bati nibyo ebihiramo.

⁷ Bahayira sa hu hukaluuhanaanga nibaandulaho. Mani bachia ohuubba wuuwi ohweema hu koombo lichia ohuba nilibaliho, nae abulao kata mulala ochia ohulibamalaho daawe.

⁸ “Ese ndahabalehuulira endye, ewe Yisiraeli? Ese ndahabajwaang'a endye, ewe Yisiraeli? Ese ndaabasihirise koti lu ndahola Adiima, oba ese ndaabahole koti lu ndahola Sebboyimu? Omwooyo kwaange haba sikuchia ohuunganya hole endyo daawe! Obuheeri bwaange yi muli bubitiirifu.

⁹ Ese haba siinjia ohubasaandya neende etima haba; Ese haba siinjia ohusihirisa Yisiraeli haandi. Olwohuba ese ndi Nasaae, nae haba siindi muundu daawe. Ese, Omwoolerefu, ndi naang'we. Ese haba siinjia ohwiicha yi muli neende etima daawe.

¹⁰ “Abaandu baange bachia ohunondaanga nihuumula koti edalang'i, eyiri abasuku baabwe. Bachia ohubbibbirihana nibeecha yi ndi ohutula emuumbo.

¹¹ Bachia ohwichaanga nibatula mu Misiri, bwaangu muno koti amayoni, haandi ohutula mu Asiria, koti amaguugu. Ese njia ohubaleeta engo mu madaala kaabwe haandi. Ese, Omwaami, niise olomaloome.”

Yisiraeli Neende Yuda Bifunaanwa

¹² Omwaami aboola ati, “Abaandu ba Yisiraeli baandebodohaanie neende obubacha bwaabwe, neende obubachirisi bwaabwe, haandi abaandu ba Yuda basiinjemeere, ese omweesikwa haandi Nasaae mwoolerefu.”