Esy'Abaleefi 24 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohuliinda bulai amataara

¹ Omwaami yaboolera Musa

² ohuberesa amalako kaloondaho kano abaandu ba Yisiraeli: Muleeteenge amafuta k'emiseituuni amahaya amalai akahiramo, ak'amataara kali mu Yeema, hu kanyale ohwaaduhaanga esiha syoosi.

³ Buli ngoloobe, Arooni ahoyere ohuchichaanga nakaambya, mani naakaleha nikaaduhira mu moni w'Omwaami, erwaanyi w'epasya, mu moni w'Esanduuku ly'Endagaano eliri Abuundu Ahiramo Obwoolerefu, ohwoola echuli. Esilagiro sino sihoyere ohuloondwaanga endaalo choosi echiicha.

⁴ Arooni niye ochia ohuliindaanga amataara kano akali hu siteeni sy'amataara sy'esaabbu haya, haandi niye ohoyere ohubona ati, kaaduhira eyiri Omwaami, esiha syoosi.

Emigaati kiyaanirwe eyiri Nasaae

⁵ Bukuleenge ekiloguraamu ehumi-na-chibiri echy'obusye, mani muhubbamo emigaati ehumi-na-kibiri.

⁶ Tekeheenge emigaati mu nyiriri chibiri, emigaati kisaasaba mu buli lunyiriri, hu meesa yafuunihwa neende esaabbu njereere, eyiri Omwaami.

⁷ Techeenge obubbaani buhaya hu buli lunyiriri, koti esilolero sy'esiyaanwa sy'ebyohulya eyiri Omwaami, ohubukula abuundu w'emigaati.

⁸ Buli Sabbaato, endaalo choosi echiicha, emigaati kihoyeerwe ohutebwaanga eyiri Omwaami. Kuno kuli omulimo kwa Yisiraeli endaalo choosi pe.

⁹ Emigaati kino kiba kiri eky'Arooni neende abeechuhulu bae, haandi bachia ohukiriraanga Abuundu Woolerefu, olwohuba sino siba siri esituundu syoolerefu muno hu byohulya biyaniirwe Omwaami hulw'abalaamisi.

Esibonereso sy'ohuboneraho esihoyera neende esichiirayo

¹⁰ Bulaanu, omwaana w'omuhasi Muisiraeli, yi laatang'ene yali Omumisiri, yasiingira yaatula mu baandu ba Yisiraeli; omwaana w'omuhasi Muisiraeli oyo neende omusaacha Muisiraeli beecha baasoolanira mu kaambi omwo,

¹¹ mani omwaana w'omuhasi Muisiraeli yafwoola Omwaami, haandi yaabwaaba eliita lyae. Mani baamuleeta eyiri Musa. Eliita lya ng'ina lyali Selomiiti, omuhaana wa Dibbiri, ow'enono ya Daani.

¹² Bamwiikalira baamuliinda, ohwoola lu hudaha hw'Omwaami hulinyalihanira ohumanyihana yi bali.

¹³ Omwaami yaboobera Musa ati,

¹⁴ “Bukula omusaacha oyo omutuse erwaanyi w'ekaambi. Buli muundu yeesi owali naamuwuliireho n'abwaaba yeeche ate omuhono kwae hu mutwe kw'omusaacha oyo, ohweekesa mbwe omusaango kumuhirire, mani oluyia olwo lwoosi luhoyeere ohumuhubba amakina ohwoola lwaafwa.”

¹⁵ Mani weemeo oboolere abaandu ba Yisiraeli oti, omuundu yeesi obwaaba Nasaae ahoyere ohubereswa esibonereso koti lu biba nibihoyera

¹⁶ mani yeetwe. Buli Muisiraeli yeesi, oba omuteende yeesi owamenya mu Yisiraeli, ofwoola Omwaami, oluyia lwoosi luhoyeere ohumuubba amakina ohwoola lu aafwa.

¹⁷ “Buli muundu yeesi owiita, ahoyere ohwiitwa,

¹⁸ haandi omuundu yeesi owiita esisolo sy'omuundu wuundi, ahoyere ohusikobosao.” Esihuluundu siri mbwe, obulamu hulw'obulamu.

¹⁹ “Omuundu yeesi nanyaala omuundu wuundi, esiindu syaaba naaholere owaasye oyo nisyo esiba sichia ohumweeholaho.

²⁰ Naaba naahalaake ekuumba, ekuumba lala lyae lyosi liba lichia ohuhalakwa; naaba naamuwofuuse emoni ndala, emoni ndala yae yosi yiba yichia ohuwofuswa; naaba naamubboongolemo eliino lala, eliino lala hu meeno kae liba lichia ohubboongolwamo.” Obunyaalifu bwoosi bwaaba naaholere hu muundu wuundi, nibwo obuba nibuchia ohumweeholaho ohumutuunga.

²¹ Oyo yeesi owiita esisolo syoosi ahoyere ohusikobosao, nae oyo owiita omuundu, yesi yeetwa sa.

²² Elako lino lidiira hweeng'we mweesi, hu Baisiraeli neende hu bateende ababamenyamo, olwohuba ese niise Omwaami Nasaae weeng'we.

²³ Mani Musa niyamala ohuboola atyo eyiri abaandu ba Yisiraeli, babukula omuundu oyo mani baamutusa erwaanyi w'ekaambi, mani baamuhubba amakina yaafwa. Mu ngira yino, abaandu ba Yisiraeli bahola esiindu si Omwaami yali n'alagiire Musa ati siholwe.