Hagai 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Oluyaali lw'Enyuumba y'Omwaami njaaha

¹ Hu ludaalo lw'amahumi kabiri neende lulala, olw'omwoosi kwa chitaanu-na-chibiri, mu mwaaka kwohubiri okw'obutuki bwa Dario, Omwaami yalomaloma n'abitira mu omunabbi Hagai ati:

² “Bulaanu lomaloma neende Serubbabbeli omwaana wa Seyalitieli gafana wa Yuda, neende Yosua omulaamisi muhuluundu, haandi omwaana wa Yehosadaki, neende abaandu boosi abakobola ohutula mu jeela, mani obateebe oti,

³ ‘Wiina mweene mweeng'we odoong'ereo, owabonaho oluyaali lw'Enyuumba yaange olwataangira? Nae mulubona mutye bulaanu? Haba simulubona koti olubulamo oluyaali?

⁴ Nae ewe Serubbabbeli, neende ewe Yosua omulaamisi muhuluundu, haandi omwaana wa Yehosadaki, neende eng'we abaandu bomu syaalo, Omwaami aboola ati, gume, mutawaamo amaani. Hole omulimo, olwohuba ndi alala naang'we, Ese Omwaami w'Obunyala Niise oboola,

⁵ ohuchianakana neende esisuubise si ndahola naang'we, nimwali nimutula Misiri. Ndabasuubisa ohubechaanga alala naang'we buli siha. Mani mutatya daawe.

⁶ Olwohuba Omwaami w'Obunyala aboola ati: Sidoong'ere esiha sidiidi muno, mani ndengaanie ekulu neende esyaalo, neende enyaanja neende abuundu woomu.

⁷ Mani njia ohudengaania ebyaalo byoosi, mani eby'engaanga by'ebyaalo byoosi bireetwe ano, mani njia ohwichusa Enyuumba yino neende eby'engaanga.

⁸ Efeesa yoosi neende esaabbu yoosi byaange nibyo.

⁹ Mani oluyaali lw'Enyuumba yaange yino, lwahabe oluhoongo muno ohuhira olwataangira. Haandi mu luyaali olwo nimwo mu ndahabeere abaandu baange omuleembe neende ebiindu bilai.’ ” Omwaami w'Obunyala niye oboola.

Omunabbi yeteeba hu balaamisi

¹⁰ Hu ludaalo lw'amahumi kabiri neende chine, olw'omwoosi kwa chitaanu-na-chine, mu mwaaka kwohubiri okw'obutuki bwa Dario, Omwaami haandi yalomaloma neende omunabbi Hagai.

¹¹ Omwaami w'Obunyala mani n'aboola ati: “Teeba abalaamisi baheengeo hu siteebo sino,

¹² ‘Omuundu n'aheenga esikusu sy'enyama hu siyaanwa syoolerefu, mani esikusu esyo nasidiira neende engubo yae yiyefwalire, mani ekemo ly'engubo eyo niryengeeng'a hu ndulo w'omugaati, oba hu sikayee, oba hu malwa, oba hu mafuta, oba hu byohulya by'engeri yoosi, esyohulya esyo, syehola esyoolerefu oba daawe?’ ” Abalaamisi mani nibakobolamo bati, “Daawe.”

¹³ Mani omunabbi Hagai n'ateeba ati: “Omuundu w'omusiro olw'ohudiira oba ohwengeeng'a hu mulaambo, mani n'adiira silala hu byohulya ebyo, syehola esitali esyoolerefu?” Mani abalaamisi nibakobolamo bati, “Eee, mubwadyeeri bweene, syeehola esitaali esyoolerefu.”

¹⁴ Mani Hagai n'aboola: “Omwaami aboola ati, olwo nilwo lu siri neende abaandu bano, haandi neende esyaalo sino mu moni waange, neende buli siindu si bahola. Buli siindu sibaleeta mu moni waange ano haba sisyoolerefu daawe.”

Omwaami asuubisa abaandu ehabi chae

¹⁵ Mani Omwaami n'ateeba ati: “Eng'we haba simunyala ohubona ebyaboolaho? Nimwali nimusisiiri ohuchaaka ohwoombaha buyaaha Enyuumba yino,

¹⁶ koti lu biindu byabachiira? Omuundu niyolaanga hu situuli sy'engaano mani n'asuubira ohunyoola elita emia ndala ech'efiini, nae n'anyoola ebikono ehumi byoong'ene. Haandi niyolaanga hu sihunyiro sy'omwenge mani n'abaasa ati achia ohudaya egalani amahumi kataanu, nae yadaya amahumi kabiri koong'ene.

¹⁷ Ndabasaandya nimbasindihamo omuyaka kusaamba neende amakina k'efula mu bilime byeeng'we; nae nimuhaya ohukobola yi ndi.

¹⁸ Baase ohutula hu ludaalo luno ohwemeeda mu moni, ohutula hu ludaalo lw'amahumi kabiri neende chine olw'omwoosi kwa chitaanu-na-chine. Baase, ohutula hu ludaalo lu mwamaliraho ohwoombaha omusiingi kw'Enyuumba yaange.

¹⁹ Kata emwo yohutaaka yahaba niyitaali mu syaaki, haandi engaano, oba emituli, oba epomegureenate, oba omuseituuni, oba emisabbiibbu bisisiiri ohwaamaho ebyaamo, nae ohutula enyaanga yino, njia ohubaberesa ehabi.”

Bi Omwaami asuubisa Serubbabbeli

²⁰ Hu ludaalo lw'ehumi-na-chitaanu-na-chidatu, olw'omwoosi okwo, Omwaami yaberesa Hagai omulaanga ehabi lyohubiri n'aboola ati:

²¹ “Lomaloma neende Serubbabbeli, gafana wa Buyudaaya, omuboolere oti, ndi aambi ohudengaania ekulu neende esyaalo,

²² mani maleo obwaami bw'ebyaalo. Ndi aambi ohusihirisa obunyali bw'obwaami kaabwo. Njia ohusukuna ebigaari neende abeerusi babyo. Efaraasi neende abeerusi bacho bachia ohukwa aasi, bachia ohwitana abeene-na-beene.

²³ Hu ludaalo olwo, njia ohuhubukula ewe Serubbabbeli, omuhalaabani waange, haandi omwaana wa Seyalitieli, mani huteeo otuke mu liita lyaange; ochia ohuba koti engila hu muhono, olwohuba malire ohuhudoola.” Omwaami w'Obunyala niye oboolere.