Hagai 1 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Omwaami alagira ohwoombaha buyaaha Enyuumba ya Nasaae

¹ Mu mwaaka kwohubiri Dario naali omutuki wa Perisia, hu ludaalo lutaangira mu mwoosi kwohusaasaba, Omwaami yalomaloma neende omunabbi Hagai. Omulaanga kuno kwali okwohuchiira Serubbabbeli omwaana wa Seyalitieli, haandi gafana wa Yuda, neende eyiri Yosua omulaamisi muhuluundu, omwaana wa Yehosadaki.

² Omwaami w'Obunyala n'aboola ati: “Abaandu bano baboola bati ‘Esiha sisisiiri ohwoola esy'ohwoombaha buyaaha Enyuumba y'Omwaami.’ ”

³ Sakira Omwaami yalomaloma neende omunabbi Hagai n'ateeba ati:

⁴ Lwasiina eng'we mumenya mu nyuumba choombahwa bulai, nae Enyuumba yaange yidoong'a saao yityo?

⁵ Bulaanu sakira Omwaami w'Obunyala aboola ati: Mubaase hu bibakwiireho.

⁶ Etaaka liingi nae ekesa diidi. Mulya, nae haba simwikuta. Mung'wa, nae bi mung'wa haba sibibakwiisa obuluwo daawe. Mwefwaala, nae emboo yidoong'a niyibalya. Omusaara ku muhalaabani anyoola haba sikumumala daawe, kubita-bubita mu sawo chadomoha.

⁷ Omwaami w'Obunyala aboola ati: “Mubaase hu bibakwiireho

⁸ Bulaanu muniine hu bigulu muleete embaao, mani mwoombahe buyaaha Enyuumba yino; mani nyale ohusangaala, haandi nyoole oluyaali luhoyera.

⁹ Mwasuubira ohunyoola ekesa liingi, nae mwanyoola ebidiidi. Nae nimwabileeta engo, byadumuuha-budumuuha. Omwaami w'Obunyala ateeba ati: Lwasiina byali bityo? Olwohuba Enyuumba yaange yireherwe yityo sa, nae buli muundu hweeng'we adeeba hu nyuumba yae sa.

¹⁰ Mani sakira efula yihayire ohukwa, haandi eloba lihayire ohwamamo ebyaamo byaalyo.

¹¹ Mani ndeetere esiminyu hu syaalo, neende hu bigulu neende mu ndaalo ch'engaano neende ech'emisabbiibbu neende ech'emituli, neende hu bilime byoosi, neende hu baandu neende hu bisolo, neende hu buli siindu sibahola.”

Abaandu bafukiirira ebilagiro by'Omwaami

¹² Ao mani Serubbabbeli omwaana wa Seyalitieli, neende Yosua omulaamisi muhuluundu, omwaana wa Yehosadaki, alala neende abaandu bakobola ohutula mu jeela boosi, nibahola koti lu Omwaami Nasaae waabwe yabalagira. Baatya mani nibafukiirira emboosi y'omunabbi Hagai, ku Omwaami Nasaae waabwe yali n'amutumire.

¹³ Mani Hagai, wamwaanda w'Omwaami, n'aboolera abaandu emboosi y'Omwaami okuboola kuti, “Ndi naang'we.”

¹⁴ Ao mani Omwaami naata mu Serubbabbeli gafana w'Abayudaaya, haandi omwaana wa Seyalitieli, neende mu Yosua, omulaamisi muhuluundu, haandi omwaana wa Yehosadaki, alala neende mu baandu bakobola ohutula mu jeela boosi omwooyo kw'ohuhola hu Nyuumba y'Omwaami. Mani nibeecha nibahola hu Nyuumba y'Omwaami w'Obunyala, Nasaae waabwe,

¹⁵ hu ludaalo lw'amahumi kabiri-na-chine, olw'omwoosi kwohusaasaba, mu mwaaka kwohubiri okw'obutuki bwa Dario.